Gate 38 - Ziazia kekeapai

Pa manga Bamotumo zozo motumo

¹ Ko ki mangi gu bamotumo nga ga zozo motumo rogo gu ngua du wa mbegure; bagizaha adu wa bagiza mbiribe bisue, patihe ki du wa bagiza mbiribe bisue; bagiza pavuruhe biama adu wa sa, basonaha ki du wa bagiza mbiribe biata.

² Ko ki mangi agbangaha ti atukpuhe biama; agbangaha adu na ni wa sa, ko ki dadi he ni sirigi.

³ Ko ki mangi aũ bamotumo dunduko, aakoro, akurungbu, na angorãpasio, na aũkpanawe: aũhe dunduko ko amangi he rogo sirigi.

⁴ Ko ki mangi piomarã rogo sirigi tipa bamotumo, tii gu purangi nadu ti ni kirikiri, si adu ku ari, bebere pavuruhe yo.

⁵ Ko ki tak abenge biama tipa atukpu piosirigi biama, ami adu tipa angbongbo;

⁶ ko ki mangi angbongbo rogo gu ngua du wa mbegure, ki dadi he ni sirigi.

⁷ Ko ki moi angbongbo ku rogo abenge yo nadu ti pavuru bamotumo, ka atinda ha ti ni. Ko amangi he na apurangi vuruhe yo ki du ni ku he.

Pa manga kurungbu zundatise

⁸ Ko ki mangi kurungbu zundatise na ndu mburuhe a rogo sirigi, nga sirigi agu abitiroabi nangia ga agu ade naadungura tiyo ka amanga apai pati ngbadimo bamburoko dungurati.

Pa vurukporo pati Banye

⁹ Ko ki mangi vurukporo; tipa pavuruhe ku sudiyo asiasi aroko vurukporo ki du ni tutu ndindii giri nzibi, bagizaha ki du wa bagiza mbiribe 100;

¹⁰ adangbaha adu wa 20, anduhe ki du 20 a, ni sirigi, ono angorã adangbaha na angbongboho adu ni feda.

¹¹ Bagiza asiasi aroko tipa pavuruhe ku nodiyo ki du wa bagiza mbiribe 100, adangbaha ki du 20, na anduhe 20 a, ni sirigi, ono angorã adangbaha na angbongboho ki du ni feda.

¹² Bagiza asiasi aroko tipa pavuruhe ku dioyo ki du wa bagiza mbiribe 50, adangbaha ki du bawe, na anduhe bawe a; angorã adangbaha na angbongboho ki du ni feda.

¹³ Bagiza asiasi aroko tipa vurukporo ku uroyo ki du wa bagiza mbiribe 50.

¹⁴ Bagiza asiasi aroko tipa pavuru ngbadimo ku bani ki du wa bagiza mbiribe 15, adangbaha ki du biata, na anduhe biata a.

¹⁵ Kina a wo a tipa kura pavuruhe ku bani; bagiza asiasi aroko tipa pavuru ngbadimo vurukporo ku bani kono na ku bani koyo ki du wa bagiza mbiribe 15, adangbaha biata, na anduhe biata a.

¹⁶ Asiasi aroko dunduko pati vurukporo kirikiri adu ni tutu ndindii giri nzibi.

¹⁷ Andu adangbaha ki du ni sirigi, ono angorã adangbaha na angbongboho adu ni feda; ri adangbaha ki du ni dadidadi he ni feda; agu adangba dunduko nadu pangba vurukporo adu ni zunguzungu he na angbongbo ni feda.

¹⁸ Gu asiasi roko kparaba nadu tipa ngbadimo vurukporo si adu ni sunge kendegekendege ahe, rogo gire ni gbaya ha, na gu du ngungungu, na gu du ni zamba ha, na ndindii giri nzibi; bagizaha ki du wa bagiza mbiribe 20, basonaha ki du wa bagiza mbiribe bisue rengbe na kina asiasi aroko vurukporo.

¹⁹ Adangbaha ki du biama; na anduhe biama a, ni sirigi, angorãha adu ni feda, i ki dadi ri adangbaha na angbongboho ni feda.

²⁰ Aneri banye na ga vurukporo kirikiri dunduko ki du ni sirigi.

Pa Marã mbakada ahe tipa Kparakpara Ziazia Ba

²¹ Gere nangia bange agu ahe nadu tipa banye, gu banye nangia ga dezirepai, a wa i agedi pa ha kuti sangba ga Mose rugute, tipa gu mangapai nangia ga aRevi, ku be Itamara nangia wiri Arona nangia boromotumo.

²² Besarere nangia wiri Uri, ki mangi agu ahe dunduko Yekova arugu Mose na paha, Uri nangia wiri Ura ni ngbatunga Yuda.

²³ Oriaba ki du na ko nangia wiri Aisamaka ni ngbatunga Dana; ko nangia bagbakimbia, ni bangbasia sunge, ni bakendege ahe a rogo gire du ni gbaya ha, na gu du ngungungu, na gu du ni zamba ha na ndindii giri nzibi.

²⁴ Gu dahabu dunduko i amangi sunge na ni, rogo gu sunge dunduko nangia ga kparakpara ziazia ba, zavura gu dahabu nangia ga wowoti gamahe, si adu wa ataranda 29, na asekere 730, ringbisi he na pa gu sekere nangia ga kparakpara ziazia ba.

²⁵ Gu feda agu aboro afu, i agedi yo dagba rimbasa aboro yo, si adu wa ataranda 100, na asekere 1,775, i aringbisi he na pa gu sekere nangia ga kparakpara ziazia ba:

²⁶ beka sa tipa boro sa, si nga bebere sekere, i aringbisi he na pa gu sekere nangia ga kparakpara ziazia ba, tipa agu yo dunduko nasusi koyo du agu yo ni i agedi yo, tona ti agu yo du garãyo 20, na ku mbata yo, aboro adu wa akumba 603,550.

²⁷ Agu ataranda 100 re nangia ga feda, si adu tipa zaragasi he ka manga anduhe rogo tipa kparakpara ziazia ba, na anduhe a tipa roko kparaba; anduhe 100 rogo ataranda 100, taranda sa rogo nduhe sa.

²⁸ Na agu asekere re du 1,775, ko amangi angorã na ni tipa adangba banye, ki dadi ri adangbaha na ni, ki mangi angbongbo tipa ha na ni a.

²⁹ Gu sirigi nangia ga wowoti gamahe, si adu wa ataranda 70, na asekere 2,400;

³⁰ ko ki mangi anduhe na ni tipa ngbadimo bamburoko dungurati, na gu bamotumo nangia ga sirigi, na piosirigi tipa ha, na aũ bamotumo dunduko,

³¹ na anduhe tipa vurukporo pati he kirikiri, na anduhe tipa ngbadimo vurukporo na aneri dunduko tipa banye, na aneri dunduko tipa vurukporo pati he kirikiri a.