Esther 6 - Zokam International Version

Mordecai Kipahtawi

¹ Tua zanin kumpipa a ihmu thei kei hi; tua ciangin ama kumpi suahna khangthu bu la-a a sim dingun thu a pia hi.

² Tua lai-ah kumpipa nasem lian kongvang cingte gel - Bigthana le Teresh in Kumpipa Xerxes suamsim ding a sawm uh Mordecai in a genkhiat, a kiciamtehna a mu hi.

³ Kumpipa in, "Hih thu ah Mordecai, bang pahtawina, bang lungdamlahna kipia ahi hiam?" ci-in a dong hi. Amah cingte in, "Amah bangmah kipia lo hi," a ci uh hi.

⁴ Kumpipa in, "Hih huang sungah kua om ahi hiam?" a ci hi. Tua hun laitak, huang pualam pan Mordecai khailup nadinga a phuhsa gui-awk khuampi ah Mordecai khailup nading thu a gen dingin Haman a va tum laitak lian ahi hi.

⁵ Amah a cingte in, "Huang sungah Haman ding hi," a ci uh hi. Kumpipa in, "Hong tumsak un," ci-in thu a pia hi.

⁶ Haman a tum ciangin Kumpipa in, "Kumpipa pahtawi nop mipa bangci pahtawi leng hoih ding hiam?" ci-in Haman a dong hi. Tua laitakin Haman in, "Kumpipa in kei sanga a pahtawi nop zawk kua om peuhmah ding hiam?" ci-in amah dingin a kivawhpah hi.

⁷ Tua ciangin kumpipa kiangah, "Kumpipa pahtawi noppa,

⁸ kumpipa silh puantualpi silhsakin, kumpipa tuanna sakol ah tuangin kumpipa lukhu khusak in.

⁹ Tua ciangin kumpipa ulianpen khat puantualpi le sakol apsak in. Amaute in kumpipa pahtawi noppa puan silhsakin khuapi sung lampite ah sakol tungah tuangsak inla ama mai-ah tangko paisak in. Hih in kumpipa pahtawi noppa kibawl nading ahi hi," ci-in a dawng hi.

¹⁰ Kumpipa in Haman kiangah, "Tu mahmah in pai inla, puantualpi le sakol va la-in, kumpipa kongpi-a tu Mordecai tungah tu-a na ngaihsutna nong gen bangin hih in, "Hoih na saksate khatbeek sit kei in," ci-in thu a pia hi.

¹¹ Tua ciangin Haman in puantualpi le sakol a la hi. Puantualpi Mordecai silhsak a, sakol tungah tuangsakin khuapi sung kongzingte ah paipihin a mai-ah tangkosaka, "Kumpipa pahtawi noppa hih bangin kibawl hi," a ci hi.

¹² Tua zawh ciangin kumpipa kongpi ah Mordecai a ciah kik hi. Haman ahileh lungsi pipi-in lutunsa in a inn ah ciah vingveng a,

¹³ a zi Zeresh le a lawmte tungah ama tunga thupiang khempeuh a ko hi. A thudotte le a zi Zeresh in, "A mai-a na guallelh kipatna pa Mordecai Jew mi taktak ahi nungsang ama langah na pang zo kei ding hi - a sia taktak ding hi ta teh!" a cihuan uh hi.

¹⁴ Amaute in amah a hopihpih laitakun kumpipa’ cilgehpa tunga Esther bawlsa pawi sim dingin Haman a paikhia pah hi.