Osea 14 - Ziazia kekeapai

Pa zungadi Yekova aYisaraere i karaga tiyo berewe

¹ Ako aYisaraere, oni káraga tironi koyo du Yekova ni nga gaoni Mbori, bambiko oni kotoko be gaoni irairapai.

² Oni yé na apai ngbaroni ki karaga tironi koyo du Yekova ni; ki ya fu ko, “Mo dí irairapai dunduko ku sa yo; mo idi pa kina gu pai be rani ngba angba ani ki fu gu zuzuhe nga ga ngbarani ni motumo.

³ Asura abátasa nga rani te, ani aóra nga ri afarasi a te; ani agúmba nga pai berewe ki ya, ‘Gaani Mbori,’ fu gu úsunge nga ga berani, te. Awirinyaure nabi inapai be ro.”

⁴ Mi ahúsa pa gayo tikusayo; mi akpi nyemu yo gbe, bambiko gi zinga karaga tihe ti yo.

⁵ Mi adú wa ndomo fu Yisaraere; ko ambúmbo wa ranga, ko arímisa tarãko wa angua Rebanona;

⁶ gako tomahe akúra gbe; ngbanyako adú wa ga eraya, fuõko ki du wa fuõ ngua Rebanona.

⁷ Aboro akáraga tiyo berewe ki niraki tii kirimako, i azúga wa zende ahe ati yo; i ambúmbo wa bakakue, fuõyo ki du wa fuõ imekakue Rebanona.

⁸ Ako Efuraima, gini he mi ka manga na kpiaahe? Mi du nakaraga pai ki ningere fuo ro. Mi wa ngua kupuresa agboroka nga ya, gaoni zuzu ahe naye be re.

⁹ Gu boro du ni iratatamana, ni rugu tini na pa agi apai re; gu ni du ni irainahe, ni ini pa ha; bambiko ga Yekova apai du ni ruru apai, kina ruru aboro napeka fuo ho, ono atindika nakotoka rogo ho.