Judas 1 - Zoque Copainalá New Testament

Jyayjayajušej Judajsis te' Diojsis quiopiwita'm

¹ Ʌjte' te' Jesucristo's quioyosa Judas, te' Jacobo's pyotzo. Nʌ'ʌsmij njayjaytyamu jujche'ŋmij nwyeyatʌjtamupʌ wa'mis mato'ŋoyjaytyamu te' Diojsis chame. Tʌ Ndata Diojsis šundambamij y ŋguioquendambamij Jesucristocotoya.

² Sunba'ʌs wa'mij Diojsis aŋba'te'c ñdyo'ya'ŋʌytyamu y šundamu y wa'mij ñchi'tamu sʌ'mnaquiuy.

Sujchajpapʌ aŋma'yoye

³ Tʌwʌy, jene sunba'ʌsmij inʌc njayjaytyamu wa'yʌsmij nyajmustamu jutzte' te' cotzojcuy nʌ'ijtupʌtʌs mumupʌ wʌ'aŋja'moyeji'ŋ. Pero ŋguipsu'ʌs que ijtu pyena wa'yʌsmij ndzamjaytyamu wa'mis ŋgoquipjaytyamu jana na'chcuy te' Cristocʌsipʌ wʌ'aŋja'moquiuy, porque Diojsiste' ñitza'mʌyu yʌ'šejpʌ aŋma'yoquiuy te' myasanbʌngʌsita'm wa'y yajnʌctʌ'yaju mumu pʌn.

⁴ Porque nu'mdʌjcʌyajwa'a mi'ojmota'm pʌnda'm ja'n ña'chapyʌ's Dios, chacjayajpapʌ's Diojsis yajya'moquiuy wa'y chʌcjayaju ñe'ta'm wyi'nis yatzi šu'noquiuy. Y nʌmyajpa que ja'n suni pyʌjcʌchoŋyaju te' tumʌpʌ Dios aŋgui'mbapʌ ni tʌ Ngomi Jesucristo. Diojsiste' myayaju desde wina yʌ'šejta'mbʌ pʌn wa'y tyocoyaju te'šejta'mbʌ tzʌquicʌsi.

⁵ Ñempe mis mustamʌ yʌ'šejta'mbʌ tiyʌ, sunba'ʌsmij ndzamwʌtzʌcjaytyaŋgue'tu: Tʌ Ngomi Diojsis yajcotzojcu wʌwʌ Israel-pʌnda'm ñʌpujtyaju'c Egipto-najsojmo. Pero jʌsa'ca yajca'pʌ'yaju Diojsis te' ja'n inʌc wyʌ'aŋja'moyapyʌ.

⁶ Y ijtu angelesta'm jaquioqueñapʌ's ñe'ta'm wyi'nis myʌja'ŋajcuy Diojsis chi'yajupʌ y te'cotoya chaquiaju te' tzajpojmopʌ itcuy. Yʌ' jamyato'ŋoyapʌ angelesta'm Diojsis chaquiatʌju presošej te' pi'tza'ŋajcu'yojmo hasta que nu'cpa te' mʌja'ŋbʌ cʌme'tzoquiuy-jyama.

⁷ Yʌ' chʌquiajušej yʌ'ta'mbʌ angelejsis, te'šejtij chʌquiajque'tu Sodoma y Gomorra-iti'sta'm y mumu aŋdome ijtyajupʌ cumgu'yista'm. Puro ispʌquitzʌjcuy chʌquiaju y chi'oquia'yaju wyin wa'y chʌquiaju tza'ajcuytya'mbʌ tiyʌ. Te'cotoya Diojsis jyajcʌyjayaju yʌ'šejpʌ co'aŋgʌquiuy ja'n yayepʌ jucʌtʌjcojmo. Cʌtʌjcu te'šej wa'ytye' quie'naŋgʌschi'ʌyu Diojsis mumu pʌn jutzte' te' ja'n yayepʌ cʌme'tzoquiuy jucʌtʌcpitpʌ.

⁸ Te'šejtijque' yʌ' nu'mdʌjcʌyajupʌ's wa'ytyij chʌquiaju te' wyi'nista'm yatzi šu'noquiuy ñe'ta'm quipsoquiuy ñʌtu'ŋajyajpa. Ja'n quiʌna'tzʌyay Dios y ja'n myato'ŋoyjayay aŋgui'moye y 'yotowewʌ'ajayajpa Diojsis 'yangelesta'm.

⁹ Pero angeles-cowi'na Migue'lis jachʌcʌ te'šej. Quipotoŋu'c diabloji'ŋ te' Moisejsis cuerpocotoya, jašunʌ chamneŋeca'mbʌ'ja mumu yacha'cuy tiyʌta'ma chʌjcu sino que ñʌjayu: Tʌ Ngomi'smij maŋba nyajnʌco'aŋgʌyu.

¹⁰ Pero yʌ'ta'mbʌ's yatzicotzamyajpa ja'n ñʌctʌ'yapyʌ tiyʌ. Ja'n ñʌctʌ'yoyapyʌ copʌnšejta'm, na' cu'tcuy y najsacopac-tzʌquicotoya tzi'sʌmyajpa wa'y pya'tyaju tyocoquiuy.

¹¹ Toya maŋba pyʌjcʌchoŋyaju yʌ'ta'mbʌ's porque yacha'cuy chʌquiajpa chʌcpašej inʌc yajca'opyapʌ Cai'ŋis. Y wa'ytyij yajtu'mʌyaju tumin, chi'oquia'yajpa wyin ñi'aŋsu'noquiu'yojmo chʌcpašej inʌc Balaa'ŋis. Y maŋba tyocoyaju jujcha'nde' pʌn Coré, te' ñʌquipotoŋbapʌ's inʌc Moisés, Diojsis quioyosa.

