Daniel 4 - Be'nnka'be Xti'll Dios

Be'nn wnebian nzi Nabucodonosor bi bzu lo yichjen wen

¹ Nada' Nabucodonosor be'nn llnebia, zeralla cha ake' nbaraz, na gaklay yoyte be'nn nach sjalla yoyte yell, na latj yell-liw ga sjalla be'nn yub akre, na be'nn llne'e di'll yub akre raw yell-li'on.

² Llenla ne'zere ke dawen ka' ba ben Diozen nap yelwaken kone nada'.

³ Daxhen kwis nak da yelwan ka' llunen. Yel llnebia ke'en sibian ke chnare, na yelwak ke'en na'on kwen kwenze.

⁴ Nada', Nabucodonosor, zoa nbaraz kwis lo yo'rao kian, na zia banez yel nak layen,

⁵ axha to llee badia tasa, bne'ra to yer da llebraz bcheben nada', na bena xbab, na bredawra da llebraz blleba.

⁶ Natell gulla be'nn wen llin kia ka' nench yed be'nn sin ka' sjalla Babilonian, nench ye ake' nada' bixhan llene yeren ne'n.

⁷ Bra be'nn walla ka', be'nn wane'ya ka', be'nn sin ka', na be'nn ka' nsed ke berj ka' sjalla Babilonian, na beren ake' di'll kan nak yeren bne'ran, axha bi bazak akre, na ye ake' nada' bixhan llene yeren ne'n.

⁸ Bayulltell'na bed Danielen gan zian, na leska nsia le'e Beltsasar dan llapa baran dios kian, na espíritu ke Dios xhirallen llgon yelnban ke'en nez, na berenee di'll kan nak yer kian:

⁹ Beltsasar, xan be'nn ka' llne'ya, nada' nezra ke espíritu ke Dios xhirallen llgon rwe' nez, na nezro yoyte da ngach. Bzenay, dan ba brera raw yer kian, gull nada' bi lleren ne'n.

¹⁰ Dakin bredawra kan dia tasan: Radj yell-li'on zun to yay ton xhen.

¹¹ Yayen blli'on, na guken to da chill xhen, rawen llgantekazen le yeba, na nlaxhajtekazen gazerawze nak zit ga de yell-liw.

¹² Nbaraz kwis nak xlaye ka', na llebraz llian daxhixh na llakten llaw yoy akte. Na bayix ka' sjalla lixen llajse akba xhan xhur ken, na ba ka' zajzu xiren llun xon akban raw xhoze ka', na llwa'on yoyte da sjade yelnban ke raw yell-li'on.

¹³ Na to setegaze bredawra to ankl be'nn llap betje le yeban,

¹⁴ na zillj kwis bnee: Lewzal yayen, lewchuy xhoze ka', lewchib xlaye ka', na leguslaz daxhixh ke ka'. Lewaray bayix ka' sjalla xhan xhur ken, na ba ka' zajzu xiren zajnkoa raw xhoze ka'.

¹⁵ Axha lewakoan bchekw yayen raw yu, na rue ka', na le wchajen gden de ya dan nzi hierro, na ya dan nzi bronce, na lewakoane'n radj yix ka' sjade lixen. Na gasjen bzan dan llexj le yeba na surene bayix ka' txhen raw yix ka' sjade lixen.

¹⁶ Wzechj'chgan lo yichjen, na wayaken keto ke bayix snia, na damaren gak ke'en sibian gall iz.

¹⁷ Danin ba bdichjbia ankl xhirall ka' llapen, nench'na nezre yoyte be'nn nach ke Diozen nak xhirallen nape yelwak yoyte ga llnebia be'nn nach, na le'e llwe yel llnebian kon nu llenle we'en, na llzoe'e to be'nn llnebia raw latj yell-liw be'nn nak xendaze.

¹⁸ Dani yeren bne'ra nada' be'nn llnebia nzi Nabucodonosor, na na' rwe' Beltsasar, bnechk bixhan lleren ne'en, le ni tich be'nn sin ka' sjalla gan llnebian bi llajnie akren, axha rwe' gak wayixjweron le kone rwe' zeren espíritu ke Dios xhirallen.

¹⁹ Natell Daniel be'nnen nsi ake' Beltsasar, bze'e chulldao benee xbab, na bllebe'e kanake xbab ka' bara lo yichjen. Axha nada' be'nn llnebia gulla le'e: Beltsasar, bi welallo ke yeren, ni bixhan lleren chixjoen. Na Beltsasar na ballie'e xtillen: Wakazdan, doxhente kan llixhjoe yeren gakchgan ke be'nn ka' llwiere rwen.

