Yoane 1 - Amashiwi Aba Lesa

¹ Pakutaŋga lukoso epo lyali iSiwi; ilyo-Siwi lyali naŵaLesa; iSiwi lyopele eŵaLesa.

² Ilyo lyopele lyali-po napakutaŋga naŵaLesa.

³ Ifintu fyonse fyalileŋgelwe kuli lyo; kaŵili apakuŵula lyo, tapaleŋgelwe ifileŋgelwe neli cimo.

⁴ Muli lyo emwali uMweo, nawoyo-Mweo walukwikala kutuŵa ukwakuŵantu.

⁵ Ukutuŵo'ko kulukutuŵa napamfinsi, nayeyo-mfinsi tayakukomekele.

⁶ Kwaliisile umuntu, uwatuminwe kuli ŵaLesa, isina lyakwe niYoane.

⁷ Uyo wopele aliisile koti nimboni mukusimika ifyakutuŵo'ko, ati aŵantu ŵonse ŵakacetekele pakuti pali ye.

⁸ Uyo taali kutuŵo'ko, koku; sombi aliisile mukusimike'fyakutuŵa uko.

⁹ Ekwali nekutuŵa kwacine, ukwalukuŵatufya aŵantu ŵonse; kwalukwisa mucalo.

¹⁰ Naŵo aŵene ŵaliikele mucalo capansi; icalo copele calileŋgelwe kuli ŵo, sombi aŵamucalo taŵaŵesiŵile-po.

¹¹ Ŵaliisile kufyaŵo, sombi aŵantu ŵaŵo taŵaŵapokele;

¹² sombi aŵo ŵonse aŵaŵapokelele, aŵo ŵaliŵapele amakosa akuŵa ŵana ŵaŵaLesa; ekuli ŵaŵo aŵalukupema-mo mwisina lyaŵo;

¹³ aŵataŵafyelwe kumilopa, neli nikukufwayo'kwakumunefu, neli nikukufwaya kwaŵuntunsi, sombi nikuli ŵaLesa.

¹⁴ Nalyo iSiwi lyaliŵele munefu, nekulukwikele pakati pali fweŵo, (nafweŵo twaliŵubwene uŵuleme bwalilyo, uŵuleme uŵupalene nebwawoyo utulile eŋka kuli ŵaWisi) iliiswile uluse naŵucine.

¹⁵ Yoane alisimicile ifyakuli ye, nekulaŵilisya ati: Uyu ewoyo uyu nasimicile ati: Ulukwisa panuma panji alincilile neŵo, pakuti nekale ewantanjilile.

¹⁶ Nakuli funwefunwe wakwe fweŵo fwense twalukupoka uluse naluse.

¹⁷ Pakuti amafunde alipelwe kuli Mose, sombi uluse naŵucine bwaliisile muli ŵaYesu Klistu.

¹⁸ Nekale konse, tapali-po muntu neli umo uwaŵabwene-po ŵaLesa neli limo; sombi uyo-Mwana uli eŋka, uwikala pantiŵi yaŵaWisi, ewaŵafisulwile.

¹⁹ Ukusimika kwakwe Yoane nikuku: Impindi iyo aŵaJuda ŵatumine kuli ye, ukufuma kuJelusalemi, aŵapapatilisi neŵena-Lefai, mukumwipusisya ati—Niwe nani?

²⁰ peŋka alifisulwile, taakene koku; sombi alifisulwile ati: Neŵo nsili niŵaKlistu, koku.

²¹ Naŵo ŵalimwipwisye ati: Niwenani lomba? Kani niweElaija? Naye ati: Nsili nineŵo. Naŵo ati: Mboli wakusimika uyo? Naye nekukana ati: Tau.

²² Pakuti pali fyefyo ŵalilaŵile kuli ye ati: Mbefyo lomba niwenani? Ati tukesiŵe ukuŵaŵula bwino aŵatutumine. Mbafindo wemwine ulukulisimicila?

²³ Kumfwa ye ati: Neŵo ninesiwi lyaulukuŵilicisya mumpaŋga ati: Mulunjike insila yaŵaSikulu! koti nifyopele'fyo ifi alaŵile Yisaya uwakusimika.

²⁴ Aŵo lomba aŵatuminwe ŵali ŵaŵaFalisi;

²⁵ naŵo ŵalimwipwisye ati: Kobwene toli niKlistu, neli niElaija, neli niwoyo-wakusimika, mbanindo ulukuŵatisisya aŵantu weŵo?

²⁶ Lomba Yoane nekuŵaasuka ati: Neŵo ndukuŵatisya kumenda; sombi pakati pali mweŵo paliimakene ŵambi aŵa tamwisi mweŵo,

²⁷ niŵaŵo ŵopele aŵalukwisa panuma panji, ulusiŋga lwaŋkwaŵilo yaŵo nsielelwe neŵo ukulukakulula.

²⁸ Ifyo-fintu fyalicitilwe kuBetania, pesilya lyaJodeni, umwalukuŵaŵatisya aŵantu Yoane.

