Lufi 1 - Amashiwi Aba Lesa

¹ Pansiku isyo ŵasololwele neŵantu aŵasololwesi, lomba paliŵele nensala yakawumbo mucalo. Popele umbi umuntu uwakuBetelemi-Juda waliile mukwikala mucalo caMoabi, umwine, nemukasi wakwe, neŵana ŵakwe aŵalalume ŵoŵilo.

² Lombe'sina lyamuntu uyo waliilicilwe ati niElimeleci, nesina lyamukasi wakwe nalyo niNaomi, nemasina aŵana ŵakwe ŵoŵilo niMaloni naCilyoni, aŵena-Efilata aŵakuBetelemi-Juda. Peŋka kaŵafika mucalo caMoabi, nekulukwikele-mo mulya.

³ Popele apo Elimeleci, umulume wakwe Naomi, walifwile; naye Naomi walisilwe, pamo neŵana ŵakwe ŵoŵilo.

⁴ Lomba ŵo ŵali ŵopile aŵanakasi aŵakuMoabi; isina lyakwe umbi niOlipa, nesina lyakwe umbi naye niLufi: naŵo ŵonse ŵaliikele uko imyaka ikumi.

⁵ Popele apo naMaloni naCilyoni naŵo kaŵili ŵalifwile ŵoŵilo; popele umwanakasi walisilwe kuŵana ŵakwe aŵalalume ŵoŵilo nakumulume wakwe.

⁶ Peŋka'po waliimine pamo neŵalokasi ŵakwe, ati mbwelele kwesu mfume mucalo caMoabi: pakuti kale waumfwile mucalo caMoabi ati ŵaYawe ŵaliisile kuŵantu ŵaŵo pakuŵapele'fyakulya.

⁷ Pakuti pali fyefyo walifumine-mo umo wali, pamo neŵalokasi ŵakwe ŵoŵilo; naŵo ŵaliile pansila iyakubwelela kucalo caJuda.

⁸ Popele apo Naomi walilaŵile kuŵalokasi ŵakwe ŵaŵili ati: Kamuya, mubwelele mweŵilo kumaŋanda aŵanyinenwe; ŵaYawe ŵamucitileni iŋkumbu, koti nisyesyo isi mwaŵacitile aŵafwile nekuncitila naneŵo.

⁹ ŴaYawe ŋgaŵamusumineni ati mukaŵone ukutusya mweŵilo mumaŋanda aŵalume ŵenu. Popele aliŵafyontele-po; naŵo ŵalitaticile ukulila.

¹⁰ Naŵo ŵalilaŵile kuli ye ati: Icine twakubwelela kuŵakwaŵenu pamo namweŵo.

¹¹ Popele Naomi ati: Alukeni, mweŵana ŵanji: mbanindo mulukwila naneŵo? Kani muli naŵambi aŵana aŵalalume munda mwanji, ati ŵakaŵe ŵalume ŵenu?

¹² Alukeni, mweŵana ŵanji, kamuyeni; pakuti neŵo ndicekwile, nsiisi ukupwo'mulume. Kani niŋgalawila ati: Ndi nelucetekelo, ŋgandi nemulume neŵusiku bwalelo, nekufyala neŵana aŵalalume;

¹³ mweŵo kani muŋgawapembelela ili tawaŋgakula? Kani muŋgawapembelela nekulikanisya aŵalume ŵambi? Koku, mweŵana; pakuti ndukumuŵombomanineni pakuti ukuŵoko kwaŵaYawe kulimbucile.

¹⁴ Naŵo kaŵalila liŵili neminsosi; lomba Olipa kaaŵafyonta-po ŵanyinafyala; sombi Lufi ye kaaŵekatilila.

¹⁵ Naŵo ŵanyinafyala ati: Ŵona, umuufi umuŵyoŵe wabwelela kuŵakwaŵo nakuli ŵalesa ŵakwe: bwelela naweŵo, ukalonde umuufi umuŵyoŵe.

¹⁶ Popele Lufi ati: Mwiŋkombetela ati mulekeni, ati mbwelele ndeke ukumulondeni; pakuti uko mulukuya eko ŋkalukuya naneŵo; nakaŵili uko mwakulukwikala mweŵo eko nakulukwikala naneŵo: aŵakwaŵenu ŵakalukuli ŵakwaŵesu; nakaŵili ŵaLesa ŵenu ŵakalukuli niŵaLesa ŵanji:

¹⁷ uko mukafwila, eko ŋkafwila neŵo, nakoko kaŵili ŋkasikwa: ŵaYawe ŵakanjipaye nekumpela-po naumbi umulandu peulu, kani pakalukuli icakutulekanya icitacili ceŵo camfwa.

¹⁸ Lomba, pakuŵona ati alikosesye umutima ati ŋkave nenu, Naomi walilekele ukulaŵila kuli ye.

¹⁹ Fyopele'fyo kaŵenda ŵoŵilo, kaŵafika kuBetelemi. Popele apo lomba, ili ŵaficile kuBetelemi, aŵamumusi ŵonse ŵaliŵomfwile ukusaŋgalala, nekulaŵila ati: Kani niNaomi uyu?

²⁰ Naye walilaŵile kuli ŵo ati: Mwinjilika ati niNaomi, munjilike ati niMala; pakuti ŵaLesa aŵaMakosa Onse ŵancitila ukuŋkatasyo'kwakuti.

²¹ Nalifumine pano naliiswile, lomba ŵaYawe ŵambwesesya kwesu ndi cisokololwa; mbanindo mulukunjilicila ati niNaomi, pakuti ŵaYawe ŵansinina, aŵaMakosa Onse ŵampensya.

²² Fyopele'fyo kaabwela Naomi, pamo naLufi umwanakasi umuMoabi, umulokasi wakwe, uwafumine mucalo caMoabi; naŵo ŵaliisile kuBetelemi pampindi yakutatiko'kuteŵula amabali.