²⁰ Yay ton, na da chill xhen'na breron, na llintekazen le yeban, na nlaxhajten gazerawze de yell-liw,

²¹ na xlaye ka' to sjanaken nbaraz, to lliachachen daxhixh, na llwaon yoyte, na xhanxhur ke yayen llajse bayix ka' sjalla lixen, na raw xhoze ka' sjarun xon ba ka' zajzu xiren,

²² na rwen nako yayen, na ba blli'o, na ba napo yelwak. Na yel zak xhen ko'on ba blli'on daxhen xte ba bayakrebten le yeban, na yel llnebia ko'on ba bllirjen raw doxhente yell-liw.

²³ Na lekse ka' rwe' brero to ankl xhirall betje le yeban na bnee: Le wzal yayen, na le wxhoxjen, axha le wakoan bchekw yayen na rente rue ka', na le wchajen gden de yan nzi hierro, na dan nak de ya dan nzi bronce, na le wakoane'n raw yix ka' sjade lixen. Na yexj bzan'na kullen, na soneren bayix ka' txhen raw gall yiz.

²⁴ Na danin llene yeren ne'n, kan ba bdichjbia Diozen llia le yeban kone rwe'.

²⁵ Rwe' bill sureno be'nn nach ka' txhen, na lljasureno bayix ka', na gawo yix kan llun bell ka', na bzan'na gazjen dokenako. Kan suw raw doxhente gall yizen, na bill sureno be'nn nach ka' txhen, na lljasureno bayix ka', na gawo yix kan llun bell ka', na bzan'na gasjen rwe'. Na ka suw gakte gall yiz, llinte lla wazakro Diozen llia le yeban nape yelwak raw yoyte gan llnebia be'nn nach ka', na le'en llzoe'e be'nnen llenle wnebian.

²⁶ Na bchekw yayen bakoan ake' kone rue ka', llenen ne'n wayune'e rwe' yel llnebian keten wazakro Diozen nape yelwaken.

²⁷ Na na', ben kan yepa rwen: ben sre dalixhej, na bill guno daxhinj, na belall gukren be'nn yiach ka'. Narachk cha kone ka' gat yelnban ko'o, na suw nbaraz, na gak wen ko'o.

²⁸ Na yoyte daki guken kone be'nn wnebian nzi Nabucodonosor.

²⁹ Bixha ke guk twizen, be'nn wnebian llechje'e yichjo yo'rao ke'en zu Babilonian,

³⁰ bnee: Lewiakero katk daxhen'na nak Babilonian. Nada', na kone yelwak kian, ba benchawan nench'na wruera yelwak kian.

³¹ Na ne' lleralte llne'e be'nn wnebian ket bren to be'e da blloj le yeban, na bren: Bzenay dani be'nn llnebia nzi Nabucodonosor. Yel llnebia ko'on bill naken ko'o,

³² bill chareno be'nn nach ka' txhen, na llajsureno bayix ka'. Raw doxhente gall izen gawo yix, kan llun bell ka', xte llinte lla wazakro Diozen llia le yeban nape yelwak raw yoyte latj yell-liw gan llnebia be'nn nach ka', na le'en llbaje be'nnen wnebian, na kon be'nnen llazrallen.

³³ Na raw hor nakse le gukte kan ba bdixjweren, na Nabucodonosor'na bill bzurene be'nn nach txhen. Bdawe yix kan llun bell ka', na bzan'na gusjen le'e, xte blliw yich yichje ka' guken kan nak dob ka', na xoye ka' guken kan nak ke bsia.

Nabucodonosor'na bazoe wen

³⁴ Ke bdil gall izen, nada' Nabucodonosor, balis rawan le yeban, na bazu lo yichjan wen. Natell benlaya Diozen llia le yeban, na berawa kone di'll ki Diozen zu ke chnare: Yelwak ke'en sibian ke chnare, yel llnebia ke'en sibian kwen kwenze.

³⁵ Raw le'e nutno nak be'nn nach ka' sjalla raw yell-li'on. Le'e llunee ko'on ke llenle kone ankl ka' sjalla le yeban, na kone be'nn nach ka' sjalla raw yell-li'on. Nutno gak wzay yelwak ke'en na nutno gak wnabe le'e bixhan llunee.

³⁶ Na ke hor nakse bazu lo yichjan wen, na lekse ka' bazia yel baran kian, na yel llnebia kian. Be'nn kia ka' llgu xnezen, na be'nn braw ka' llnebiaren nadan bed ake' badtirj ake' nada', na bane'bia latj yell-liw kian dayubre, na bayat daxhenll baran kia kerke dan got kia kan batna.

³⁷ Na na', nada' Nabucodonosor, lloerawa, llapa baran, na llunlaya be'nnen llnebia le yeban, le yoyte da ka' llunen sjanaken wen, na dalixhej, na llsie sdo be'nn yarall ka'.