Daniel 2 - Be'nnka'be Xti'll Dios

Nabucodonosor'na bnere yere

¹ Da wllope iz kan llnebia Nabucodonosor'na, dazan raz bne're yere, na xtole len'na gukzedre, le bi llak lltase'e.

² Natell guxhe'e be'nn ka' llsed ke berj ka', be'nn walla ka', be'nn ka' llaneya, na be'nn sin ka', nench wayixjwe akre le'e yer ka' ba bne'ren. Na le ake' bllin ake' gan lli be'nn wnebian,

³ na gulle'e le ake': —Ba bne'ra to yere, na llakzedra, na llatrata nench chejnieran.

⁴ Be'nn sin ka' gull ake' be'nn wnebian di'll arameo: —Suchga be'nn wnebian ke chnare. Bnechk neto' be'nn llnebia kanake neto' nakto be'nn wen llin ko'o rwe', bixha yeren ba bne'ron, na neto' yeto rwe' bixhan llene yeren ne'n.

⁵ —Kin ba bachuyralla —bnee be'nn wnebian: cha re' bi ye're nada' dan bnera yeren, na bixhan llenen ne'n, wxhoxjga re' chetka, na wachinja yo' ke re' ka'.

⁶ Axha cha re' ye're nada' bixha yeren ba bneran, na bixhan llenen ne'n, dazan da guna' ke re' chetka, na gakrena re', na sire yel baran. Na na' le ye nada' bixha yeren ba bnera, na lene'chk bixhan llenen ne'n.

⁷ Na be'nn sin ka' bnee ake' da wllope raz: Bnechk neto' be'nn wnebia dan bne'ro yeren, na neto' wayixjweto rwe' bixhan llenen ne'n.

⁸ —Nada' nezra kwasru, bnee be'nn wnebian, ren llenere gunle tiemp, le ba bne'zere kan nak xbab kian.

⁹ Kelen'na cha re' bi yere nada' bixha yeren ba bnera, yoytere wsakzia, le ba be re' di'll nench'na siyere nada', axha nada' bakse bnia kan ba bnian. Leye nada' yeren ba bne'ran, natell nezra cha gak wayixjwere nada' bixhan llenen ne'n.

¹⁰ Na be'nn sin ka' bnee ake': Nutno llra' raw yell-li'on ye'e be'nn wnebian dan ba bne'ro yeren. Na ni tich be'nn wnebia, lakse cha nake be'nn lliw be'nn xhen, na nape yelwak, bine' wnabe chras ka dani raw be'nn llsed ke berj ka', na ni raw be'nn wane'ya, na ni raw be'nn sin.

¹¹ Na dan llnabo rwen naken bni kwis, na nutno llra' wayixjwe rwe' ke dani, tuze dios ka' gak wayixjwe rwe' ke dani. Axha le aken bi sjalla radj be'nn nach ka'.

¹² Na ke benee be'nn wnebian ke di'll ki, llebraz guklleꞌe, na gulle'e be'nn ke'e ka' gut ake' yoyte be'nn sin ka' sjalla Babilonian.

¹³ Na ke bayull bdixjwere ke dan ba bchuybien, na bayirj ake' Danielen rente be'nn ka' nake'e txhen'na nench'na gut ake' le ake'.

Danielen bayixjwere yeren bne're be'nn wnebian

¹⁴ Natell Danielen bne'e kone yel sin, na llilliteze kone be'nnen nzi Arioc, be'nnen nak xan waka ya ka' llap be'nn wnebian, le baze xnid gute'e be'nn sin ka'.

¹⁵ Na bnabre le'e: —¿Bixhchen be'nn wnebian ba bachuyralle ka to setegaze? Na Arioc'na gulle'e le'e biken benee ka.

¹⁶ Natell Danielen biaje jawie'e be'nn wnebian, na bnabe'e we le'e ye to chop lla nench ye'e le'e yeren bne'ren, na wayixjwere le'e bixhan llene yeren ne'en.

