Филиппи 3 - Къэбарышӏур (Инджыл)

ЯЩЭНЭРЭШЪХЬ Тхьэм дэжь къикӀырэ шъыпкъагъэр

¹ Аужыпкъэм, сшыхэр, Зиусхьаныр шъугухэм зэрарылъым пае шъугушӀу. А Ӏоф дэдэхэр къышъуфэстхыжьынхэр сэркӀэ къинэп, ахэр къызэрэстхыжьхэрэми ишӀуагъэ къышъокӀыщт.

² Хьэхэм афэдэ цӀыфхэу, бзэджагъэ зышӀэхэу, адрэ цӀыфхэр сунэт зышӀыхэрэм защышъудзый.

³ Шъыпкъэу сунэт ашӀыгъэхэр тэры, тэ, Тхьэм ы Псэ ЛъапӀэ илъэкӀыкӀэ Тхьэм фэлажьэхэу, Христос Исус рыпагэхэу, пкъым епхыгъэ Ӏофхэм ащымыгугъыхэрэр.

⁴ Аущтэу щыт пэтми, сэри ащ фэдэ Ӏофхэм сащыгугъын слъэкӀыщтыгъ. ЦӀыф горэ пкъым епхыгъэ Ӏофхэм ащыгугъын ылъэкӀынэу къышӀошӀымэ, сэ а цӀыфым нахьи а Ӏофхэм нахь сащыгугъын слъэкӀыщт.

⁵ Сэ мэфий сыныбжьэу сунэт сашӀыгъ, израиль лъэпкъым сыщыщ, Бен-Ямин илӀакъо сыщыщ, джуртмэ сакъыхэкӀыгъ, Тэурат хабзэм тетэу сыпсэоу фарисей купым сыщыщыгъ.

⁶ Тхьэ гъэлъэпӀэным сыгу етыгъэу сыпылъэу, чылыс зэӀукӀэм щыщхэм къин язгъэщэчыщтыгъ. Тэурат хабзэм итхэр бгъэцэкӀэнхэм ягъогукӀэ шъыпкъагъэ бгъотыщтыгъэмэ, зыми сызэригъэмысэн зи щыӀэщтыгъэп.

⁷ Ау джы Христос зыфэдэр зэзгъэшӀэным пае, Ӏофхэу зишӀуагъэ сэркӀэ къакӀощтыгъэхэм пкӀэ ямыӀэжьэу сэлъытэ.

⁸ Шъыпкъэ, Ӏоф пстэуми пкӀэ ямыӀэжьэу сэлъытэ. Сыда пӀомэ, си Зиусхьан Христос Исус зыфэдэр зэзгъэшӀэныр Ӏофхэу щыӀэ пстэуми анахьи нахьышӀу. Ежь сыфэлэжьэным пае, зэкӀэри хэсынагъ, Ӏоф пстэуми пкӀэ ямыӀэжьэу сэлъытэ, Христос сиӀахьышӀу хъуным,

⁹ ежь сыгу илъыным пае. Тхьэм ежь дэжькӀэ шъыпкъагъэ сиӀэу зэрилъытэрэм хэлъэп сэ ӀофышӀухэу сшӀагъэхэм яӀоф. Сэ зыфасӀорэр Тхьэм ежь дэжькӀэ шъыпкъагъэ сиӀэу зыкӀилъытэрэр ХристоскӀэ шӀошъхъуныгъэ зэрэсиӀэр ары. Тэурат хабзэм итхэр згъэцэкӀэнхэм иӀоф ащ хэлъэп. А шъыпкъагъэу сиӀэр Тхьэм дэжь къекӀы, шӀошъхъуныгъэми тет.

¹⁰ Христос зыфэдэр зэзгъэшӀэнэу сыфай, ар лӀагъэхэм къызэрахэтэджыкӀыжьыгъэм къикӀырэ лъэкӀыр зыфэдэри зэзгъэшӀэнэу сыфай. Христос къинхэу ыщэчыгъэхэм сиӀахь ахэлъынэу сыфай, ежь зэлӀэм, зэрэщытыгъэм фэдэуи сыхъунэу сыфай.

¹¹ Аущтэу Тхьэм лӀагъэхэм сыкъахигъэтэджыкӀыжьыным сыщэгугъы.

Ӏофхэу сызщыгугъыхэрэм сызэралъыӀэсыным ыуж сит

¹² А Ӏофхэу сызщыгугъыхэрэм салъыӀэсыгъэу е зишъыпкъагъэ щыкӀагъэ зимыӀэ цӀыф икъугъэу сыхъугъэу сӀорэп. Ау а Ӏофхэм сызэралъыӀэсыным ыуж сит, ицӀыфхэм ащыщ сыхъунэу Христос Исус къызэрэслъыӀэсыгъэм фэдэу.

¹³ Сшыхэр, Ӏофхэу сызщыгугъыхэрэм салъыӀэсыгъэу зыслъытэжьрэп, ау зы Ӏоф закъо сыпылъ: блэкӀыгъэ Ӏофхэр сщыгъупшэжьхэу, сапэкӀэ ит Ӏофхэм сызэралъыӀэсыным ыуж сит.

¹⁴ Зэпэчъэным хахьэрэм фэдэу тыныр къэсхьыным пае, кӀэухым сызэрэнэсыным ыуж сит. А тынэу зыфасӀорэр уашъом сыщыпсэуныр ары, ар къэсхьыныр ары ибынхэм ащыщ сыхъунэу Исус Христос иӀэмыркӀэ Тхьэр къызфысэджагъэр.

¹⁵ Тэ тщыщэу хэтрэ цӀыфэу Христос иӀофхэм яхьылӀагъэу щыкӀагъэ зи зимыӀэ цӀыф икъугъэу хъугъэр аущтэу гупшысэн фае. Ӏоф горэм ехьылӀагъэу нэмыкӀ гупшысакӀэ шъуиӀэмэ, Тхьэм ари нафэ къышъуфишӀыщт.

¹⁶ Ау тызнэсыгъэм фэшъуашэу тыгупшысэн фае, ащ тетэуи тызекӀон фае.

¹⁷ Сшыхэр, силъэужхэм шъуакъырыкӀу. ШъузэрэзекӀон фаем ишапхъэу шъодгъэлъэгъугъэм тетэу зекӀохэрэм шъуакӀырыплъ.

¹⁸ Сыда пӀомэ, бэрэ къызэрэшъосӀуагъэм фэдэу, джыри сынэпсхэр къехыхэзэ шъосэӀо: цӀыфыбэ Христос икъащ пыи фэхъугъ.

¹⁹ А цӀыфхэм кӀэухэу афэхъущтыр кӀодыныр ары, ятхьэри ныбэр ары, зэрыпэгэрэ ӀофхэмкӀи укӀытэжьыпхъэх. Мы дунаим иӀофхэм анэмыкӀ ягупшысэхэрэп.

²⁰ Ау тэ тихэку уашъор ары. Зиусхьан Исус Христосэу уашъом къехынышъ, тымыкӀодэу тыкъэзгъэнэжьыщтым тежэ.

²¹ Ежь илъэкӀышхоу зэрылажьэу, Ӏоф пстэури итетыгъо ыӀэчӀэгъ зэрычӀигъэуцорэмкӀи тпкъы тхьамыкӀэхэр зэблихъунхэшъ, ежь ыпкъэу щытхъушхо зиӀэм фэдэ ыгъэхъущтых.