¹² Yʌ'ta'mbʌ nu'mdʌjcʌyajpa wa'y minu quiu'tyaju miji'ŋda'm. Como ñašunʌtʌjtambamij ñdyumʌcu'ttambamij, y yʌ'ta'mbʌ's minba chʌquiaju tza'ajcuytya'mbʌ tiyʌ. Myaŋgocʌtʌcjayajpa tʌ Ngomi's 'yujcaŋbajcuy, wʌjojcu'tcuyšej chʌquiajpa, y jucucu'tyajpa. Yʌ'šejta'mbʌ pʌn nʌ'tacapʌ o'našejta'm, šujwituwituwʌyajpapʌ yʌmʌc teymʌc sawa's. Jujcha' mʌja cuytya'm jama'ŋsʌ'ŋoyj cunbʌ'yajpapʌ's 'yay y ja'n tyʌ'majyay, ca'yajupʌše'a queñajpa, opopʌ'yaju'ca ca'octuquiajpa.

¹³ Na'chaŋda'mbʌ ma'ratepscʌšejta'm, porque jana na'chcuy chʌquiajpa tza'ajcuytya'mbʌ tiyʌ. Sawo'mota'mbʌ jucʌtʌc-toquišejta'm, porque te'šejte' maŋba chʌ'yaju mumu jamacotoya pi'tza'ŋajcu'yojmo ja'ndimʌy sʌ'ŋgʌ'.

¹⁴ Te' Enoc, cu'ya'yajcupyʌ wyinboyate' Ada'ŋisñe'. Tza'maŋwa'oyu'c ya'ajca yʌ' Enoc, chamgue'tu jutz maŋba quio'aŋgʌyaju yʌ'šejta'mbʌ pʌn nʌmu'c: Coquendamʌ cuenta, maŋba minu tʌ Ngomi aŋba'teta'mbʌ myasan angelesji'ŋ

¹⁵ wa'y minu quiʌme'tzpʌ'yaju mumu pʌn. Y maŋba quio'aŋgʌyaju mumu cowatzʌqui's ja'n ña'chapyʌ's Dios, porque chʌquiajpa yacha'cu'yojmo saŋyatzita'mbʌ tiyʌ, y porque yatzicotzamyajpa Dios.

¹⁶ Yʌ'ta'mbʌ's nu'motoŋguy chʌquiajpa y tuptupnayu'ctya' ijtyajpa. Quio'ŋyajpa ñe'ta'm jyanaoye'ajcuy. Tzamdzocotzoconayajpapʌ, y wyʌcotzamyajpa pyʌndʌwʌ wa'ytyij ñʌwʌ'ajyaju tiyʌ'iwʌ.

'Yaŋnʌctza'mʌyajpa Judajsis te' wʌ'aŋja'moyeta'm

¹⁷ Pero mista'm, tʌwʌy, jamwʌtzʌctamʌ tiyʌta'm mij ñchamjayaju wina Ngomi Jesucristo's quiʌ'we'ista'm,

¹⁸ te' yʌ'šej nʌmyaju'c: Ultimopʌ aŋsʌ'ŋojmo maŋba ijtu quiʌsijcʌyajpapʌ's te' Diojsis chame, te' ñe'ta'm tu'ŋajyajpapʌ yatzi su'noquiu'yojmo.

¹⁹ Y tu'mʌquiu'yojmota'm wye'ñajpa atzita'm yʌ'ta'mbʌ's y ñe'ta'm šu'noquiuy chʌquiajpa porque jañʌ'ijtya Espíritu Santo.

²⁰ Pero mista'm, tʌwʌy, yajpaquipʌctamʌ mista'm Cristocʌsipʌ nwʌ'aŋja'moquiuy, y Espíritu Santo'smij yajcotzoŋdamʌ oto'ŋʌytyamba'cmis Dios.

²¹ Como Diojsis jene sundambatʌ, coquendamʌ nwin wa'mis sundaŋgue'tu ñe'cʌ. Pacienciapit jo'ctamʌ wa'mij ŋguiotzococtuctamu y wa'mij ñchi'tamu ja'n yayepʌ quenguy tʌ Ngomi Jesucristo's te' tyo'ya'ŋʌ'oquiupyit.

²² Y te' nʌ myetzatzoco'yajyajupʌ, tzamnʌctʌ'ytyamʌ.

²³ Y eyata'mbʌ, jopotonbujtya' jujcha' jucʌtʌjcojmo ijtyajupʌšej wa'y quiotzoquiaju y wa'y chaquiaju quiowa. Y eyata'mbʌ, na'tzina'tzi'c ca'ŋnu'ctamʌ ñe'ca'ŋita'm porque ndo'ya'ŋʌyajpamis. Pero qui'nisjaytyamʌ ñe'ta'm chʌqui.

Myʌja'ŋwʌcotzamba Dios te' Judajsis

²⁴ Diojsismij maŋba ŋguioquendamu umij maŋu ñchʌcjopi'ttamu mista'm ŋgowa's, porque ñe'cʌ pʌmi'ʌyupʌte'. Y maŋbamij nya'aŋguejtamu ñe' wyi'naŋdʌjqui cowataca y oma'oma ñe' chi'muŋgʌ'ojmo.

²⁵ Tumʌtij ijtu tʌ Ndata Dios mujsopyapʌ, tʌta'm nyajcotzojco'yoye, porque ñe'cʌ mʌja'ŋaŋgui'mopya y pʌmi'ʌyupʌte'. Ngʌna'tzʌytya'mitʌy yʌtij y mumu jamacotoya. Amén.