¹⁷ Natell zeyaje yo' ke'e, na bdixjwere be'nn ka' nake txhen'na, Ananías, Misael, na Azarías,

¹⁸ nench wnab ake' gukre raw Diozen llia le yeban bidan ngachen, nench ke gut ake' le ake' kone be'nn sin ka' sjalla Babilonian.

¹⁹ Na ke lle nakse baroeraw dan bines akren, na bredawre Danielen, na kone ka' Danielen benlaye Diozen llia le yeban

²⁰ kone di'll ki: Ke chnare gaklaychga ra' Diozen, le ke le'e nak yel sin'na, na yelwaken.

²¹ Le'en llache'e tiemp ka', na da ka' baguk batna, le'en llake'e, na llzoate be'nn wnebia ka', na llwe yel sin ke be'nn sin ka', na yel llajnie kone be'nn ka' llajnien.

²² Le'en llayixjwere da ka' zeraw ngach, na da bines akre, na nezre da sjalla raw da xchul, le benin zerenen le'e.

²³ Rwe' Dios ke xa' ka', lluna' yel lluxken ko'o, na lloerawa rwe' le ba beno' nada' be'nn sin, na be'nn war, na na' ba bdixjwero nada' dan ba bnabeto rwen: na ba bayixjwero neto' dan llakzede be'nn wnebian.

²⁴ Natell kan baguk ka, Danielen biaje jawie'e Arioc na, be'nnen gull be'nn wnebian gute'e be'nn sin ka' sjalla Babilonian, Na gulle'e le'e: —Bi guto be'nn sin ka'. Bche nada' raw be'nn wnebian, na nada' wayixjwere doxhente yer ke'en.

²⁵ Natell Arioc na bchie'e Danielen raw be'nn wnebian nzi Nabucodonosor, na gulle'e be'nn wnebian: —Radj be'nn Judíos ka' bchach ake' rall aken ba ballelera to be'nn ye'e rwe' akren nak yeren ba bne'ron.

²⁶ Natell be'nn wnebian gulle'e Danielen, be'nnen bsie'e Beltsasar: —¿Wak yew nada' bixha yeren bne'ran, na bixhan lleren ne'n cha'?

²⁷ Na Danielen bnee: Nutno be'nn sin, ni be'nn walla, ni be'nn llsed da ka' zajze le yeban bigak ye ake' rwe' be'nn llnebia dan llenlo nesron.

²⁸ Axha zu to Dios be'nn zu le yeba, na llayixjwere da ka' ngach, na le'e ba gulle'e rwe' be'nn llnebia bixhan ze gak du willjwani. Na' yepa rwe' be'nn llnebia ka yeren ba bne'ro, na dan bredawron kan dew taso.

²⁹ Rwe' be'nn llnebia dew llazirallo raw kamen, na beno xbab bixhan gak du willjwani, na Diozen llayixjwe da ka' ngachen ba bnee bixhan gak.

³⁰ Na lekse ka ba broere nada' dan ngachen, axha kere naklla be'nn sinll kerke be'nn yub akren, le nench'na yepa rwe' be'nn llnebia bixhan llene yeren ne'n, na rwe' be'nn llnebia chejniero xbab ka' sjalla lo yichj raxhdaon.

³¹ Raw yeren bne'ron, rwe' be'nn llnebia brero bias to bxen ton xhen, na to lleyninen, na nak yichjrawen zbanda.

³² Yichj bxen'na naken de ya dan nzi oro dogarj, lchoe, na xhichjen sjanaken de ya plat, na yaj xhixen, na xhollje ka' sjanaken de ya dan nzi bronce,

³³ na nie'e ka' sjanaken de ya, na yetolan naken de benj.

³⁴ Na ne'zeteo llwia'on, ket brechj to yaj, na nike nu blliyze len ket bdulen, na jatan le nia dan bredawron, na bxhoxjen len.

