Daniel 10 - Be'nnka'be Xti'll Dios

Dan bredawre Danielen gawchochze gan de yeon nzi Tigris

¹ Da wyone iz kan llnebia Ciro be'nn Persian, lekse ka' Danielen nsi ake' le'e Beltsasar, bnere yere, axha naken bni ke le'e nench chajnieren. Axha Danielen bwiayiane'e kan naken'na, na guken biajnieren.

² Na ke lla ka', nada' Daniel bzuyacha raw chonn xman.

³ Bi bdawa yelwao chaw, na nike bnixhza bere, ni zu ke uva, na nike bllize kwina dan la xhixh gukte chonn xman.

⁴ Lla tapalloa lla beo nell ke izen llia llwa yeo xhen ke gan nzi Tigris.

⁵ Na balisa rawan, na brera to be'nn, na nakte'e xhe'e da llich kone rall cha'on dan nzi lino, na ngote'e to sinch da nak de ya dan nzi oro dogarj.

⁶ Na doxhente llaktite'e kan nak dan nzi topacio, na llwarawen to llaken kan nak yi' bzi'on, na yej rawen, to lleyninen, na xhichje ka', na nie'e ka' llaktit aken ka yan nzi bronce, na chie'en llunen ke ga llne'e be'nn zan kwis.

⁷ Tuze nada' bredawra dani, le be'nn ka' zerena txhen'na bi bre akren, axha to setegaze blliacha dan llcheben le ake', na bxhonj ake' jakoach ake'.

⁸ Tuze nada' zia kan bredawran. To gukza llichtat, na to gutzi'za.

⁹ Na ke benla bne'n, to bxhizen chia, na biala raw yu.

¹⁰ Natell, to taken bexen nada', na balisen nada' xte benee bzoa xhiba, na taka ka' bchich aken raw yu.

¹¹ Natell gulle'e nada': Daniel, Diozen nlliere rwe', bzenayian kan yepa rwen. Bayas, le le'en ba bsele'e nada' kone rwe'. To ke bayullze bne'e ke di'll ki, nada' bazulla, axha to xhiztitza,

¹² Natell gulle'e nada': Bi llebo Daniel, le lla nell nate kan bzuraw llatyoero nench chejniero da bni ka', na bzuraw benyiacho raw Diozen, na le'e bzenaye xtillo ka'. Na kelen'na ba beda nada'.

¹³ Anklen llap gan nbanle Persian bllune, na bi bene'e latj koa nez raw tolloa lla, axha anklen nzi Miguelen bede'e gukrene nada', le nada' bagana' tuza kone be'nn ka' llnebia gan nzi Persia.

¹⁴ Na kelen'na ba beda nench wzajniera rwe' kan gak ke yell ko'on du willjwani, le dan ba bredawron llne'n ke dan ze gak ke lla ka' zeza.

¹⁵ Na kanaken llwerene nada' di'llen, to bxhexjze yichja llwetia raw yu, na bibi gukse ni'a.

¹⁶ To setegaze ket to dan nak keto xhi'nn be'nn nach badtanee llwan. Na gulla anklen ze kwitan: Xana, dan ba bredawran ba bzoayiachen nada', na bill ndipralla.

¹⁷ ¿Akre ke gunliza werena rwe' di'llen, kanaken bi ndiprallan, na bi llak xub bich kia?

¹⁸ Na be'nnen nak ke walle xhi'nn be'nn nachen bdane nada' yeto, na bayundipralle nada'

¹⁹ na gulle'e nada': Bi llebo, na bi zuw dazed. Diozen nlliere rwe', bendiprallo, na bayun war. Na llakte llwerene nada' di'llen, nada' bayuna war kwis na bnia: Xana beren nada' di'll, le ba bayundiprallo nada'.

²⁰ Natell gulle'e nada': ¿Nezro biken ba beda badwia rwe' cha'? Le nada' de wayia lljadilrena anklen llap gan nzi Persian. Na ket ba bayull gukdirenen, natell za anklen llap gan nzi Grecia.

²¹ Na na' surawa yepa rwe' kan nak dan llia le yich gan llwen di'll dalixhejen: Gan llakdilren aken, tuze ankl Miguel nan llakren nada', anklen nak xan waka ya ke Israelen.