Yoane 20 - Ziazia kekeapai

Yesu azingi be kpio

¹ Were ni gu bambata rame nga ga poso Maria Magadara ki niye ngbatutu, ho rago nidu ni na bitimo, ku pati murã yo, ki bi mbia i nadi he ku sa yo ti murã.

² Ri ki nimo ka ora, ki ye koyo du aSimona Petero ni, na gu kura bawiriki Yesu anakpi nyemu ko, ki ya fu yo, “I di Gbia ku sa yo murã yo, ani aina nga ho pigi yo ko ni te.”

³ Petero ki nimo ka ndu, na gu kura bawiriki re, ki ndu ku pati murã yo.

⁴ I ki mongo nioro sa; kura bawiriki ki oro aora ki susi Petero, ki da pati murã yo mbata.

⁵ Ko ki nugadi ki ningere koyo, ko ki bi pusi remu si piki; ono ko arima nga koyo te.

⁶ Simona Petero ki nimo ka ye a tigako, nipe ko, ki rimi ku murã yo. Ko ki bi pusi remu si piki,

⁷ na gu tambara nadu ti riko, si api nga na remu te, si adu ni kãikãi he rogo gu ba ni sa ha.

⁸ Gu kura bawiriki ki nimo ka rima koyo a tigako, naye ku pati murã mbata, ko ki bi he, ki idi pa ha.

⁹ Bambiko ka i ata ina nga gu Ziazia Kekeapai nga, ko azínga azinga berewe be kpio ya.

¹⁰ Si du abawiriki andu ti ni berewe ku kpuyo yo.

Yesu ayugu tiko fu Maria Magadara

¹¹ Ono Maria aru kina zegi pati murã nikpari ni aume. Wa ri akpara, ri ki nugadi ki ngere ku murã yo.

¹² Ri ki bi amaraika ue na pusi remu ti yo i sungu, gu ni ki du sa ku ba ri yo, gu ni ki du sa ku ba nduhe yo, ho kangba Yesu api ni.

¹³ I ki ya fu ri, “Na, tipagine mo akpara ni aume ti ni?” Ri ki ya fu yo, “Bambiko i di gi Gbia ku sa yo, mi aina nga ho pigi yo ko ni te.”

¹⁴ Ho ri agumba ha ni were, ri ki sa tiri giiri, ki bi Yesu ko ru, ri aina nga ya Yesu nadu te.

¹⁵ Yesu ki ya fu ri, “Na tipagine mo akpara ni aume ti ni? Da mo agbata ni?” Ri ki ya ti gu babanda ati nga ko, ki ya fu ko, “Gbia, si ngia mo di ko erẽ, mo yúgu ho fere pigi mo ko ni, mi adía ko ku sa yo.”

¹⁶ Yesu ki ya fu ri, “Maria.” Ri ki sa tiri, ki ya fu ko rogo pa Ebere yo, “Raboni!” (si wa ka i ya, Bayugupai.)

¹⁷ Yesu ki ya fu ri, “Ka mo zádi nga re ya; bambiko mi ata ga nga koyo du Buba ni te. Mo ndú koyo du awirinami ni, ki ya fu yo, mi naga koyo du Buba ni nga Baroni, nga gi Mbori nga gaoni Mbori.”

¹⁸ Maria Magadara ki niye ki ya fu abawiriki. “Mi bi Gbia.” Ri ki pe pa agu apai ko agumba fu ri.

Yesu ayugu tiko fu gako abawiriki

¹⁹ Ho nyemu ada ni gu rago, nga bambata rago poso, ho ngbadimo adu ni ni kisikisi he ho abawiriki adu ni, bambiko gunde aYudo, Yesu ki ye ki ru ngbanda yo, ki ya fu yo, “Oni dú zezeredi.”

²⁰ Ho ko agumba gi ni re, ko ki yugu beko fu yo na pavuko. Rago ki nimo ka ngba angba ti abawiriki, ho i abi Gbia ni.

²¹ Yesu ki nimo ka ya fu yo berewe, “Oni dú zezeredi; wa kedi Buba re, kina wo mi akeda roni.”

²² Ho ko agumba gi ni re, ko ki ongo kuti yo, ki ya fu yo, “Oni dí Ziazia Toro ku gume.

²³ Agu yo Ka oni vu yo ti gbegberẽapai, i vu yo avu; agu yo ka oni dika gbegberẽapai kuti yo, i dika ha adika.”

Ga Toma zanga idapase

²⁴ Toma nangia Bi nadu dagba agu yo nanidu bawe na ue, ko adu nga yo ho Yesu aye ni te.

²⁵ Kura abawiriki ki nimo ka ya fu ko, “Ani bi Gbia.” Ono Toma ki ya fu yo, “Kina gu mi ka bi serõ aneri beko yo, ki moi wirinzagare ku serõ aneri yo, ki moi bere pavuko, si mi ka ida pa ko ti ni.”

²⁶ Fuo rame muambi gako abawiriki ki du dimo yo berewe, aToma nadu na yo. Yesu ki ye, ngbadimo du ni kisikisi he, ki ru ngbanda yo, ki ya, “Oni dú zezeredi.”

²⁷ Ko ki ya fu Toma tie, “Mo tãi wirinzagaro kono, ki bi bere; ki tãi bero kono, ki moi he ku pavure. Ka mo he nga ida pa re ya, mo idi pa re.”

²⁸ Toma ki karaga ha fu ko ki ya, “Gi Gbia nga gi Mbori.”

²⁹ Yesu ki ya fu ko, “Bambiko mo bi re, mo idi pa re; i fu maku fu agu yo abi nga re ya, ki idi pa re.”

Ndu ke gi kitabu re

³⁰ Yesu ki nimo ka manga dungu kura apai i aina pai ti ni ku bangiri abawiriki, nga gu adu nga ni keke he rogo gi kitabu re ya.

³¹ Ono gi du ni keke he re, oni idi pa Yesu ya Kristo nga ko, nga Wiri Mbori: oni idi pa ko ka du ni ungaroni ni rimoko.