HEBRU 1 - Biahrai Tha Zyphe rei

Vaiming navy tah Sawcapaw alai vy

¹ Cai a sei ciapaw leco Khazing tah a khuavang sahlo khah hmang he ka, khuahlai a ma pathlahtu sahlo hai lekhei uihlupui a phingphing khei bia a za rei tei.

² Canghrasala atochai cai hning caipaw lehei co, a Sawcapaw hmang tah kaaning khatah bia a rei. Ama cawh zezong vytei ry cytu ruapaw tah thingpaw a cang. Ama thongtah alui le avai le zezong vytei heh tuapaw a cang.

³ Sawcapaw cawh Khazing rungnawnah khainah cang ka, Khazing cangnah a palangsahtu hmuisuipaw a cang. A bia thawtlungná tah zezong vytei khah a tlechui. Suanah vytei pathaisahnah a tua khy taitah vaicung letah Cungnungcai cacang lang letah a ty.

⁴ Macawtaco Khazing Sawcapaw cawh vaiming sahlo cypaw navy tah a rungnaw vypaw ming a cytu a cangpaw hratah vaiming sahlo navy tah a rungnaw vy sylypaw a cang.

⁵ Zemaw tah pawco Khazing tah a vaiming sahlo khah ahomaw, “Nama cawh ka Sawcapaw cang ceh ka, atoning heh na Paw ka cang myca,” tatah a tah bang? Taico, “Kama cawh a Paw cang neh ka, Ama cawh ka Sawcapaw a cang a,” tatah tah bang hrah be.

⁶ Mataico, Khazing tah a sa-uthui khah khazaw letah a za thlaw ning tah, “Khazing vaiming vytei tah beh he seh,” a tah.

⁷ Mataico vaiming sahlo kong leco, “Ama taco a vaiming sahlo cawh thli tah tua he ka, a raihretu sahlo cawh melui tah a tua he,” tatah a rei.

⁸ Canghrasala, Sawcapaw kong leco, “Vy Khazing, na buidyching cawh chaizaw tah chaizaw tai a hming a, dingnah cawh na painah cungcahrei a cang a.

⁹ Dingnah cawh du ceh ka, chahlynah cawh na hua, macawtaco Khazing, na Khazing tah alawngnah sathy ca thu ka, na vesaw sahlo navy tah a ca pasang vy,” tatah a tah.

¹⁰ Mataico, “Vy Abuipaw, athoning tah Nama tah alui a pahnianah cawh tua ceh ka, avai kheh na kih chuh a cang.

¹¹ Ma sahlo cawh a rawh thlu he ka, canghrasala Nama cawh na hming paria a, ma sahlo vytei cawh chaichi hratah a cai thlu he.

¹² Taico angki pasuapaw hratah pabi he ceh ka, chaichi hratah a thlai thlu tae he. Canghrasala Nama cawh chaizaw tah Nama ialia cang ceh ka, na kungkhua zong chang thai beh,” tatah a tah.

¹³ Canghrasala Khazing tah a vaiming sahlo khah ahomaw, “Na caraepaw cawh na pherai letah ka chiahlai vytei ka cacang lang hei a ty tua,” tatah a tah bang he?

¹⁴ Canghrasala vaiming sahlo cawh Khazing a raihretu longlong a cang he. Pachahnah a tingpaw cawngsaw sahlo bawkhang pawtah Khazing taitah tawpaw thlary a cang he.