ESTHE 1 - Kalate Zambe Nnomo a Mfefe Mfefé Nkôñelan

Njô bôt Asuérus a bo dina

¹ Jame di e nga boban melu njô bôt Asuérus a nga jôô bifuse bi si mewôm mebaé a zamgbwa, ataté Inde a kui Etiôpi.

² Melu mete, njô bôt Asuérus a nga too *nda njô bôt é mbe e Suz, nlô tison.

³ Mbu lale ya njôane wé, ñwô a nga bo beta dina asu bivete bié, bebo bisaé bé bese, nkane bita Perse a wu ya Médi, bingok a bengovina ya meku'u me si;

⁴ a nga liti be bitôto'o bi biôm ya nté nkôñ wé, a duma ya ngul éjôé jé. Dina ate a nga tabe melu ntet a mewôme muam.

⁵ Eyoñe melu mete me maneya, njô bôt a nga beta bo dina mfe e minseñe ya *nda njô bôt tañe melu zamgbwa asu bôte mevale mese be nga too tisone Suz, ataté bôbenen a kui bôbetok.

⁶ Bindelé bi too ndubane léñ, sut, évele mevule me ntômba, bi nga tii e minkol mi too éfumulu, angôô nsolan e bilondo bi argent a mekône me marbre. Binoñe y'aba *nda, mboone or a argent bi nga tele si bi too ñyañane porfir, marbre, nakre a évindi marbre.

⁷ Be nga nyuu bôte bilam e bilaé bi or mevale meval été. Woon a mbe bifôfôt a be nga ve nye bôt éne'ene.

⁸ Ajô te môt ase a mbe nguleya nyu aval a kômbô, amu njô bôt a nga bendé bebo bisaé bese ya *nda jé na be jalé minkômbane mi bôte bé a nga bañete.

⁹ Wôna e *nda njô bôt été, Vasti, nga njô bôt Asuérus, nye fe a nga bo dina asu binga.

Vasti a sub éto nga njô bôt amu ébiasé

¹⁰ E môse zamgbwale, valé njô bôt Asuérus a too njalan a mevak amu woon a nga nyu, a nga loone bekalane bilaé zamgbwa be mbe be saane nye môé na: Mewuman, Bizta, Arbôna, Bigta, Abagta, Zétar a Karkas

¹¹ a bendé be na be zuu nye Vasti, nga njô bôt, a be'e ékate njô bôt. Asuérus a nga kômbô liti biwôlô bebo bisaé bié a e bôte bevo'o be mbe valé, abim avé nga njô bôt a mbe abeñ, amu a mbe fo'o étua abeñ.

¹² Bekalan *élaé be nga kalan abendé njô bôt e be ngal, v'a nga bene zu. Ajô te njô bôt a nga dañe yôñ a beta ayaa.

¹³ Nde a nga kee bebôndé mefe'e bé ésok, amu beyeme mame ya metiñ a mebelan mbe be mbe be kôme mam me njô bôt éyoñ ése.

¹⁴ Bebôndé mefek be nga dañe njô bôte bebé be mbe môé na: Karkena, Kétar, Admata, Tarsis, Mévés, Marsena a Memukan, biwôlô bebo bisaé bi njô bôt zamgbwale ya Perse a Médi bi mbie bia dañ nkôñ yôp éjôé ése.

¹⁵ Njô bôt a nga jô be na: Ma, njô bôt, ma te lôme bekalan *élaé bame na be kate Vasti nga njô bôt abendé dam, ve a nji bo de mewôk. Aval'ane metiñ ma jô, za melebe ma yiane nye'

¹⁶ Ajô te Memukan a nga jô njô bôt a biwôlô bebo bisaé na: Vasti, nga njô bôt a te fo'o bo mbia jam, sa ve mfa'a njô bôt étam, ve nalé fe mfa'a biwôlô bebo bisaé bé, ja'ane fe mfa'a befam bese be too mebôta me si ya éjôé ése.

¹⁷ Bebela a ne na, e binga bese ba ye nyoñe foé ya mboone nga njô bôt wu ba ye taté fe na ba biasé e ngule beyôme bap. Ba ye kale bebien be jô'ô na: Njô bôt a nga bendé na be zuu nye Vasti nga njô bôt, ve a nga bene zu!

¹⁸ Den émiene nyô, beyale biwôlô bebo bisaé ya Perse a Médi ba ye wô'ôtane mboone nga njô bôt a ve bebiene nguleya fetane beyôme bap, a ébiasé binga ja ye dutu ayaa befam.

¹⁹ Ajô te nge njô bôt a yene nalé mvaé, ô mialane foé ntyi'ane wo ve Vasti mvinda nnôm éto ya bo te beta tebe njô bôte mis, a wo ve minga mfe a yian éto nga njô bôt. Ntyi'ane te wo yiane nyiin e metiñe ya Perse a Médi été mme môt a se nguleya tyam.

²⁰ Eyoñ ba ye yem ntyi'ane wôé e mevôm mese ya beta ndam éjôé wôé nyô, minga ase a ye bo nnôme wé mewôk, ja'ane nnôm a n'éwôlô nge mone môt.

²¹ Njô bôt ba biwôlô bebo bisaé bé be nga yen ôsimesane te mvaé, ajô te njô bôt a nga tôñ e fe'e Memukan.

²² Nde a nga lôme bekalate e mebôta me si mese, aval'ane ntilan a nkobô bôt ba nyiñ été bi né. Bekalate bete be nga yemete fam ése na é bo'o njôô ya *nda bôte jé, é bo'o fe na bôt be kobô nkobô be nga bialane wô.