Daniel 5 - Be'nnka'be Xti'll Dios

Di'll dan nyoj le ze

¹ Belsasar, be'nnen llnebia Babilonian, benee to lni', na benee yexh to mir be'nn braw ka' sjalla latj yell-li'on, na kan lli ake' llajllaw aken, be'nn wnebian, na be'nn ka' benee yexhen wej ake' daxhen zu ke uvan.

^2-3 Na kan bazull akre zu ke uvan, be'nn wnebian nzi Belsasar gulle'e be'nn wen llin ke'e ka' lljaxi ake' xbin, na yendoj de ya dan nzi oro, na de ya plat dan zanoxh xe'en nzi Nabucodonosor lo yodao ke Jerusalén'na. Jaxi ake' xbin ka' na yendoj ka', na bda aken da wej ake', ka' ben be'nn wnebian, na xhore ka', na nor ke'e ka', na yoyte be'nn ka' bdup gan guk lni'n.

⁴ Yoy akte sjalla ake' llaj ake' zu ke uvan, na llwerao ake' loe lsak ke ake' ka' sjanak de yan nzi oro, ya plat, ya dan nzi bronce, na ya dan nzi hierro, na da sjanak de yay, na da ka' sjanak de yaj.

⁵ Na to setegaze bre akre to tak be'nn llzoje le ze dan nak da llichen, gawchochze gan zajzu kandler ka', na ke brere be'nn wnebian tak be'nnen llzojen,

⁶ to gukze llichtat, na bllebe'e kwis, na bzuraw xhiz doxhente.

⁷ Na bzuraw llunee llakia llalwille'e be'nn walla ka', na be'nn sin ka', na be'nn ka' nsed ke berj ka' sjalla Babilonian, na gulle'e le ake': —Be'nnen wrab dan nyoj le zeen, na ye'e nada' bixhan lleren ne'n, na waka le'e rall da llak xhi'nn be'nn wnebia, na kotia le yenen to bga de yan nzi oro, na wetie'e wnebie'e raw wyone kwen gan llnebian.

⁸ Yoyte be'nn sin ka' llun llin ke be'nn wnebian byo ake' gan sjalla aken, axha chras nutno guk chejnie bidan nyojen, na nutno guk ye be'nn wnebian bixha lleren ne'n.

⁹ Na yezikre blleb be'nn wnebian nzi Belsasar, na to gukze llichtat llwarawen. Na be'nn braw ke'e ka' to benchixhzen le ake', na nike bi gukze gun ake',

¹⁰ axha xna be'nn wnebian, ke benle kan llusia xhi'nnen, na be'nn braw ka' benee yexhen, na bayodoe gan sjalla ake' gan llun ake' lni'n, na bnee: Suchga be'nn wnebian ke chnare. Na bi sue dazed, na bi ake' llichtat,

¹¹ le gan llnebien zu to be'nn yu espíritu ke Dios xhirallen. Kan ne' llnebia xa'on, be'nn ni broere nak lo yichjen yall, na llajniere, na nape yel sin kan sjanak dios ka' yela. Kelen'na xao Nabucodonosor be'nn wnebian bzoe'e be'nn ni guke'e xan be'nn ka' llane'yan, na be'nn walla ka', na be'nn sin ka', na be'nn ka' nsed ke berj ka' sjalla latj yell-liw ni,

¹² na Daniel ni, be'nnen bsi be'nn wnebian Beltsasar yoe'e to espíritu da nak da braw, na yoe'e yel llajnie, na nezre kwasru, na llazakre akren llene yer ka' ne'n, na llalarawe di'll ka' ngachen, na dazed da nak da bni. Guxh Danielen, na le'e ye'e rwe' bixhan llene di'll ka' ne'n, da ka' nyoj le zen.

¹³ Bche ake' Danielen raw be'nn wnebian, na be'nn wnebian bnabre le'e: —Rwen nziw Daniel, to be'nn Judíos ka' zanchie xa'n, be'nn wnebian nzi Nabucodonosor gan nzi Judea cha'?

¹⁴ Ba gull ake' nada' ke Espíritu ke Diozen zureren rwe', na llebraz llajniero, na nako be'nn sin.

