Gate 15 - Ziazia kekeapai

Pa ga Mose bia tambuahe

¹ AMose ki bi gi bia re na awiri aYisaraere fu Yekova, ki ta bi bia niya, Mi abí bia fu Yekova, bambiko ko nadi be pai ni taasitaasi rimoko; ko nabafu afarasi na abandurira ku baime yo.

² Yekova nga gi ome na gi bia, ko naye ka du ni gi bata; gi Mbori nga gi ko re, mi atámbua ko atambua, nga ga buba Mbori, mi akíisa pa rimoko akiisa.

³ Yekova nga boro sovura; rimoko nga Yekova.

⁴ “Ko nabafu ga Faro angbagidavu ra na gako rimbasa aborosovura ku baime yo; gako siasia abarutirivura arinda ku Zamba Baime yo.

⁵ Dudungura ime afu ku ri yo; i arinda ku dudungura ime yo wa kina mbia.

⁶ Ako Yekova, kumbabero du ni taasitaasi he rogo tandu, Ako Yekova, kumbabero nakuadi avurarani rukutu.

⁷ Mo nadia be agu yo nasa mungu kuti ro ni gu babakere he nga ga taarimoro; mo nakeda ga nzengerenzengere zinga, si ki riti yo arita wa nzinga.

⁸ Ime atumba tihe be gu onga nakura õro yo, angiri baime adungura tihe wa guguda; dudungura abaime akputa akputa bebere baime yo.

⁹ Vurarani aya, ‘Mi adó fuo yo, mi agbía yo, mi akpáraka ũmozi, gi nyemuhe azéra azera be yo. Mi amó gi basape, ki gbarasi yo ni bere.’

¹⁰ Mo aya na ga yuge, baime ki fu ku ri yo; i arinda ku ome baime yo wa dongo.

¹¹ “Ako Yekova, da du wa mo dagba ambori yo? Da du wa mo, du ni taasitaasi ro rogo kparakpara ziazia apai, i nita tambua ro nigunde ti ro, wa mo amangi iiriwoapai?

¹² Mo ataĩ kumbabero, sende ki mbiri yo.

¹³ “Mo angbe ku mbata yo fu agu aboro nga agu yo mo atumo yo ni ga inapai, mo agasi yo ku rogo ga kparakpara ziazia baraka ni ga ome.

¹⁴ Aboro agi he, i nakio akio; imisirihe azi araki Feresete yo.

¹⁵ Si nairiwo airiwo ti agbia Edome; abanamaku nazia abaworimo Moaba; araki Kanana yo abirikpo dunduko ku sa yo.

¹⁶ Gbudagbuda zi yo, gunde nati ti yo; ongo yo aonga kii wa kina mbia mbiko nyanyaki bero, Ako Yekova, daho gamo aboro ka susa ni, daho gamo aboro Ka susa ni, nga agu yo mo angbe yo.

¹⁷ Mo ayé na yo, ki rũ yo ri gamo bagangara. Ako Yekova, si nga gu rago, mo ambakadi tipa ro tigamo ka raka rogo ho, Ako Yekova, si nga gu kparakpara ba, mo anyakasi he ni bero.

¹⁸ Yekova azóga rago nye anye kindi.”

¹⁹ Bambiko ga Faro afarasi andu ku baime yo, na gako angbagidavura na abanduri afarasi, Yekova ki karaga ime berewe ku ba hi he yo si ki fu ku ri yo; ono awiri aYisaraere asi kina ri ugu sende dagba baime.

²⁰ Miriama ki di gaza ku beri, nangia denebi, nga dawiri Arona. Ade ki kuru fuo n dunduko na kundi ki nido gbere.

²¹ Miriama ki karaga pai fu yo ki ya, “Oni bí bia fu Yekova, bambiko ko nadi be pai ni taasitaasi rimoko; ko nabafu afarasi na abanduri afarasi ku baime yo.”

Pa hĩhĩ ime Mara yo

²² Mose ki ngbe ku mbata yo fu aYisaraere, i ki guari pati Zamba Baime yo ki ndu ku rogo gu ngbakungba nga Sura; i ki ndu ngbakungba yo rame ki du biata, ono i abi nga ime wa sa te.

²³ Ho i ada ni ku Mara yo, ka i arengba nga na mbira gu ime nadu Mara yo ya, bambiko si adu ni hĩhĩ he; si du i ayambu rimoho ti ni nga Mara.

²⁴ Aboro ki gumba rimo Mose, ki ya, “Gini he ani ka mbira ha?”

²⁵ Ko ki kpari fu Yekova; Yekova ki yugu ngua fu ko, ko ki ba ha ku ime yo, ime ki du ni wene he. Yekova afu rugapai fu yo yo na pa sarangbanga, yo ko aasadi yo ni a,

²⁶ ki ya fu yo, “Ka oni agía fugo Yekova kakaka nga gaoni Mbori ki nimangi gu pai ru aru bangiriko, ki nidege turoni ka gia gako arugute, ki nika kuti gako rugaapai, mi amánga nga roni na agu akaza mi amangi aEzipeto na ni te; bambiko mi nga Yekova bahusi roni.”

²⁷ I ki da ku Erima yo, yo gugaabi adu ni 12, na angua wa mbira 70; i ki zi bataya pati ime yo.