Yuda 1 - Ziazia kekeapai

Sanango aboro

¹ Yuda, nga ga Yesu Kristo moyambu, wirina Yakoba, Fu agu yo i ayambu yo, abadiangba rogo Mbori yo nga Ba, i abanda yo tipa Yesu Kristo:

² Inapai moi pai fu roni na zereda na nyemuse.

Sapangbanga tipa zire abayugupai

³ Abadiangba, wa mi aberẽ pa ke pai fu roni sirisiri tipa pa gaani bata du fu rani dunduko, si ngba ya mi ke pai fu roni nizungadi roni oni so vura zaza tipa gu idapase i afu fu ga Mbori aboro bara sa kindi.

⁴ Bambiko agu akumba narimi ni gbuko nga agu yo i aringbisi yo mbata sa gi kitangbanga re, azangasinombori, nasa ga gaani Mbori undahe ni wasiro, niti kangu bangisa Bairarani na gaani Gbia, Yesu Kristo.

⁵ Awere mi nakpi nyemu ka tingida ha fu roni, ono ka oni avura ina ha dunduko mbata, wa Gbia abatasi rika aboro ringara Ezipeta, fuo ho ko ki nigbarasi agu yo aida nga pa ko ya.

⁶ Agu amaraika aka nga kuti gayo bambata rago ya, ono i ki he gu rago i aringbisi he fu yo, ko aka kuti yo rogo nyenye azogbo tii bitimo yo dati gu sapangbanga nga ga gu uru re.

⁷ Kina wo Sodoma na Amora, na abakporo pati he, amangi kina wa agi yo re, nifu tiyo fu zapatise, ki nipeke kungba borose, i du ni yuguyugu he ni kpia pai, nihi gu mbusa nga nyenye we.

⁸ Kina wo agi yo re rogo gayo musumo anabirikosi borose, ki nika fu atandu nigberẽ ngbayo yo fu ataarimo.

⁹ Ono Mikaere bakumba maraika, ho ko aso vura ni na bakitingbanga, wa ko ati kangu tipa kangba Mose, ko aerã nga ka paa na ko ni kita ngbanga ko te, ono ko aya, “Gbia za ro.”

¹⁰ Ono agi yo re nagberã ngbayo yo fu agu ahe i aina nga ha ya, na agu ahe ini yo wa pa borose na wa anya adu nga na berã ti ra ya, rogo agi apai re i nagbarasa tiyo.

¹¹ Na gberẽ he fu yo! mbiko i nandu ngba ga Kaina gene, nioro ni nzanga rogo ga Birama irairapai mbiko mosoro, ki nikpi rogo ga Kora ti kangu.

¹² Agi yo re nga airabiriki kporo gaoni pumbo yo nga ga nyemuse ho i ari riahe pumbo ni na oni, ababanda akandoro nariga tiyo ka i agunde nga va; wa gu dubo zanga ime, yuge naya na ni; nga gu ngua kpe he anyokora, azu nga ya, du ni kpikpi he bara ue, i mo ho na tarãha;

¹³ sungbura baime nawo, nikusi gayo zee wa fugehe; tata akerekuru, nga agu yo i ambakadi gu nduunduu birarago nga ga bitimo tipa yo dati digida rago.

¹⁴ Fu agi yo re a Enoka, nangia saba ni fuo Adama, ki ta gumba pai niya, “Oni ngére, Gbia aye na gako aboro ni dungu kutu yo,

¹⁵ ka sapa ngbanga aboro dunduko, ka yugo gayo gbegberẽ mangapai du fu azangasinombori dunduko, nga gu azangasinombori anamanga ni gayo zangasinombori na gu nyanyaki afugo dunduko agu aboro ingapai zanga sino Mbori nagumba kuti ko.”

¹⁶ Agi yo re nga agumbarimo, akpakana aboro, napeke gayo nyemuhe, ngbayo nagumba bakere bapai, nizomia aboro ka bi mosoro.

Rugapai na nyakasapai

¹⁷ Ono oni abadiangba, oni tíngidi agu apai ga gaani Gbia Yesu Kristo amokedi anagumba ha mbata;

¹⁸ wa i aya fu roni, “Ti yangara rago airawia nikadu, nata fuo gayo nyemuahe na zangasinombori.”

¹⁹ Agi yo re nga agu yo nakparaka dagba aboro a, niberẽ pa borose, adu nga na Toro ya.

²⁰ Ono oni, abadiangba, oni ta sonosa tironi rogo gaoni ziazia idapase, nikpari rogo Ziazia Toro yo,

²¹ oni bánda tironi rogo ga Mbori nyemuse yo, ki ningere fuo ga gaani Gbia Yesu Kristo inapai sa nyenye unga.

²² Oni ini pai fu agu yo nasaka pai;

²³ oni bátasi agu yo, ki nituka yo we yo, oni ini pai fu agu yo ni gunde, nisogo gu roko a nabiriko be borose.

Yangara sanango aboro

²⁴ Awere fu gu ko rengbe na banda roni be tigo, na ka maa roni barangba gako taarimo ni zanga sirõ rogo gu ngbarago susi,

²⁵ fu bangisa Mbori Batasirani, rogo Yesu Kristo yo gaani Gbia, taarimo dú fu ko, na ome, na kindo na tandu, mbata rago nikaenga, awere, a nye anye kindi. Amina.