²⁹ Ŋgamailo alibwene ŵaYesu ŵalukwisakuli ye, nekulaŵila ati: Ŵoneni-ko! Mwana wambelele uwaŵaLesa wopele eulukufumya ukuŵifya ukwamucalo capansi.

³⁰ Ŵalya niŵaŵo aŵa nalukweŵa ati: Panuma panjipalukwiso'muntu uncilile neŵo pakuti nekale ewantanjilile.

³¹ Naneŵo nsinamwisiŵile-po, sombi naliisile nekuŵatisya kumenda ati ye akafisuluke kuŵaIsilaeli.

³² Lomba Yoane alisimicile ati: Naliubwene Umupasi ulukuseluka kwiulu koti niciŵa, nekwikala pali ye.

³³ Naneŵo nsinamwisiŵile-po, yo, sombi aŵo aŵantumine neŵo mukuŵatisya kumenda ŵalimbulile ati: Wopele uyo uyu ukaŵona ukumuselucila Umupasi ukwikala pali ye, wopele ewakuŵatisya kuMupasi Uswetelele.

³⁴ Lomba nalibwene neŵo, nekusimika ati, Uyu eMwana waŵaLesa.

³⁵ Kaŵili ŋgamailo Yoane aliimakene pamo neŵasambile ŵakwe ŵambi ŵaŵili,

³⁶ peŋka alilolesye kuli ŵaYesu ili ŵalukupita, nekulaŵila ati: Ŵoneni-ko! Mwana wambelele uwaŵaLesa!

³⁷ Lomba aŵasambile ŵoŵilo ŵalimumfwile; lomba nekuŵalonda ŵaYesu.

³⁸ Peŋka ŵaYesu ŵalisyolokele, nekuŵaŵona ŵalukulonda, nekuŵepusya ati: Mulukufwaye' ndo? Naŵo ŵaliŵaasucile ati: MweŵaLabi! (ilyakwaluka ati ŵaSambisi!) mulekala kulipi?

³⁹ Naŵo ŵalilaŵile kuli ŵo ati: Mwise, mukaŵone. Peŋka ŵaliile, nekuŵona apo ŵaikele, naŵo nekwikala naŵo akasuŵa ako; nempindi iyo kalimanamine paciŋgulo.

⁴⁰ Umbi uwapali ŵaŵo ŵoŵilo aŵamumfwile Yoane, nekuŵalonda niAndaleya, umukwaŵo Simoni Petilo.

⁴¹ Andaleya alitanjile ukumufwaya umukwaŵo Simoni, nekumuŵula ati: Twaŵaŵona ŵaMasaya! (ilyakwaluka ati niŵaKlistu.)

⁴² Peŋka alimutanjilile kuli ŵaYesu. Lomba ŵa Yesu ŵalimutontomekele, nekula ŵila ati: Weŵo niŵeSimoni, umwana wakwe Jona; ukalukwitwa niweKefasi (ilyakwaluka ati niPetilo).

⁴³ Peŋka ŋgamailo ŵalifwaile ukuya kucalo caGalili, lomba ŵalimusanjile Filipo; nekulaŵila ŵaYesu kuli ye ati: Undonde neŵo.

⁴⁴ Uyo-Filipo ali wakuBesaida, kumusi kwaŵo Andaleya naPetilo.

⁴⁵ Naye Filipo alimusanjile Natanyeli, nekumuŵula ati: Twaŵasaŋga' ŵo aŵa alembele Mose ifyakuli ŵo mumafunde neŵakusimika ŵonse, eŵaYesu ŵakuNasaleti, aŵana ŵakwe Josefi.

⁴⁶ Naye Natanyeli alilaŵile kuli ye ati: Kani muNasaleti muliisi ukufuma-mo iciweme? Naye Filipo nekumwasuka ati: Wise, ukaŵone.

⁴⁷ ŴaYesu, pakuŵona ati Natanyeli alukwisa kuli ŵo, ŵalimweŵele ati: Ŵoneni-ko! Ulya emuIsilaeli umwinenene utaakwete-kutumpaika.

⁴⁸ Peŋka Natanyeli alilaŵile kuli ŵo ati: Mbamwanjisiŵa syani? Naŵo ŵaYesu nekumwasuka ati: Lomba taaŋgakwita Filipo, pakwikala weŵo mumukuyu, nalikubwene.

⁴⁹ Kumfwa Natanyeli waŵaasuka ati: MweŵaLabi, muli Ŵana ŵaŵaLesa; muli niMfumu yaŵaIsilaeli!

⁵⁰ Naŵo ŵaYesu ŵalimwasucile ati: Weŵo ulukucetekela pakuti nakuŵula ati nalikubwene mumukuyu? Ukaŵona ifyakucila napali fifi!

⁵¹ Nakaŵili ŵalimuŵulile ati: Cine cine, ndukumuŵuleni ati: Mukaŵona ukwisuka mwiulu, neŋkalamba syaŵaLesa silukwimina nekuselucila paMwana waMuntunsi.