Ефес 1 - Къэбарышӏур (Инджыл)

АПЭРЭШЪХЬ ШӀуфэс

¹ Сэ сы Паул. Тхьэм шӀоигъуагъэти, Исус Христос иапостол сыхъугъ. Шъо, Тхьэм ицӀыф лъапӀэхэу Ефес къалэм дэсхэу, Исус Христос зыгу илъхэу, ежь фэшъыпкъэхэм, мы тхылъыр къышъуфэсэтхы.

² Тхьэу тя Тэ лъапӀэрэ Зиусхьан Исус Христосрэ анэшӀу къышъущарэфи, гупсэф къышъуарэт.

Христос тыгухэм зэрарылъым пае, гурэ псэрэкӀэ Тхьэм ынэшӀу къызэрэтщифэрэр

³ Тхьэу ти Зиусхьанэу Исус Христос я Тэ щытхъушхор ий. Христос тыгухэм зэрарылъым пае, уашъом епхыгъэу, лъэныкъо пстэумкӀи гурэ псэрэкӀэ Тхьэм ынэшӀу къытщифагъ.

⁴ Сыда пӀомэ, Тхьэм дунаир къыгъэхъуным ыпэкӀэ, Христос тыгухэм зэрарылъымкӀэ ежь ибынхэм ащыщ тыхъунэу тыкъыхихыгъ, тыгухэр къабзэхэу, лажьэ зи тимыӀэу, шӀулъэгъу тыгухэм арылъэу ежь ыпашъхьэ тыщыпсэуным пае.

⁵ Исус Христос къыпкъырыкӀэу, Тхьэм ежь ибынхэм ащыщ тыхъунэу бэшӀагъэу тигъэнэфагъ, игъоу зэрилъытагъэм, ыгу хэлъыгъэм тетэу.

⁶ Аущтэу зыкӀишӀагъэр ищытхъушхо тетэу ынэшӀу къызэрэтщифагъэм пае, тэ щытхъу фэтшӀыныр ары. Сыда пӀомэ, ежь ы Къоу шӀу ылъэгъурэм къыпкъырыкӀэу Тхьэм инэу ынэшӀу къытщифагъ.

⁷ Христос ылъэу къащым щыкӀэкӀыгъэмкӀэ гукӀэгъушхо ыкӀи шӀугъэшхо къытфэзышӀэрэ Тхьэм тэ тшъхьэ ыщэфыжьыгъ, типсэкӀодхэри къытфигъэгъугъ.

⁸ АкъылышӀуагъэ пстэумрэ гурыӀоныгъэ пстэумрэ хэлъэу

⁹ игухэлъ шъэфэу Христос ригъэгъэцэкӀэнэу ухэсыгъэр игъоу зэрилъытагъэм тетэу Тхьэм къыдгуригъэӀуагъ.

¹⁰ Тхьэм игухэлъэу игъо къызыскӀэ ыгъэцэкӀэщтыр, уашъохэми чӀылъэми ащыӀэр зэкӀэ зы ышӀыхэзэ, Христос итетыгъо ыӀэчӀэгъ чӀигъэуцоныр ары.

¹¹ Христос тыгухэм зэрарылъым пае, Тхьэм тэри ӀахьышӀур къытфигъэшъошагъ. Тхьэм гухэлъэу ыухэсыгъэм тетэу, а ӀахьышӀур къытлъыӀэсынэу бэшӀагъэу ыгъэнэфагъ. Ежьыр ары игухэлърэ ишӀоигъоныгъэрэ атетэу Ӏоф пстэури зыгъэцакӀэрэр.

¹² Тхьэм аущтэу зыкӀишӀагъэр тэ апэрэхэу Христос щыгугъыхэу, пэплъагъэхэм Тхьэм илъытэныгъэшхо щытхъу фэтшӀыныр ары.

¹³ Шъо шъугухэми Христос арылъ хъугъэ. Христос шъугухэм арылъ зыхъугъэр шъыпкъагъэм ехьылӀэгъэ къэбарэу, шъумыкӀодэу шъукъэзгъэнэжьырэ къэбарышӀур зызэхэшъухыгъэр ары. ХристоскӀэ шӀошъхъуныгъэ шъуиӀэ зэхъум, Тхьэм ежь ы Псэ ЛъапӀэу тыкъызэригъэгугъагъэр мыхъурым фэдэу шъугухэм къарилъхьагъ.

¹⁴ Тэ, Тхьэм ицӀыфхэм, тшъхьэхэр ыщэфыжьыхэфэ, ӀахьышӀур къызэрэтлъигъэӀэсыщтымкӀэ Тхьэм ы Псэ ЛъапӀэ тишэсы, Тхьэм илъытэныгъэшхо щытхъу фэтшӀыным пае.

Паул Тхьэм зэрелъэӀурэр

¹⁵ Арышъ, Зиусхьан Исус шӀошъхъуныгъэу фышъуиӀэмрэ шӀулъэгъоу Тхьэм ицӀыф лъапӀэхэм афышъуиӀэмрэ якъэбар зызэхэсхыгъэм щегъэжьагъэу,

¹⁶ Тхьэм селъэӀу зыхъукӀэ, шъуигугъу сэшӀы, шъощ паий Тхьэм щытхъу фэсэшӀ зэпыт.

¹⁷ Ти Зиусхьан Исус Христос и Тхьэу, щытхъушхо зиӀэ Ты лъапӀэм сызэрелъэӀурэр, шъо ежь нахьышӀоу шъушӀэным пае, ежь ы Псэ ЛъапӀэу акъылышӀу тиӀэ зыгъэхъурэри, Тхьэр зыфэдэр къытфэзгъэнафэрэри шъугухэм къарилъхьаныр ары.

¹⁸ Шъугухэр къыгъэплъэжьынхэуи Тхьэм селъэӀу. Ащ фэдэу сызфелъэӀурэр гугъапӀэу Тхьэр къызфышъоджагъэр шъушӀэныр ары, ицӀыф лъапӀэхэм тырягъусэу щытхъушхо зиӀэ Ӏахьышхоу къытлъигъэӀэсырэри

¹⁹ шъушӀэныр ары, тэ, шӀошъхъуныгъэ зиӀэхэм, тыгухэм арылъэу, Тхьэм илъэкӀышхоу гъунэ зимыӀэри шъушӀэныр ары.

²⁰ А лъэкӀышхор зыфэдэр лъэкӀышхоу Тхьэм Христос лӀагъэхэм къызэрахигъэтэджыкӀыжьэу, иджабгъукӀэ уашъом зэрыщызыгуигъэтӀысхьагъэр ары.

²¹ Ӏэшъхьэтетхэми, тетыгъо зиӀэ пстэуми, кӀочӀэшхо пстэуми, пэщэ пстэуми, мы дунаим имызакъоу къэкӀощт дунаими зигугъу щашӀырэ цӀэ пстэуми Тхьэм Христос апшъэ ышӀыгъ.

²² ЩыӀэ пстэури Христос ылъэгу чӀэгъ чӀигъэуцуи, зэкӀэми апшъэ щыӀэнэуи, чылыс зэӀукӀэм ышъхьэнэуи ыгъэнэфагъ Тхьэм.

²³ Чылыс зэӀукӀэр – Христос ыпкъ. Христосэу тыдэкӀи щыӀэ пстэуми щыкӀагъэ зи ямыӀэу, икъугъэу зыгъэхъурэр икъугъэу чылыс зэӀукӀэм хэлъ.