Sofonías 3 - Be'nnka'be Xti'll Dios

Daxhinj ka' ben Jerusalén'na

¹ Niachraz ke Jerusalén'na, dan naken yell xhen wednay, da nak bziw, na da bsakzi yell ka' yela.

² Bi bzenayen xtill Xanllon, na bi wenlen yeyon nez, na bi bxenlallen Xanllon, na bi bayirjen Dios ke'en.

³ Xan ake' ka' llusia ake' ka' bell yixe, na be'nn ka' llun yel korchisen llun ake' ke bekw yiw lla'a latj dach yubill, le akban bill llkoan akba da gaw akba bateyure.

⁴ Be'nn ka' llayixjwe di'llen, nak ake' be'nn wednay, na bigak wxenlall aklloe, na bxus ke ake' ka' llrajchekw ake' lo yodao xhirallen, na bi llun ake' kan nyoj llwa xtill Xanllon.

⁵ Axha Xanllon zoe'e yell xhen'na, le'e llune dawen, na bi llune da mar. Gatga zu ni tzir bi llune kan nak yel korchis ke'en. Axha be'nn wen daxhinjen nike nombiesre yel sdon.

⁶ Xanllon ne: Blleyia latj yell-liw ake', na bachinja ze sib gan lljakoa be'nn ka' llajtap, na bantacha raw tnez ke ake' ka', na nullno be'nn sjada rawen. Yell xhen ke ake' ka' ba badachen, ni tichgaze be'nn bill zu rawen.

⁷ Bena xbab: Konen ka' Jerusalén'na wzenayen kia, na gu'n ake' latj yego ake' nez, na, konen ka' bi wlleyia lo yo' rill aken, kanake ba bsakzia le aken. Axha le aken biub'do akre ben ake' yoyte daxhinj.

⁸ Kelen'na le kwexh nada' llan yeda wadsakzia re'. Nada', Xanle, ba bnia ka': Ba bachuyralla watupa yoyte be'nn wnebia ka' sjalla latj yell-liw ka', nench'na wsana yel llaklla kian, na rente yel llruk kian. Na wzeya dokenak yell-li'on ke nake ba bchare nada' kwis.

⁹ Keten llin llan gak ka', guna nench'na yoyte yell ka' wne' ake' di'll barane', nench'na gak walwill ake' nada', na yoy akte gun ake' xchina.

¹⁰ Yechla yeo ka' nbane Etiopían, yell kian naslasen yed ake' wadyenyiach ake', na yedwa ake' da werao ake' nada'.

¹¹ Ke lla'na yell kia, bill wayero ke ni yetich da ka' ba benon, dan guko wednayen, nallen waka radjren be'nn ka' llunxhen kwin, na be'nn yarall ka', na chras bill wruero yel yarall ko'on raw ya' xhirall kian.

¹² Nada' wakoan'rena rwe' be'nn nexjrall ake', na be'nn xendaze, na wzoa ake' yel nxenlall ke aken konen nada',

¹³ Be'nn ka' bagan ye to chop yell ke Israelen, bi gun ake' daxhinj, na bine' ake' di'll wxhiye, na bi we ake' di'll wenlalle. Na gat da yaj gaw ake', na wazirall ake', na nutno wcheb le ake'.

Llul ake' yel llawe ke yell xhen ke Jerusalén'na

¹⁴ Le gul, re' sjalla yell gan nzi Sión. Le gusia, na le yawe yell Israel. Bawere, Jerusalén, bawere do yichj dorallo.

¹⁵ Xanllon ba bake'e dan bdichjbie'e dan gak ko'o rwe', na ba bakoase'e kale be'nn ka' llwiere rwen. Xanllon, llnebia Israelen zurene rwe' txhen: Na biteze da mar za' bi sueren wcheben rwe'.

¹⁶ Na ke lla'na ye ake' Jerusalén'na: Bi llebo, Sión, bi weo latj ke tako ka' gatzin.

¹⁷ Xano Diozen zerene rwe', Le'en nape'e yelwak xhen, na wazre'e rwe'. Xanllon soe'e wawere kan lluno rwe'. Konen yel nllie kena gune' rwe' yelnban kub, na gan zajze llaweren, na gule'e.

¹⁸ Ke to lla ga llak lni'. Kin ne Xanllon: Nada' wazra rwe' raw da maren llcheb rwen, na yel zdon nraj'chekw rwen.

Kan ba'bi be'nn ka' bchach ake' raw yellen

¹⁹ Katen llin lla'na, wayechja yoyte be'nn ka' llsakzi rwe'. Na wasra'a be'nn ka' bi llak za wen, na watupa be'nn ka' ba bniten, na gunxhen ake' re', na gakre be'nn braw, raw doxhente yell-li'on, ke nake dan ba bxhakziren.

²⁰ Na keten ba bllin llan wadxhia re', wadtupa re', na wayonlaya re', na guna ka' se ke re', na gap ake' re' baran raw yoyte be'nn yell ka' sjalla raw yell-li'on. Nada' Xanle ba bnia ka'.