Ruta 1 - Ziazia kekeapai

Pa Ruta na Naomi

¹ Si ki ta du wa gere, ni gu rago ho abasapungbanga azoga rago ni, gberãngbi ki du rogo gu ringara re. Gu kumba sa nangia boro Betereme du Yuda yo andu ki sungu rogo gu ringara nga Moaba, ko, na diako, na awiriko ue ni akumba.

² Rimo gu kumba re nangia Erimereke, rimo diako ki ngia Naomi, rimo awiriko ue ki ngia Marona na Kiriyona; ni aboro Efurata du Betereme du Yuda yo. I aye ku rogo ringara Moaba yo, ki sungu yo.

³ Ono Erimereke, kumba ku Naomi ki kpi, ki mbu kina ri na awiriri ue.

⁴ I ki rogo adiayo dagba agu ade naadu Moaba yo. Rimo gu ri nangia Orupa, rimo gu kura ri ki ngia Ruta. I araki koyo wa agarã bawe;

⁵ aMarona ki kpiki na Kiriyona a wa i adu ue. De ki zanga awiriri ue na kumbari a.

⁶ Ri ki guari na adekurugbo awiriri ringara Moaba yo ka karaga tiri, bambiko ri agi he ringara Moaba yo ya Yekova du na gako aboro ni fu riahe fu yo.

⁷ Ri ki guari rogo gu ba ri adu rogo, na adekurugbo awiriri ue na ri a, i ki ndu ngba gene karagatise yo ku ringara Yuda yo.

⁸ Ono Naomi ki ya fu adekurugbo awiriri ue, “Oni gúari, ki karaga tironi, gu ni kina ku nani yo. Yekova mángi wenepai fu roni, a wa oni anamanga pai fu agu yo nakpiki, na fere a.

⁹ Yekova ídi he fu roni oni bí zereda rogo ga akumbaroni kporo, wa du oni ni ba sa sa!” Ri ki nyoro pa ngbayo, i ki poi ku ari, ki nikpari ni aume.

¹⁰ I ki ya fu ri, “Ai, ono ani agá na mo kina koyo du gamo aboro ni.”

¹¹ Ono Naomi ki ya, “Oni káraga tironi, awire, ani agá na oni tipagine? Akumbagude rukumbure yo kindi nikadu ni akumbaroni?

¹² Oni káraga tironi awire, oni gá aga, bambiko mi gbinza ki susi ba dia kumba. Ka mi ya mi adu na maabangirise, ka kumba du be re areme yuru, mi ki batika awire, oni asúnga daho i ka sona ni? Oni aróga nga akumba te? Ai, awire,

¹³ bambiko si narungosi re bakere gbe tipa roni, wa adu nga ga Yekova maku ti re ya.”

¹⁴ I ki poi ku ari, ki nikpari ni aume berewe; Orupa ki nyoro pangba nakumbari, ono Ruta aka kuti ri kindi.

¹⁵ Naomi ki ya, “Mo ngére, dekurugbo tame kumbamo karaga tiri koyo du gari aboro ni, na koyo du gari ambori ni a; mo gáfuodekurugbotamekumbamo.”

¹⁶ Ono Ruta ki ya, “Ka mo zúngadi nga re mi mbú ro, ki karaga re tipa peka fuo ro ya. Bambiko ho mo ka andu ku ho ni, mi andú kina ku ho a, ho mo ka anye ni, mi anyé kina ho a. Gamo aboro nikangia kina gimi aboro, ga Mbori ki ngia kina gi Mbori a.

¹⁷ Ho mo ka kpi ni, mi akpí kina ho a, i ki kpisidi re kina ho. Yekova amánga ha fere, na gu ku ri he a, si ngia he ho du kia ti kpio nikakpara rani na mo.”

¹⁸ Ho Naomi abi he ni ya ri ka kuti pa ndu na ri kindi, ri ki mbu fura na ri.

¹⁹ Si du i aga ti ni ue kindi daho i ada ni ku Betereme yo. Ho i ada ni ku Betereme yo aboro bakporo ki vo gbu pati yo, ade ki niya, “Naomi du?”

²⁰ Ri ki ya fu yo, “Ka oni yámbu nga re ni rimo Naomi berewe ya, oni niyámbu rimore nga Mara, bambiko gu Ko du na tandu apai dũ amangi imisiripai ti re bakere.

²¹ Mi aguari erẽ na ũkumuko, Yekova yega na mi ni kina ku bere. Tipagine ya oni ti re ti ni, Naomi, wa Yekova amoi pai ku ri re, nga gu Ko du na tandu apai dũ narungosi re?”

²² Were Naomi ayega, na Ruta fuo ri, nangia boro Moaba, ni dekurugbo wiriri, nga gu ri nayega ringara Moaba yo. I ki da ku Betereme yo ti bambata regbo ke zende he wa ga mapunga.