Ester 1 - Biblia ande chib Romani

E sinia katar o charo Asuero

¹ Ande llivesa kana o Asuero charoila pe stotina ta bis ta efta phuvia, katar e India llik kai e Etiopia,

² thodaia pi charoina ando foro kai ikhardol Susa.

³ Ta ando trito burs katar leko gazdaripe, o charo Asuero cherda iek pachiu sa e llenenge kai radina leke ta kai pomozina ande leki charoina, e gazdenge katar e boñikura katar e Persia ta e Media, ta e llenenge kai gazdarina ande phuvia,

⁴ ta gia te sikavel lenge o barvalipe ta o baripe katar leki charoina ta o glamno sukaripe katar leki zor. Sou chon cherda pachiu,

⁵ ta pala goia pachiu, cherda aver pachiu, efta llive ande bar zeleni katar leko cher. Ta ikharda sa golen kai zivina ande Susa, e mai glamne ta i golen kai ni sea gia glamne.

⁶ E bar saia lachardi ande chitura kuch, parrne, zelene ta vunete, istarde pe sole cherde katar o lino lolo kai nakhena katar e angrusta rupune, ta sea phangle pe direkura cherde katar o marmol. Ta i thodea kervetura sunakune ta rupune, ta e phuv saia uchardi e barrenchar mai kuch, nakar ta marmol parrno ta kalo.

⁷ O pipe thovena le ande tasura sunakune, suako iek ni saia sargo aver, ta saia but mol pe goia pachiu soke o charo saia but posteno.

⁸ A o charo phenda e llenenge kai anena o jape ta o pipe ando cher, te na cheren e llenen te pien pe zor, vou phenda te muken len te pien gachin von mangena.

⁹ A e charoina e Vasti, i voi cherda iek jape e diskinienge kai avilea e gostonenchar ando cher katar o charo o Asuero.

¹⁰ Ando eftato llive katar e pachiu, o charo saia but veselo soke pilaia mol, ta bichalda efta eunukura, o Meuman, o Bizta, o Jarbona, o Bigta o Abagta o Zetar ta o Karkas,

¹¹ te anen lete leke rromia e chariona Vasti ta te anel pi korona pe po soro, te sai dikhel o foro ta i e mai glamne llene gia sukar saia leki rromi, soke chachimaia voi saia but sukar.

¹² A voi ni kamla te cherel so bichalda o charo te phenen lake e eunukura. Ondaka o charo jolailo zurale. Ta pherdo joli

¹³ dia orba e llenenchar kai llanena ande zakonura ta o liubao, soke o charo saia sikado te dikhel gala ezgode e llenenchar kai pinllarena e zakonura.

¹⁴ Ta gola kai sea mai pase katar o charo sea o Karsena, o Setar, o Admata, o Tarsis, o Meres, o Marsena ta o Memukan, efta llene glamne ande Persia ta Media kai sai avena angla o charo, ta saia len but glamno rado ande charoina.

¹⁵ Ta o charo puchla len: E charoina Vasti ni cherda so bichaldem te phenen lake. Prema o zakono ¿So trubul te chera laia?

¹⁶ Ondaka angla sa e mai glamne llene kai radina pasa o charo, o Memukan phenda e charoke: E charoina Vasti ni dukhada samo e charo, dukhada i e llenen kai gazdarin, ta sa e llenen kai zivin ande forura katar o charo o Asuero.

¹⁷ So cherda e Vasti ka llanen le sa e diskinie, ta gua ka cherel te jasaren o luibao pe rromenchar, soke ka phenen: O charo Asuero ikharda pe rromia e charoina Vasti, a voi ni kandia le.

¹⁸ E rromia katar e llene glamne kai radin ande Persia ta ande Media, ka llanen so cherda e charoina ta isto allive ka mangen te den gaia orba pe rromenchar, ta gava ka anel espurnia ta joli.

¹⁹ Goleke, te mangela o charo, ka chera te asundol gava zakono e charoko, ta te achel pisime ande zakonura katar e Persia ta katar e Media, ta gia te na phagen len: E charoina Vasti te na avel nikada ios angla o charo ta te na avel voi e charoina, ta aver diskinia mai lachi te thovelpe pe lako than.

²⁰ O zakono e charoko trubul te sikadol ande sa e forura kai vou charoil, ta gia e diskinie ka den liubao pe rromen, avena glamne o ni avena glamne.

²¹ Gaia orba avila drago e charoke ta i e llenenge kai radina lea, ta o charo phenda te llal angle gua zakono prema so phendaia o Memukan.

²² Ondaka bichalda lila kai sa e forura katar leki charoina. E lila sea pisime ande chib kai dena orba ande suako phuv ta foro katar leki charoina, ta phenela kai o rrom trubul te gazdaril ande po cher. E lila saia te aven pisime ande chib kai dena orba ande leko foro.