AEfeso 1 - Ziazia kekeapai

Sanango aboro

¹ Pauro, nga ga Yesu Kristo mokedi mbiko gu pai Mbori akpi nyemu he, Fu ga Mbori aboro du Efesa yo nga aidipa Kristo Yesu ni rengo:

² Undahe dú fu roni na zereda be Mbori nga Barani na Gbia Yesu Kristo.

Maku nga ga Toro rogo Kristo yo

³ I sámbua Mbori nga Ba gaani Gbia Yesu Kristo nafu maku fu rani ni gu maku dunduko nga ga toro rogo agu arago du ngbangbaturũ yo rogo Kristo yo,

⁴ a wa ko asia rani ku rogo ko yo mbata zegino nikaenga, ani du ziazia ki zanga siro barangba ko ni nyemuse.

⁵ Mbori aima ringbisa rani sa du ni awirimbuti fu ko, mbiko Yesu Kristo a wa si angba ti gu pai ko akpi nyemu he,

⁶ sa tambua gu taarimo nga ga gu gako undahe ko afu gbua ku ri rani rogo Wiriko yo.

⁷ Bambiko tumori du fu rani rogo Kristo yo mbiko kureko, vu rani ti tiandika, ku sangba gu ũkumuko yo nga ga Mbori undahe,

⁸ gu ko aya si moi pai fu rani ni tatamana na inahe dũ.

⁹ Ko nayugu gu gbugbu pai nga ga gu pai ko akpi nyemu he, ku sangba gu pai yo nangba ti ko ko aya si du rogo ko yo

¹⁰ sa gu ringbisiringbisi rago ho arago ka diga ni, ka pora ahe apora sa dunduko kina ku rogo Kristo yo, agu ahe du ngbangbaturũ yo na agu ahe du ti kpotosende.

¹¹ Kina ku rogo ko yo, ko Mbori amoi rani rogo ko yo a ni ũkumbo, ki ima ringbisa rani ku sangba ga gu ko pai yo, namanga pai dunduko kina ku sangba gu berã yo nga ga gu pai ko akpi nyemu he;

¹² ya ani du adu sa tambua gako taarimo, agu rani namoi bangirani koyo du Kristo ni mbata.

¹³ Ko gi oni gu pai nga ga rengo rogo ko yo a, nga gu wene pangbanga nga ga gaoni bata, rogo ko yo, wa idi oni pase, i amoi dezire fu roni nga gu Ziazia Toro nga ga kidohe,

¹⁴ Ziazia Toro tigako nga dezire gaani ũkumbo. Ani nikadia ha dunduko ho Mbori ka tumo gako yo ni, sa tambua gako taarimo.

Ga Pauro kparakpe tipa tatamana na inahe

¹⁵ Bambiko gere, mi tigimi, wa mi agi pa gu idapa Gbia Yesu du ti roni, oni nayugo ho ayugo fu ga Mbori aboro dũ,

¹⁶ mi apiriga nga ti tambua he tipa roni, nigumba pa roni rogo gi kpe yo te;

¹⁷ ya ga gaani Gbia Yesu Kristo Mbori, nga Ba taarimo, ko fu toro tatamana na yugoti fu roni sa ina pa ko.

¹⁸ Bangiri kpotoroni yo ha, oni ini gu maabangirise du ti gako yambahe, na gu ũkumuko du ti gu taarimo nga ga gako ũkumbo du rogo gako aboro yo,

¹⁹ na gu babakere gako tandu du sa agu rani naida pase, ku sangba gu mangapai yo nga ga gu nyaka du ti gako tandu.

²⁰ Si nga gu ko amangi ti Kristo ho ko azingisi ko ni be kpio dagba akangba. Mbori ki ya ko sungu pati kumbabeko rogo agu arago du ngbangbaturũ yo,

²¹ tuturũ ri azogoaboro dũ, na asia pa pai, na tandu, na kindo na agu arimo dú i ayamba, kina rogo gi zegino sa te re, rogo gu a nikaye.

²² Ko amoi ahe dunduko ku tii nduko, ki fu ko ko du ku ri ahedunduko fu kanisa

²³ nga boroko, nga gu hisi ko, nga gu ko hisi ahe dunduko.