Daniel 7 - Be'nnka'be Xti'll Dios

Danielen bne're yere

¹ To lle, iz nell kan llnebia Belsasar gan nzi Babilonia, Danielen bne're yer, na bredawre. Na ke babanen, na bzoje'e da braw ka' bne're yeren. Na kin nak dan bzojen:

² Nada' brera raw yer kian daplate da ben, na lltane'n nistao xhen'na.

³ Na to setegaze blloj lo nista'on tap bayix xhen ba binka raz yichjraw akba, na nlla nllate nak toaj toaj akba.

⁴ Ba nellen nakba ke walle bell yix, axha zu xirba kan nak ke ban nzi bsia. Na llakte zia llwiaban, blall akba xirban, balis akba leba raw yun, na bzella akba leba kone niaba ka' zu trase, na bzella akba leba ke to be'nn nach, na yichj raxhdaoban guken ke to ke be'nn nach.

⁵ Ba wllopen nakba ke walle ban nzi oso, axha tola leban nlliwllen kerke dan yechlan. Na nyinteba chon llit lcho, na benla lle akba leba: Bdaw yoyte ber gak gawo.

⁶ Ba wyonen nakba ke walle ban nzi leopardo, axha kullban zun tapla xirba, na lekse ka' brera zu tap yichjba, na bani guk rallnaba yelwaken.

⁷ Na ba wdape bayix ban bi nxhie yichjrawen bredawran nakba llichnieraz, nakba zbanda, na llebraz war nakba. Layba ka' sjanaken de yan nzi hierro, yoyte da sjade lleb'ba, na llxhoxjba, na llrajchekwteba da ka' llagan keten llawban. Nllatekse nakba kerke ba ka' brera yela raw yer kian, na zu chi luzba le yichjban.

⁸ Na llakte zia llwia luzba ka', brera blloj yeto luzba da nak dadao, na blall akba chonn luzban, nench'na got latj bzu dan ze bran, na nak yejrawban kan nak ke be'nn nach, na zute llwe, na to llne'e lan.

Yel korchis ke Dios

⁹ Na bzerawa bwia xte bllinte bzoa ake' to chop ga kwe ake' wnebia ake', na to be'nn gur bllie'e. Na xharanen naken llich kakse beye, na yich yichjen naken llich kan nak yich xha xhir. Gan llie'e llnebien nsaten da rul da llalnin,

¹⁰ na to yeo da llalnin bllojen gan zie'en. Mire be'nn ka' llun xchinen, na miyone be'nn ka' zella ake' kwiten. Na bzuraw llak yel korchisen, na biarj gan nyoj di'll ka'.

¹¹ Na bzia bwechicha kan llun lus dan nachen bzuraw llne'lan, na llakte zia llwian, bet ake' bayix ban nun yichjraw zbandan, na bxhoxjtin akteba. Natell bzal akeba lo yi'n nench'na byeyba.

¹² Na lekse ka' baga yelwaken nap bayix ka' binka raz yichjraw akban, axha be ake' latj gut yelnban ke akba xte llinte hor kweyi akba.

¹³ Na bzerawa llwia ke da ka' llredawran ke lle nakse. Axha to setegaze: Brera za lo bej ka' to da nak ke xhi'nn be'nn nach, na le'e zaje'e gan lli be'nn guren, na gull ake' le'e lljase'e gawchoch gan zie'en.

¹⁴ Na be ake' le'e yelwak, yel barane', na yel llnebia, na yoyte be'nn sjalla raw doxhente latj yell-liw, na be'nn llne'e biteze di'll llzenina ake' le'e. Yelwak ke'en ke chnare sibian, na gan llnebien chras bi kweyin.

¹⁵ Nada', Daniel, blleba kwis. Na gukzedra kanake da ka' ba breran

¹⁶ na jabiya gawchoch kwit to be'nn ka' ze gana', na bnabra le'e nench wzajniere nada' yoyte da ka'. Na le'e bchebe'e wzajniere nada', na gulle'e nada':

¹⁷ Tap bayix ki binka raz yichjraw akban, nak aken tap be'nn llnebia, na wnebia ake' raw doxhente yell-liw.

¹⁸ Axha ket wayull wnebia aken, yel llnebian wayaken rallna be'nn yell xhirall ke Diozen, na gaken ke ake' ke chnare.

¹⁹ Na lekse ka' nada' bzeralla nezra bixhan llene ne'n ke ba wdape bayixen binka raz yichjraoban, le nakba nllare kerke ba ka' yela, le zbanda nak yichjraoban. Nak layban de ya dan nzi hierro, na xoyban naken de ya dan nzi bronce, yoyte da sjade lleb'ba na llxhoxjtimba, na llrajchekwba da ka' llagane'n.

²⁰ Na lekse ka' bnaba dan zajzu chi luzban, na lus dan nak da da'on zute yaj rawen, na llwe dan llebraz llne'lan, ko'on ke llunen na' naktellen dalliwlle kerke lus ka' yela, na wexj chonn lus ka' nench'na be aken latj bzu len'na.

²¹ Na brera ke lus ni llakdilrenen be'nn yell ke Diozen, na llunten le ake' gan,

²² xte ke bllin be'nn guren, na benee yel korchis ke be'nn yell ke Diozen llia le yeban, le ba bllin tiemp nench be'nn yell ke Diozen kwe ake' wnebia ake'.

²³ Na bne'e: Ba wdape bayixen binka raz yichjra'on aken da wdape da wnebia raw doxhente yell-liw, na naken to da guntekse nllare kerke da ka' yela. Cheben yoyte da sjade raw yell-liw, wrajchekon len, na wlleyin len.

²⁴ Chi lus ka', llroen naken chi be'nn wnebia ka' na wnebia ake' raw yell-li'on. Natell ket ba bayull bnebia le aken, na chep yetoe wnebie'e na gunee nllare kerke be'nn ka' bnebia danellen na wlleyie'e chonn be'nn wnebia ka'.

²⁵ Gadie'e Diozen llia le yeban na gakdilrene be'nn yell ke'en, gunee xbab wache ke dan ba bdichjbia Diozen, na lni' ka' naw ake' llun aken, na be'nn yell ke Diozen wnebie'e le ake' raw chonn iz ye gachj.

²⁶ Axha be'nn wnebia'na gak yel korchis ke'e, na yega yelwak ke'en na du kanake kweyi.

²⁷ Na yel llnebian, na yelwaken raw yoyte da ka' llnebia raw yell-li'on wayaken rallna be'nn yell ke Diozen llia le yeban. Na yel llnebian sibian ke chnare na yoyte yell ka' sjalla raw yell-li'on wzenina ake' le'e, na wzenay ake' ke'e.

²⁸ Gani' llayull ke dan bredawran. Nada' Daniel, llebraz gukzedra, na blleba kwis, axha nutno gulla ke dan ba breran.