Daniel 3 - Be'nnka'be Xti'll Dios

Beraw ake' loe lsaken nak de yan nzi oro

¹ Be'nn wnebian nzi Nabucodonosor, gulle'e be'nn ka' ben ake' to loe lsak de ya dan nzi oro, na dani ben aken chilloa metr de to'n, na chonn metr de ray, na gulle'e le ake' lljazoa aken rach gan nzi Dura, yellen nbanle Babilonian.

² Natell guxhe'e yoyte be'nn ka' llnebia yell ka', be'nn sjanak xan waka ya, korchis ake', be'nn wex mell ake', be'nn llgu xneze yell ka', nench'na chaj ake' lljeraw ake' loe lsaken ba blisen.

³ Yoyte be'nn braw ki sjalla latj yell-liw gan nbanlen, badup ake' gan ba bzoa ake' loe lsaken nench'na werao aken.

⁴ Na be'nnen yo rallna chixhjoen bne'e zillj kwis: Lewzenay yoyte be'nn sjalla yell ake', be'nn sjalla latj yell-liw, na yoyte be'nn llne'e di'll yub akre.

⁵ Na keten ye'nere ba bell trompeten, bllaj, dan nzi cítara, lira, salterio, dan nzi gaita, na yoyte ya wakoell ka' yela, wchekw xhibre na weraore loe lsak de yan nzi oro dan ba ben be'nn wnebian nzi Nabucodonosor.

⁶ Na yoyte be'nn bi wchekw xhibe, na bi werawe loe lsaken, llayal lljalo ake' le ake' lo horn dan ba llalninen.

⁷ Na ka guken be'nn ka' sjalla gana' ke ben akre ya wakoell ka', bchekw xhib ake' na beraw ake' loe lsak de oron.

⁸ Na to chop be'nn caldeos ka' jataw ake' xhia raw be'nn wnebian nzi Nabucodonosor,

⁹ na bne ake': —Ke chnare su be'nn wnebian, na llajdinlall ake' le'e du tiemp.

¹⁰ Rwe' be'nn llnebia ba bnew yoyte be'nn sjalla raw yell-liw wchekw xhib ake' ket yen akre bellne' ke ya wakoell ka', na werao ake' loe lsak de oron,

¹¹ na be'nn bi gun kan ba bneon, llayal lljalo ake' le ake' lo hor dan llalninen.

¹² Axha na' zu to chop be'nn judíos, na rwe' ba bzoa akoe llnebia ake' yell ka' sjanbanle Babilonian, na le ake' ni rat bi llap ake' rwe' baran, na nike llwerao akze dios ka', ni loe lsak de oron ba blison. Le aken nzi ake' Sadrac, Mesac na Abed-negó.

¹³ Na Nabucodonosor'na llebraz guklle, na gulle'e be'nn ke'e ka' lljaxi ake' be'nn ka' nzi Sadrac, Mesac, na Abed-negó. Na ke baze ake' raw be'nn wnebian,

¹⁴ na bnabre le ake': —¿Dalin re' bi llweraore dios kia ka', na ni loe lsak de oron ba blisan?

¹⁵ ¿Gunle kan ba bnian, keten yenere ba zill ya wakoell ka', na wchekw xhibre raw loe lsaken ba gull ake' ben aken, na weraoren cha'? Le cha bi weroaren, natk lljazal ake' re' lo horn dan llalninen, ¿na nuxha dios gak wasra re'?

¹⁶ —Bitbi di'll de wello ke dani —bnee llonte bi weo ka'.

¹⁷ Dios keton llweraoton gak wasre'e neto' lo hor llalninen, na raw yoyte damar llenle be'nn wnebian gunle neto'.

¹⁸ Axha lakse cha bi gunee ka', llayal nezro bi weraoto dios ko'o ka', na nike wchekwze xhibto raw loe lsak de oron.

Llonte bi weo ka' bara akbe lo horn llalninen

¹⁹ Na ke benle Nabucodonosor'na ke di'll ki, to gukze xnachoch llwarawen kanaken guklle bi weo ka'. Natell gulle'e be'nn ke'e ka' bla ake' hornen ye gall raz ke to dan ll-la aksen,

²⁰ natell gulle'e to chop be'nn waka ya ke'e ka', be'nn ka' zeraw sjanak be'nn war ake' nench bchaj ake' Sadrac, Mesac na Abed-negó, na gulle'e le ake' lljazal ake' le ake' lo horn llalninen.

²¹ Na llonte bi weo ka', kan nak aktezbe'na kone xharan akbe dan llnebiaren akben, bchaj ake' le akbe na jazal ake' le akbe lo horn dan llalninen.

²² Na raw horte guk kan ba bnee be'nn wnebian, na hornen le ba llalninen, na jatan be'nn waka ya ka', na blleyin le ake' kanaken jazal ake' llonte bi weo ka',

²³ na nllaj aktezbe yo' akbe lo hornen.

²⁴ Natell Nabucodonosor'na to setegaze bzulle'e, to llabanle gulle'e be'nn sin ke'e ka' llnebiarenen: —¿Bixha bi bzal-llo lo hornen chonn be'nn nllaj akteze cha'? —Awa kan naksen —gull ake' le'e.

²⁵ —Na nada' llrera tap be'nn, na bi nllaj ake', na da'do ake' lo yi'n, na bi lley ake', na be'nn wdapen nakze ke ankle.

²⁶ Natell Nabucodonosor'na jabiye'e llwa hornen, na besie'e: —Sadrac, Mesac na Abed-negó, be'nn sjallun xchin Dios nap yelwak xhen, lewalloj, na lewada gani'. Na chonn akte balloj ake' lo hornen,

²⁷ na yoyte be'nn korchis ka' llnebia latj yell-li'on sjalla gana', jabiy ake' kwit be'nn ka', na yi' llalninen bitbi benlen le ake', na bnes akre ni tich yich yichj aken bi byey, na ni xharan aken bitbi gukren, na nike la akze zi bey.

²⁸ Natell Nabucodonosor'na bnee: Gaklaychga Dios ke Sadrac, Mesac na Abed-negó, le le'en bsele'e ankl ke'en nench'na basre be'nn wen llin ke'e ka' nxenlall le'en, na biben ake' kan ba bdichjbia be'nn wnebian, na biazrall aklle kweyi ake' kerke da wchekw xhib ake', na werao ake' dios yub akre, da bi nak Dios ke ake'.

²⁹ Na na' llnia ke nuteze be'nn ne'e sban ke Dios ke biweo ki, llayal goxhj ake', na yo' ke ake' ka' wayinj aken, na gateze be'nn yell sjanak ake', be'nn sjalla latj yell-liw yub akre, na be'nn llne'e di'll yub akre, le nullno zu yeto dios gak wasra ke dani.

³⁰ Natell be'nn wnebian be'e bi weo ki llin da gun akbe da nak da braw yell gan nbanle Babilonian.