Daniel 8 - Be'nnka'be Xti'll Dios

Bredawre xhir yay na chib

¹ Da wyone yiz kan llnebia Belsasar'na, nada' Daniel, bredawra yeto, llakze kere da ka' brera yela.

² Na dan bredawran llroen zoa yell xhen'na nzi Susa, na dani llnebian yell ke Elam, dan zu llwa yeo ke gan nzi Ulai.

³ Bixha ke balisa yajrawa ka', brera to xhir yay, na zu chop luzba da ton ake', na zeba llwa yeon. Na zu chop luzba da ton ake', axha to len'na ze bzuren, na nlliwtellen kerke dan yeton.

⁴ Na xhir yayen gukdilremba be'nn ka' sjalla kezake gan llen willen, na be'nn ka' sjalla ralen, na be'nn ka' sjalla du llelre, na nutno bayix yubre zake gakdilren leba, na nutno zake wara dan llsakziban. Llumba ko'on da lleneba, na zajze llakba ba warlle.

⁵ Nezetia lluna xbab dan ba breran, ket gukbera zado rres yeto chib ba blloj gan llayo willen, na nike llrajsba raw yu. Na chib ni zu to luzba xhen radj yejraoba ka',

⁶ na ke bllinba gawchoch gan ze xhir yayen zu chop luzen ban brera ze gawchoch gan de yeon, na gukdilremba leba llebraz

⁷ na bdichjteba lloplate luzba ka', na nike bi gukze gun xhir yayen. Natell chiben bzalba xhir yayen raw yu, na brajchekwba leba, na nike nu gukze wasra leba.

⁸ Na chiben zajzelle llakba ba war, axha kan ba nakba ba waren guchj luzba tone'n, na le ballojte rawraze'e ye tap luzba, na llwia aken daplate.

⁹ Na raw to luzban blloj yeto luzba da nak dadao, na blliw yelwak keban, na bllirjen llelre, na gan llra' willen, na gan de yell-liw cha'on.

¹⁰ Na llebraz blliw yelwak ken bllinten gukdilne'ren waka ya ka' sjalla le yeban, na baxhexjen to kwen berj ka' raw yu, na brajchekon le aken,

¹¹ na leska gudyiba kwinkse xan waka ya ka', na bllunen bill we ake' dan llazarall ake' yew lla xan waka ya ka', na btitjre latj gan llwerao aken.

¹² Na benee damar kwis kanake jalle'e waka ya ke'e ka' latj gan llwerao aken, na bzale'e kale dan nak dalixhejen. Na benen ko'on ka' llenlen, na raw yoyten bllojen wen.

¹³ Natell benla to anklen bnabre yeto anklen. ¿Batxha zeraw wayull dan llwello llak gan llwerao ake' yew llan cha'? ¿Arke sibieze daxhinj zban'na llun ake' latj xhirall ke Xanllon, na be'nn ka' nxenlall le'en, na dan llzakzi aken?

¹⁴ Na anklen ballie'e xtillen: Xte ket tell gak chop mir chonn gayoa lle, na tsir ake'. Kenatell latj xhirallen wayaken yall.

¹⁵ Na nada' Daniel, zeyana' llwia ke dan llredawran, na lluna xbab bixhan llenen ne'n, ket to setegaze badse to da nak ke to be'nn nach kwitan,

¹⁶ na benla to chi be'nn nach da za llwa yeon nzi Ulai, na bnen: Gabriel, bzejnie be'nn nachen kan nak dan ba bredawren.

¹⁷ Natell le'en badse gawchoch kwitan. Nada' llebraz blleba, na bchekw xhiba bllinte rawxgan raw yu, axha le'en gulle'e nada'. Xhi'nn be'nn nach, bzoa dan ba bredawron lo yichjo, le dani gak ket baza wayull yell-li'on.

¹⁸ Na nezete'e llwerene nada' di'llen ket bxhin bich kia, na to byialza raw yu, axha le'en bdane nada', na benee nench bazella dayubre

¹⁹ na gulle'e nada': Wzejniekera rwe' kan gak ket wayull yel llruk ke Diozen, dan bredawron llroen kan gak ket wayull yell-li'on.

²⁰ Xhir yayen ban zu chop luzen, llroen ke chop be'nn ka' llnebia latj gan nzi Media, na Persia.

²¹ Chiben naken be'nnen llnebia gan nzi Grecia, na lus xhen'na dan zu radj yajrao ka', naken be'nn nell be'nn wnebian.

²² Na tap lus ka' blloj kanake guchj lus nellen, llroen ke latj yell-li'on dlloj ye tap be'nn wnebia ake', axha bi gaktk yelwaken ke danellen.

²³ Na ket wayull wnebia be'nn ki, na damaren ba blli'on ga zerawze, to be'nn wnebia wednayen, na nezyianre kwasru akre gunee wxoayaye, na le'e wlane yelwaken.

²⁴ Na zajzeze chiw yelwaken, axha kere kone kwin yelwaken napen, na wlleyie'e gazerawze na gunte gan raw yoyte da ka' gunen. Wlleyie'e yoyte be'nn war ka' sjanap yelwaken na lekse ka' be'nn ka' sjanak be'nn yell ke Diozen.

²⁵ Na kone dan wxoayayen, da wxhiye ke'e ka' gunten gan. Na wayake be'nn yarall, na be'nn zan be'nn ka' nxenlall le'en to goxreze le ake', na gute'e le ake'. Na gakdilrene xhi'nn be'nnen llnebian, axha bi sakre le'e, lere kweyi.

²⁶ Na da ka' bredawro tllele ka', na tsir ka' ba bazakron, na sjanaken dalixhej, axha rwe' nutno wzenlon, brochaon lo raxhdao, le daki aken ket ba bde daxhen tiemp.

²⁷ Nada' Daniel, to gutzi'za, na zan lla guka yillwe. Bdena bayiasa, na bzerawa llalarawa dazed ke be'nn wnebian. Axha llebraz zoa dazed ke naken bredawra da ka', le bi llejnieyanla kan nak aken'na.