Jonás 1 - Be'nnka'be Xti'll Dios

Jonázen llxhonjre Xanllon

¹ Xanllon balwille Jonázen, beꞌnnen nak xhiꞌnn Amitai, na gulle'e leꞌe:

² Bzolla biaj yell xhen'na nzi Nínive, na bzen akre nada' wlleyian, le daxhinjen llun aken ba braꞌn gan zia nite.

³ Na Jonázen loraz da wzenaye, na gukralle'e wxhonjre Xanllon, na zajze'e gan lloj na gan llallin barkw ka' gan nzi Jope, gana' jadire to barkw da le dllojte da zajze Tarsis, na bdixhjeꞌe nench'na byepeꞌe lo barkon.

⁴ Axha Xanllon bzaleꞌe to be xhen lo nista'on, na byias nista'on, na llebraz btanen barkon to llunen ke da wxhoxjtin len.

⁵ Na beꞌnn kaꞌ nsa barkon llebraz blleb ake' to gakre gun ake' llak, toaj'toaj ake' balwill ake' diozen nxenlall aken. Na bzal ake' lo nista'on daziꞌ kaꞌ noa barkon nench'na bayaken lladize. Na Jonázen betjeꞌe xhante lo barkon, na jatasxene.

⁶ Na beꞌnnen yo' rallna barkon jabiyeꞌe kwit Jonázen, na gulle'e leꞌe: ¿Gakre llonlizo deꞌo ta'son? Biaskero. Balwill Dios koꞌon, bi wayachrallrize lliw nench'na bi kweyiꞌllo.

⁷ Na beꞌnn kaꞌ nsa barkon lle loellj ake': ―Wiechkllo konen yajda'o ki noxhallonꞌ nap dol, na wroeꞌrawe dan llune lliw ki, llenen' wlleyin lliw. Na kaꞌ ben ake', na' konen yajda'o ka' bnes akre ke xtol Jonáznan llalleyraw ake'.

⁸ Na bnab akre leꞌe: ―Bnechk noxhan nap dol, na bixhchen llak kello da kenxhie ni. ¿Bi llin lluno? Gare zaꞌo? ¿Gare nak rallo? ¿Gaxha beꞌnn rwe'?

⁹ Na Jonázen ballie'e xtiꞌll aken, lle'e le ake': ―Nada' naka beꞌnn hebreo, na lloerawa Xanllon, Diozen zu le yeba, le'e benee nista'on, na yell-liw.

^10-11 Na ke benee beꞌnn kaꞌ nsa barkon, ke diꞌllen lloen, yezikre blleb ake', le kwinksen ba beꞌe diꞌllen kan llxhonjre Xanllon, na gull ake' leꞌe: ―¿Bixhchen ba beno kaꞌ? Na nista'on zajzeze llasen yezikre, na gull ake' leꞌe: ¿Bixha guneto rwe' nench'na kwexh nista'on, na kweꞌllin?

¹² Na gulle'e le ake': Le gox nada', na le wzal nada' lo nista'on nench'na kweꞌllin. Nada' nezra kwasru ke ni kia nadan ba bias nista'on.

¹³ Na beꞌnn kaꞌ nsa barkon bzo be ake' ll‑lliꞌy ake' barkon lloa nista'on. Axha bi guk kan llen akren le llebrazen llun nista'on.

¹⁴ Na balwill ake' Xanllon lle ake' Leꞌe: ―Bi guno' latj kweyito nike xtol beꞌnn ni, na cha beꞌnn ni nake beꞌnn wen dalixhej, bi wxoao dol ke yel gut ke'en kullto, le rwen Xanto lluno kon ke llazrallo.

¹⁵ To bayullze bnee ake' kan, le bzal akte Jonázen lo nista'on, na le bllellite nista'on.

¹⁶ Na ke bre beꞌnn kaꞌ nsa barkon kan ba guken, llebraz bdap ake' baran Xanllon, na beraw ake' Leꞌe, na bchab ake' biteze rawen da gun ake'.

¹⁷ 17 (2.1) Na Xanllon bsele'e to bel xhen, nench'na bdeb'ba Jonázen. Chonn lla chonn yere, byo Jonázen lo le bel xhen na.