Daniel 6 - Be'nnka'be Xti'll Dios

Jazal ake' Danielen gan sjalla bell yix ka'

¹ Be'nn wnebian nzi Darío, braje gayelloa be'nn wnebia yell ka' nbanle latj yell-liw gan llnebien.

² Na braje chonn be'nn se raw yoyte be'nn wnebia ka' seren yell ka' nench'na wade ake' kwent raw le'e, na bigun akre zed be'nnen llnebian, na to be'nn kin nak Danielen,

³ na Danielen to setegaze broere ke naplle'e yel sin kerke be'nn wnebia ka' yela, na kelen'na be'nnen llnebian benee xbab wzoe'e le'e kwe'e xneze latj yell-liw gan llie'e llnebien.

⁴ Na be'nn ka' llnebia yell ka' bayirj ake' gare ba bxinj Danielen, axha be'nn ni nake'e be'nn de baran na bitbi dol de da wxoa ake' kulle'e.

⁵ Axha bnao akse bayirj ake' akre gun ake', na bnee ake': Bitbi dol de da wxoallo kull Danielen, axha de to da gunllo ke dan nawe'e llunee ke dan nxenlallen.

⁶ Na be'nn ka' llgu xneze yell ka', na be'nn ka' llnebian ben ake' tuze di'll nench beren ake' di'll be'nn wnebian nzi Darío, na ke bllin ake' gan llie'e llnebien, na gull ake' le'e: —Suchga be'nn wnebian ke chnare.

⁷ Ba badup ballay neto' llguto xneze yoyte yell ka' nbanle latj yell-liw gan llnebia'on, na ba be'to di'll, nench chichjbiaw to di'll da ne'en ke raw chilloa lla, nutno gak walwille'e dios yub akre, na ni be'nn nach, zerawze tuze rwe'. Na be'nnen bi wzenayen, na lljazal ake' le ake' gan sjalla bell yix ka'.

⁸ Cha rwe' ba bchicho dan sey, nutno gak wacha len, le kan ba bdichjbia be'nn medos ka', na be'nn persas ka'.

⁹ Na be'nn wnebian nzi Daríon bchiche sey dan ba bdichjbia aken.

¹⁰ Bixha ke bnesre Danielen ke di'llen ba bdichjbia aken ba nyichen sey, na bayaje yo' ke'en, na bsarje reij be ka' gan llxhoe lltasen, dan zu gan lloj will dan zu Jerusalén'na, na bchekw xhibe berawe, na berenee Diozen di'll. Chonn las raw tlla llchekw xhibe, kan yorawkse llunen.

¹¹ Na be'nn braw ka' llgu xnezen biaj ake' gan zu yo' ke Danielen, na bre akre le'e nchekw xhibe lloerawe Dios ke'en.

¹² Na le biaj akte jawia ake' be'nn wnebian nench beren ake' le di'll ke dan ba nachjbian. Na gull ake' le'e: —Rwe' ba bdixjwero ke dan ba nachjbian, na gana'n llwen di'll raw chilloa lla, nuteze be'nn walwille'e dios ke'e, na lloerawe be'nn yubre, na bi lloerawe rwe', na lljazal ake' le'e gan sjalla bell yix ka', ¿binaken ka' cha'? —Kan naksen bnee be'nn wnebian—. Na ke dan ba nachjbian llayal yerara'on kan nak dan ba bdichjbia be'nn medos na be'nn persas ka', na nutno gak wacha len.

¹³ Na le aken bzeraw ake' bnee ake': —Daniel be'nnen zanche ake', be'nnen braj ake' yell ke Judán, bi llape rwe' baran, na bi llape baran di'll ka' ba nachjbian, le ba breretoe llchekw xhibe chonn raz raw tlla.

¹⁴ Na ke benee be'nn wnebian ke di'll ki, na bzuyache, na bzuraw bayirje'e akre gunee nench wasre'e Danielen,

¹⁵ Axha be'nn ka' biaj ake' dayubre jase ake' raw be'nn wnebian, na gull ake' le'e: —Rwe' nezro kwasru, kan nak dan ba bdichjbia be'nn medos na persas ka', ni to da ba bchich be'nn wnebian sey nutno gak wacha len.

¹⁶ Na gulle'e be'nn ke'e ka' lljaxi ake' Danielen, na lljazal ake' le'e gan sjalla bell yix ka'. Axha ke zegakre ke dan ba nachjbian, be'nn wnebian gulle'e Danielen: —Dios ko'on llweraon wasrachgue rwe'.

¹⁷ Na kan bayo Danielen gan sjalla bell yix ka', na jaxi ake' to yaj na bda ake' llwa brojen, na be'nn wnebian bchichten sey, na kone sey dan llune'n be'nn ka' llin gan llnebia aken, nench gun ake' ke Danielen ke dan ba nachjbian.

¹⁸ Natell be'nn wnebian zeyaje yo'rao ke'en, na nike bdawze xche jaxhoe jatase, na nike wensre wzenaye wakoell ka', kan nawse llune ket le taste, axha bikse bde bichgal ke'e du yer.

¹⁹ To byenize, le biaste'e, na zajdoe rres gan sjalla bell yix ka'.

²⁰ Na kan baze be'nn wnebian gawchochze to llun chie'en niachraz balwille Danielen, na bnee: —Daniel, rwe' llwerao Dios ban, ¿gukrize Dios ko'on llwerao doyichj dorallo basre rwe' raw bell yix ka' cha'?

²¹ Danielen ballie'e xtillen: —Suchga be'nn wnebian ke chnare.

²² Dios kian bsele'e ankl ke'en nench bseije llwa bell yix ka', nench bitbi ben akeba nada', le Diozen nezre ke bitbi dol napa, na bitbi damar ne'guna kone rwe'.

²³ Na be'nn wnebian bawere kwis, na gulle'e be'nn ke'e ka' babej ake' Danielen gan sjalla bell yix ka'. Na kan babej ake' le'en bitbi we nake'e le bxenlalle Dios ke'en.

²⁴ Natell be'nn wnebian gulle'e be'nn ka' lljaxi ake' be'nn ka' bxoa dol kull Danielen, na jaxiren akte xhor ake' ka', na xhi'nn ake' ka', na jazal ake' le ake' gan sjalla bell yix ka', nike ne' llin'akze xhante ket bell yix ka' jazap akba le ake', na bxhoxjtin akba le ake'.

²⁵ Natell be'nn wnebian nzi Daríon, bzoje'e be'nn ka' sjalla latj yell-li'on, na di'll da llne'e ake' raw doxhente yell-liw, na llwen di'll ki: Zeralla sure wen na gak wen ke re',

²⁶ 26 (27) llnia yoyte be'nn sjalla latj yell-liw gan llnebian gap ake' baran, na wzenay ake' ke Dios ke Danielen. Le le'en nake Dios, na de yelnban ke'e, na zoe ke chnare. Gan llie'e llnebien chras bi kweyin na yelwak ke'en sibian ke chnare.

²⁷ 27 (28) Le'en lladolre, na llasrate'e, le'e llunee da wabanello le yeba, na raw yell-liw. Le'en basre Danielen raw xoy bell yix ka'.

²⁸ 28 (29) Na Danielen bzerawe guke'e be'nn braw kan llnebia Daríon, na kan llnebia Ciro be'nnen llnebia Persia.