³⁵ Na tosetegaze ya dan nzi hierro, benjen, ya dan nzi bronce, ya platen, na ya dan nzi oron to bayak akzen bichte, ke dan llas ket llak ze'ye keten llsu ake' trigon, na ben, bayoachachen len, na billbi bagankse. Axha yajen ja'ta le dan bredawron bayaken to ya', na blanen doxhente raw yell-li'on.

³⁶ Danin nak yeren. Na na' yepa rwe' bixhan llene yeren ne'n:

³⁷ Rwe' be'nn llnebia nako be'nn llnebia napll yelwak xhenlle kerke be'nn wnebia ka' yela, le Diozen llia le yeban ba bene'e rwe' yel llnebian, na yelwak, ba bendipralle rwe', na ba bene'e rwe' yel baran,

³⁸ na ba bene'e latj llnebiaw latj gan sjalla be'nn nach ka', na bayix ka', na ba ka' zajzu xhir, na le'en ba broen rallnao, na rwen nako'o yichje de yan nzi oro.

³⁹ Natell ket wayull wnebiao, na lloj yeto be'nn wnebie'e axha bi wadole'e katken ba llnebia'on, natell naw yeto be'nn wyone wnebie'e, le'en nake de yan nzi bronce, na wnebie'e raw doxhente yell-liw.

⁴⁰ Natell za yeto be'nn wdap, be'nn nake'e war kakse ya dan nzi hierro dalleyi yoyte da sjade, na ka gun be'nn wnebian wlleyie'e yoyte ga sjalla be'nn llnebia.

⁴¹ Na lekse ka' brero to kwen le nie'e ka', na xbene ka' sjanaken de benj, na daki nchix akten ya dan nzi hierro, na dani llenen ne'n gak yel wnebian chop kwenle, na dan nchix benjen kone dan nzi hierro, ratze aken war.

⁴² Xben nie'e ka' sjanaken de yan nzi hierro, na sjanakten de benj, na dani llenen ne'n ke yel wnebian gaken war, na gakleljten.

⁴³ Na kanaken rwe' brero ya dan nzi hierro nchixten benjen, na be'nn wnebia ka' gun ake' bien gak gan llnebia aken war kone dan wchoynaren loellj aken, axha bi gak ake' tuze, kan llunen ke ya dan nzi hierro bi gak chixen benjen.

⁴⁴ Na lla ka' wnebia be'nn ki, Diozen llia le yeban wzoe'e to be'nn wnebia, na chras nutno gak wlleyi len, na nutno latj yell-liw yubre gak wnebia len, na leren wnebian le aken, na sibian ke chnare.

⁴⁵ Na len'na llenen ne'n ke yajen brero brall le ya'n, na nutno blliy len, yajen benen bichteze yan nzi hierro, dan nzi bronce, benj, ya plat, na yan nzi oro. Dios xhen'na ba brore rwe' dan ze gak willjwani. Yeren bne'ron naken dali kwis, na doxhente kan ba bnian, kayiane'n gakse.

⁴⁶ Natell be'nn wnebian nzi Nabucodonosor'na bchekw xhibe raw Danielen, na bzoate raoxhguen raw yu, na gulle'e be'nn ke'e ka' we ake' le'e da llazarall ake', na wllia akte yar da la xhixh rawe.

⁴⁷ Natell gulle'e Danielen: —Daliyan Dios keren nake'e Dios ke dios ka' yela, na nake'e xan be'nn wnebia ka', na le'en llayixjwere da ngach, na rwe' ba guko bzejniero nada' yeren ngachen.

⁴⁸ Natell be'nn wnebian be'e Danielen to yel llnebia da llunll ka raw da ka' yela, na lekse ka be'e le'e da bazaralle da zak daxhen, na lekse ka bzoe'e le'e wnebie'e to yell ke Babilonian, na xan be'nn sin ka' sjalla Babilonian.

⁴⁹ Na Danielen bnabe'e raw be'nn wnebian wzoe'e Sadrac, na Mesac, na Abed-negó ga wnebia ake' raw yell gan nbanle Babilonian. Danielen guye'e bnebiarene gan llnebia be'nn wnebian.