Daniel 9 - Be'nnka'be Xti'll Dios

Danielen bnabe'e ke be'nn yell ke'en raw Diozen

¹ Darío, xhi'nn be'nnen nzi Asuero, be'nnen zu latj yell-li'on nzi medos, llnebie'e be'nn caldeos ka'.

² Iz nell kan llnebien, nada' Daniel, llseda gan nyoj xtill be'nnen bayixjwe xtill Diozen nzi Jeremías, gan llwen di'll ke wyon chi iz kan sakzi Jerusalén'na, ko'on kan gull Xanllon be'nnen llayixjwe xtillen.

³ Na berena Xanllon di'll, na gutyoere, na bena was, na guka rall zech, na boasja de yichjrawa.

⁴ Berena Xana Diozen di'll, na bxoarapa: Xana, Dios nap doxhente yelwak, na rwe' llelarawo yoyte da ka' ba bchebo gunon, na llroero yel nllie ko'on kone be'nn ka' nllie rwen, na llelaraw akte ke da ka' ba bdichjbiaon,

⁵ ba bxinjto, na ba bento damar, na ba bzuto, na bine' wzoa yichjto rwe', na ba bsanlallto dan ba nlliabia'on, na da ka' ba bdichjbiaon.

⁶ Bine' gunto kwent be'nn wen llin ko'o ka' be'nn ka' llayixjwe llwa xtillon, na ba bne'e ake' rawrazo kone be'nn ka' llnebian, na kone be'nn korchis ka', na xustawto ka', na yoyte be'nn yell Israelen.

⁷ Rwe' Xana, nako be'nn wen dalixhej, axha neto' be'nn Judíos wa llayereto, na be'nn ka' sjalla Jerusalén, na leska be'nn Israel ka' yela, be'nn ka' sjalla gawchochze, na be'nn ka' sjalla zit, be'nn ka' bchacho yell kanaken bayechj ake' rwe'.

⁸ Neto', Xanto, na kakse be'nn wnebia keto ka', na xhi'nn be'nn wnebia ka', na xustawto ka', ba nazjto yelsdon le ba bxinjto kone rwe'.

⁹ Axha rwe' Dios keto, rwen yow yel llayachrallen na llazixheno. Lakse neto' ba bxinjto kone rwe',

¹⁰ na bine' wzenayto ko'o, Xanto, na Dios keto, na bine' wzenayto da ka' broe bsedro neto' kone be'nn wen llin ko'o ka', be'nn ka' llayixjwe llwa xtillon.

¹¹ Yoyte be'nn Israel ka' bi bzenay ake' da ka' broe bsedron, na bi wen akre gun ake' kan ba bdixjweron, kelen'na ba badta de'n neto', na da ka' llsakzi da ka' nyoj dan bchajlla Moisésen, be'nn wen llin ko'on, le ba bxinjto kone rwe'.

¹² Rwe', balarao dan bchebo guno kone neto', na kone be'nn ka' bnebia neton kan bselo to da nxhullraz xhen, le chras bine' gak raw yell-li'on da sakreb ke yel llsakzin dan baguk Jerusalén'na.

¹³ Doxhente damaren ba badtan neto', doxhente kan nak di'll ka' bdichjbia Moisésen, axha neto' bine' wayirjto rwe', Xanto Dios, na nike ne' wsanlallsto damar keto ka', na nike ne' nawsto dalixhej ko'on.

¹⁴ Kelen'na Xanto ba bselo kone neto' damaren ba nuno xniden, le rwe' Xanto, na Dios keto nako be'nn wendalixhej raw yoyte da ka' llunon, axha neto' bi weneto wzenayto ko'o rwe'.

¹⁵ Xanto Dios, rwe' broero neto' yelwak xhen ko'on kanake babejo be'nn yell ko'on Egipton, na benxheno ra'on kan batnate xte na' lla, axha neto' ba bxinjto, na ba bento damar.

¹⁶ Xanto, nezeto ke nako be'nn llayachrall. Ben gukre baka yel llaklla, na yel llruk ko'on raw Jerusalén'na, le len'na nak yell xhen ko'o rwe', ya' xhirall ko'on. Yoyte be'nn yell wrill ka' lltitj akre Jerusalén'na na be'nn yell ko'o ka', xtol daxhinj keto ka', na xtol xustawto ka'.

¹⁷ Dios keto, bzenay xtillto ka', na kan llatyoe be'nn wen llin ko'on rwen, bwiachga kone yelnllie ko'on katk niachrazen ba bagan yodao ko'on.

¹⁸ Bzenaychga Dios kia, na bwiayian katk dazeden de keton, na yell xhen gan llalwillto rwen. Llatyoeto rwe', kere dan llaketo nakto be'nn wen'na, axha llatyoeto rwe' nike yel llayachrall ko'on.

¹⁹ Xanto, Xanto, bzenaychga, na bxhixhen keto. Bzeninachga neto', Xanto, na da nench gakreno neto'. Niko rwe' Dios kia, na nike yell xhen, na yell ko'on llalwill rwen, bi lliero.

Da ka' zegak ke wyon chi xman ka'

²⁰ Nada' bzerawa llwa di'llen, na llxoarapa daxhinj kia ka', na daxhinj ke be'nn yell kia Israelen, na llnaba gukre raw Xana Dios kian ke raw ya' xhirall ke'en.

²¹ Ne' llwerentia Diozen di'llen, ket zado ankl Gabrielen, le le'en bredawra kan najnase, na bede'e badse gan zian. Le ke hor'nan llajraw Diozen, na naken tllele keten llut ake' bayix ake'.

²² Na gulle'e nada': Daniel, za nench wzajniera rwe' kan nak da ka'.

²³ Kan bzuraw llweo di'llen, Diozen le ballite xtillon. Na nada' za wallia kedan ba bnabon, le Diozen nlliere rwe' kwis. Na bzenayian kan yepa rwen nench chejniero dan ba bredawron:

²⁴ Keten ba bde gak wyon chi xman ka' raw yell ko'on, na yell xhen xhirall ko'on nench chuy dan llsakzin, na chuy daxhinjen, nench gat yel wxhixhen ke damaren nench suraw gak yel korchis dan sibia ke chnare, nench gak ke dan bredawron, na gak ke dan ba nachjbian, na wayaklay gan nak latj xhirallen.

²⁵ Llayal nezro na chejniero dani: Keten suraw ne' ake' wayakchao, na wayun ake' Jerusalén'na, llinte lla yed be'nn wnebian nak xhirallen, llayal te gall xman ka', na tnez ka', na ze xhen ka' bayakchao ke Jerusalén'na sibian wyon chop xman ka', axha gaken tiemp da suyiach ake' daxhen.

²⁶ Ket ba bde wyon chop xman'na waka ake' yelnban ke be'nn wnebian nak xhirallen. Jerusalén, na yoda'on wayinj aken nike be'nn yell ke be'nn wnebian ze zan. Keten baza wayullen, yeden tosetegaze keto ga llabia nis, xte wayullte gak wdilen, na da lleyin da ka' banak zi gaken.

²⁷ Raw xman'na xhoa yeto, le'e wchajlle'e to di'll kone be'nn zan, na radj xman'na wchuye ke dan llut ake' bayix ka' gan llwerao aken, na dan llazarall aken. Na gun ake' daxhinj xhen na wtitj akre gan nak latj xhirall gan llut ake' bayix ka', xte llinte lla gak dan wlleyin na llajta da nxhollrazen raw be'nnen bxe da zban ka'.