1 Timɔtɛɔ 1 - Zimba Nouveau Testament Portions

Kwinokea

¹ Paɔlɔ, ndomwa ya Kilisito Yɛsu, ko kokonda kwa Kakua Moolochi wiito, na Kilisito Yɛsu, otoekekea bae,

² kwa Timɔtɛɔ, mwaana waanɛ we kiinɛkinɛ muiekekeo, Tati Kakua, ne Moolochi wiito Kilisito Yɛsu bakɔɛchɛ lɔkɔka, lokwa ne nyaa.

Kɔɛbɛchiwa ko mbanga yee batoeyecha byabea

³ Chikana koa Ɛfɛsɔ bukusiele mee, abɛɛ mee mo koya ko Makɛlɔnia. Na koa bachibea baa batoeyecha maeyechi makinɛ.

⁴ Basaolea baanganaya ne ngano che manu che mabota chitasi kɔbɔnga. Biɔ biisɛ bitobeesa meango yee bokata kotasi koengeka bitokonda Kakua ko njea yee iekekeo.

⁵ Lusielo lolo lotoenga ne kokondana kototoka ko motema mwaachi, lokani lwaachi ne kuimenya kwe kiinɛkinɛ.

⁶ Bamɔchi, kɔlɛkɛa bia byaachi na kutuuluka kɔmɛɔcha etasi yee lokani.

⁷ Batokonda koongwa baeyechi be Salia ya Musa, koko ne abɔ batocheba bitɔɔcha abɔ ne bitusingeecha abɔ.

⁸ Totocheba itɛ Salia ee myaachi ingɛ etokambekiwa mo njea yee myaachi.

⁹ Kabee tochebe itɛ Salia ndeyabekwa ko bando baachi, yabekwa ne ko bando batoketa bwabea ne bataasi batonyɛmya bando, be ikɔya lye motema ne be bwabea, bataasi batɔnyɛmya Kakua ɔbɛɛ biemo bya ama, batuchia bababota, bichai,

¹⁰ be bwambya, ne batoketa boambya asambea babaome ko babaome ne babakachi ko babakachi, batoolekya baacha, batɔɔcha manu, baa batwinyekechea bye manu ne ko basɛ batoketa bikete bitɔsɛsɛkana ne maeyechi me kiinɛkinɛ.

¹¹ Maa maeyechi matoeyana ne Ilɔngɔ Lyaachi lye boombe lyaɛchiwa mee kotokea kwa Kakua oe ne lɔkɔka, naleeyeche.

Koseka bwaachi bwa Kakua

¹² Natoseka Mwaame wiito Kilisito Yɛsu ɔmbɛchɛɛ bɔkɛtɛ, kɔmɔa ombaekee mee koongwa we kiinɛkinɛ ne kombeka ko meemo yaakɛ

¹³ ɔbɛɛ bwamɔbɛngɛaya mee ne komososoa, ne komoketea bwabea, osongwea lokwa, kɔmɔa biisɛ byaketa mee nabiketa mɔ bɔɔkwa, kɔmɔa sabɛchaya ne iekekeo.

¹⁴ Mwaame wiito ɔmbɛchɛɛ lɔkɔka, ɔɔmbɛcha iekekeo ne kokonda koe niito ku kuisambya na Kilisito Yɛsu.

¹⁵ Lee ikomo lee ne lye kiinɛkinɛ, nalyo leengye kwimenyiwa kiinɛkinɛ: Kilisito Yɛsu wabaka mɔ mɔsɛngɛ ko koolola bae ne bwabea. Na mee ne we kombaa asambea abɔ,

¹⁶ Kɔ bɔbɔ Kakua osongwea lokwa. Oketee bɔbɔ kɔ kɔmɔa koetea mee we kombaa ko koketa bwabea, Yɛsu Kilisito oangoeche kokemya motema kwakɛ. Ko bobo mee naongwe keeyelo ko basɛ bataimenye kɔmɔngɔ ne kokonja mwɛchɔ we meombo.

¹⁷ Ko Nombe we meombo otaasi ndakakwe, otaasi ndatɔmɔɛka, Kakua ikɛsa, bibɛɛ kwakɛ bɔnyɛmu, ne boombe meombo ne meombo! Biibɛ bɔbɔ.

¹⁸ Timɔtɛɔ mwaana waanɛ, nasɔkɔɛcha lusielo lwe makomo maɔchiwa kaɛ nɛ ndɛnda cha Kakua ko mbanga yao. Maɔ makomo ne matakɔɔsɔnɛkyɛ kuchiana keboka bwaachi,

¹⁹ angeana ne iekekeo lyao, ne ongwa ne lokani lwaachi. Bamɔ bando batɔkɔna koongwa ne lokani, na boono bauchimbecha iekekeo lyabɔ.

²⁰ Asambea abɔ ae Ɛmɛnɛɔ na Alɛkisandɛlɛ, basusiela mee Isombo batɔndaya Kakua kabee.