Oseas 1 - Be'nnka'be Xti'll Dios

¹ Diozen be diꞌll ni be'nnen gulle'e Oseas xhi'nn Beerí, kan llnebia Ozías, Jotam, Ahaz na Ezequíazen yellen nzi Judá, na kan llnebia Jeroboam xhi'nn Joás, yell Israelen.

Xhi'nn xhor Oseazen

² Ki bzuraw Xanllon di'llen llenle'e chixjoe Oseazen: Israelen ba benee ka to nor ree, na ba bsanlalle nada'. Leskakse rwe' biaj na bxhi to nor ree, bzurene na blla xhi'nno konen le'e, na konen ka gak akbe xhi'nn to nor ree.

³ Bxhi Oseazen to nor nzi Gomér, xhi'nn be'nnen nzi Diblaim, na nor ni bxhane to xhi'nn Oseazen.

⁴ Natell Xanllon gulle'e Oseazen: Bsi bidao biew ko'on Jezreel, le yeratze yallj nench'na wsakzia xhi'nn xhasoa be'nn wnebian nzi Jehú, ni ke llen'na brarje'e yell Jezreelen, na konen ka wchuya yel llnebia ke Israelen.

⁵ Ka lla'na, wchochj wlana yel-llnebia ke Israelen rachen nbane Jezrelen.

⁶ Bayua nor ke Oseazen to bda'o dayubre, na bzu to bidao nor ke'e. Na Xanllon gulle'e Oseazen: Bsi ra bidao nor ko'on Lo-ruhama le bill wayachralla Israelen dayubre. Bill wazixhena ke ake'.

⁷ Axha wayachralla be'nn ka' sjalla gan nbane Judán, nadksa, Xan ake', Dios ke ake', wasra le ake'. Axha bi wasra le ake' konen wdil, billtien gunrena llin xhis waxiten, ni spad, ni kabay ake', ni be'nn ka' llbia kull kabay ka'.

⁸ Kan bill llwalle'e xhi'nne bin nzi Lo-ruhama, bayoa Gomeren to bda'o dayubre, na bzu to xhi'nne bidao biew.

⁹ Natell Xanllon gulle'e Oseazen, bsi ra bidao bieꞌon Lo-ami, le re' bill nakre yell kia, ni nada' bill naka Dios ke re'.

Bayo xneze ke yell Israelen

¹⁰ 10 (2.1) Llin to lla be'nn Israelitas ka' chan ake', na gak ake' ke yuxh da sjanit lloa nista'on, nutno llak wllix len, na nutno llak wrab len. Na loraz da ye le ake': Re' bill nakre yell kia, Diozen ye'e re': Re' nakre xhi'nn Dios ban'na.

¹¹ 11 (2.2) Natell wadup be'nn ka' lla Judán, na beꞌnn kaꞌ sjalla Israelen, na wzoa ake' tuz beꞌnn braw raw yell ke aken, na gateze sjalla ake' wayed ake' na wadup ake' Jerusalén'na. To lla xhen gak lla ke Jezreelen.