¹⁵ Na ba guxha be'nn sin ka' sjalla latj yell-liw ni, na ba bed ake' gani' nench brab ake' di'll ka', na ne' ake' bixhan lleren ne'n, axha ni rat bi biejnie akren.

¹⁶ Axha ba benla ke rwe' llelarawo dazed ake' da sjanak bni. Cha gako wrabo di'll ka', na yew nada' bixha llenen ne'n, nada' yepa be'nn ka' wak ake' rwe' rall da llak xhi'nn be'nn wnebia, na kugakte to bga da nak de ya dan nzi oro le yeno, na gako be'nn wyone', be'nn wnebia raw gan llnebian.

¹⁷ Na Danielen ballie'e xtillen: —Bagan'ren da ka' llwiao guno' nadan, na be'e be'nn yubre yel barane'n su gan llnebia'on. Nada' wzejnieksra rwe' bixhan llene di'll ka' ne'n da ka' nyoj le zeen.

¹⁸ Diozen llia le yeban be yel llnebian, na yel barane'n, Nabucodonosor'na, be'nnen nak xa'on.

¹⁹ Na kone yelwaken be le'en, yoyte be'nn yell ka', na be'nn ka' sjalla latj yell-li'on bdap ake' le'e baran kwis, na le lleb ake' le'e. Na le'e llute'e o cha llwe latj gat yelnban ke ko'on be'nn llenle, bal ake' llunee be'nn braw, na lltitjre ye bal ake'.

²⁰ Axha kan bzuraw llunee ke lluntegaren, na guke'e be'nn wednay, na guke'e be'nn yarall, na bake'e yelwak ke'en, na dan nake'e be'nn wnebian.

²¹ Na bake'e le'e radj be'nn nach ka', na bayake'e ke to bayix, na jasorene burr ka' bi nmaxhen, bdawe yix kan llun bell ka', na bzan'na gusjen le'e, bllinte lla bazakre Diozen llia le yeban nape yelwak raw yoyte be'nn nach ka', na le'en llzoe'e noxhan gak be'nn wnebia.

²² Na na' rwe' xhi'nn Belsasar, nestero kwasru kan guk ke le'en, na bine' gako be'nn raxhdao yiach.

²³ Ba benzo nllare, rwe' ba btitjro Xanllo llia le yeban ba gullo be'nn ka' lljaxi ake' mesen, na xbin ka', na yendoj ka' nak ke lo yodao ke Diozen, na kone be'nn ka' ba beno yexhen ba wejre zu ke uvan kone le aken, na ba berawo dios yub akre da sjanak de yan nzi oro, ya plat, ya dan nzi bronce, ya dan nzi hierro, da sjanak de yay, na da sjanak de yaj, dios ka' bi llrere, na bi llen akren, na bitbi nez akren. Axha bine' werawo Diozen llun yelnban ko'on, na le'e nezre bixhan lluno.

²⁴ Na kelen'na, le'en bsele'e tak dan bzoj di'll ka'.

²⁵ MENÉ, MENÉ, TEKEL, PARSÍN,

²⁶ na di'll ki lleren ne'en ki: MENÉ. Diozen ba brabe lla ka' llnebia'on, na na' yeke'en,

²⁷ TEKEL: Ba bllixe'e rwe' lo xgons, na bi nbixo ke to llayal,

²⁸ PARSÍN lleren ne'en: chopre gunee gan llnebia'on, na wayaken rallna be'nn medos ka', na be'nn persas ka'.

²⁹ Na le gullte be'nn wnebian nzi Belsasar wak ake' xharan Danielen, rall dan llak xhi'nn be'nn wnebia ka', na bro akte le yeren to gden de yan nzi oro, na bzenle be'nn ka' nench Danielen wnebie'e raw chonn kwen gan llie'e llnebien.

³⁰ Na ke lle nakse, bet ake' Belsasar, be'nnen llnebia be'nn caldeos ka',

³¹ na be'nnen nzi Darío guke'e be'nn llnebia be'nn medos ka', na llune wyon chop iz.