Gálatas 1 - Zoque Copainalá New Testament

Jyayjayajušej Pablo's te' Galacia'ojmota'mbʌ wʌ'aŋja'moye

¹ Ʌjte' te' Pablo, te' cʌ'wej. Jaquiopiŋya'ʌj pʌ'nista'm ni jaquiʌ'wejya'ʌj, sino que cʌ'wejyaju'ʌj Jesucristo's y tʌ Ndata Diojsis. Te'wʌ's yajwinsa'u Jesucristo ca'yajupʌ'ojmoc.

² Njayjapya'ʌsmij. Y mumu te' ʌji'ŋ ijtyajupʌ atzi'sta'm nʌtʌsmij ŋgʌ'wejaytyamu dyujchi'oquiuy jujche'ŋmij Diojsis tyu'mʌquiuytya'm te' Galacia-najsojmo.

³ Sunba'ʌs wa'mij nyajyamdamu y wa'mij ñchi'tamu sʌ'mnaquiuy tʌ Ndata Diojsis y tʌ Ngomi Jesucristo's.

⁴ Yʌ' Cristo's chi'oquia'u wyin wa'y quioca'jayu tʌta'm ŋgowa, y wa'ytyʌ yajcotzoctamu yʌmyajtʌ nʌ nwittamu'cše'ŋoyj yʌ' yatzita'mbʌ tiempo'ojmo. Te'šej šunu tʌ Ndata Diojsis wa'y tyujcu.

⁵ Pyʌcpa wa'y myʌja'ŋwʌcotzamyaju mumu pʌ'nis yʌ' Dios miñajpapʌ y maŋyajpapʌ aŋsʌ'ŋojmo. Amén.

Ja'ndiyʌ eyapʌ evangelio

⁶ Nʌmaya'pa'ʌs jutzmij jʌnʌjtij nʌ ndzactamu Dios. Ñe'cʌ'smij nwyejtamu wa'mis mbʌjcʌchoŋjaytyamu Cristo's yajya'moquiuy. Y nʌmis sunu ŋgo'ŋdamu evangeliošej eyaco aŋma'yoquiuy.

⁷ Ja'ndiyʌ eyapʌ evangelio. Pero ijtu sunbapʌ'smij ñchʌcjopi'tʌtʌjtamu. Te'ta'mbʌ's sunba quiactocoyjayaju te' evangelio chambapʌ's Cristo.

⁸ Ndzamgopuŋjaytyamutʌsmij te' wiyuŋšejpʌ evangelio. Pero juca tʌstijque' nʌcʌpo'pa eyaco evangelio wa'ytyʌsmij ndzamgopuŋjaytyamu, o juca tzajpojmocpʌ angelejsismij ñchamgopuŋjaytyamba eyaco evangelio, ñe'cʌ tocoyupʌte' Diojsis wyi'naŋdʌjqui.

⁹ Ndzamuše'amʌs wina, ndzamwʌtzʌcpa'ʌs yʌtij: Juca iwʌ'smij ñchamgopuŋjaytyamba eyaco evangelio ja'nde te' mbʌjcʌchoŋdamušejpʌmis, tocoyupʌte' Diojsis wyi'naŋdʌjqui.

¹⁰ Yʌtij jeque, ¿nʌsʌ'ŋʌs me'tzu wa'yʌj pʌ'nis wi'naŋgojtyaju, o Diojsisʌj wa'y wi'naŋgojtu? ¿Masʌ'ŋ oye wa'yʌs nwi'naŋgojtyaju pʌnda'm que ja'n Dios? Wiyuŋšej juca inʌjcʌs pʌnda'm nwi'naŋgojtyajpa ja'nʌjyʌ' inʌc Cristo's quioyosa.

Tʌjcʌyušej Pablo Diojsis yoscu'yojmo

¹¹ Pero nyajmustamba'ʌsmij, atzita'm, que te' evangelio ʌsmij ndzamgopuŋjaytyamupʌ, ja'nde' pʌ'nis ñʌcʌpo'upʌ tiyʌ.

¹² Porque yʌ' evangelio ni'iwʌpʌ pʌ'nisʌj jayajmusʌ, ni ja'yaŋmayʌ, sino que Jesucristo'sʌjyʌ' yajquenu 'Yespiritupit.

¹³ Mustamba'mis jutzʌj inʌc yatziwitpa wʌ'aŋja'moyu'cʌj wʌ'aŋja'moyajpašej judiota'm. Maya'ŋʌs inʌc nyacsnutzʌquiajpa te' Diojsis tyu'mʌquiuy, y nʌ'ʌs inʌc nyajyaju.

¹⁴ Y nwacasnaco'mo inʌjcʌs ŋgojtyajpa sone pʌn ʌji'ŋ inʌc ñʌtu'ŋajyajpapʌ's judio-wʌ'aŋja'moquiuy te'ta'mbʌ aŋsʌ'ŋoyj, porque ʌste' inʌc más ŋgoquijpa ʌs njudio-tata'sta'm quiostumbre.

¹⁵ Pero japyʌ'nʌ'cma'ʌj, Diojsisʌj copiŋu y weju'ʌj ñe' yajya'moquiupyit wa'yʌs nwʌ'aŋjamu.

¹⁶ Y yajquejayu'ʌj ñe' 'Yune wa'yʌs ispʌjcu wa'yʌs te'wʌ ndzamgopuŋu te' genti'lojmota'm. Jamyawʌ'ʌs me'tza pijche'ctij iwʌ'sʌj wa'y tzamnʌctʌ'yu,

¹⁷ ni jamyawʌ'ʌj Jerusale'ŋojmo ijtyajumʌy inʌc más winata'mbʌ cʌ'wej que ja'n ʌj. Pero maŋu'ʌj Arabia-najsojmo, y teymʌjca minwʌtzʌjque'tuti'ʌj Damasco'ojmo.

¹⁸ Y cʌtʌjcu'ca tuca'y ame maŋu'ʌj Jerusale'ŋojmo wa'yʌs ispʌjcu Pedro, y ya'yu'ʌj tey ñe'cʌji'ŋ yʌjta'y jama.

¹⁹ Pero jaŋguiena'ʌs eyata'mbʌ cʌ'wej más que te' Jacobo tʌ Ngomi's pyotzo.

²⁰ Yʌ' nʌše'ʌsmij njayjaytyamu Diojsis nʌ quienu que ja'nʌj sutzi.

²¹ Jʌsa'ca maŋu'ʌj Siria y Cilicia-najsojmota'm.

²² Pero te' tu'mʌyajpapʌ's inʌc Cristo's ñʌquiʌsi Judea-najsojmo ja'nʌj inʌc ispʌquiay, porque jaquieña'cma'ʌjte'.

²³ Tzamdzamnaquiu'yojmotijte' inʌc myatoŋyajpa que te' wina yacsnutzʌctamupʌ'stʌ yʌtij te'wʌ's nʌwa' chamgopuŋu te' nwʌ'aŋjambapʌ tiyʌtʌ. Te'ta'mbʌ tiyʌ nʌ inʌc yajyaju yʌ' pʌ'nis.

²⁴ Y myʌja'ŋwʌcotzamyaju Dios porque nwʌ'aŋjamu'ʌs Jesucristo.