Marko 7 - Lagano da Isambi

Gomba da mikono dikwe; Lagizo da Mulungu vidibezwa

¹ Wammemela Mafariseo na wayagwe wa wana nzuma, walawile Yerusalemu.

² Wawona wanahina wake vuwoja mandiya na mikono vivija, hawanawile.

³ Kilumbo Mafariseo na Wayuda wose hawajaga kamba hawanawile mikono na kuihangusa; alo lulo luto lulawile uhenga.

⁴ Na vija hagulilo hawavijaga kamba tanhu hawavisunhile; na magweka gayagwe bwando gawabokele wagagoga, kamba kusunha kata, nongo, viteleko na visazi.

⁵ Avo Mafariseo na Wana Nzuma wamuuza, “Habali wanahina wako hawagoga luto lwa iwahenga, komu woja chakuja na mikono vivija?”

⁶ Kawalongela, “Yesaya kafambula vinogile mbuli zenu mweye wabala, kamba viyandikigwe, ‘Lukolo luno lonhogola hamilomo yeka, komu miyoyo yawo inghalila kutali.

⁷ Avo wonidumba bule, kilumbo wolangukiza malagizo galawile kwa wanhu.

⁸ Modileka lagizo da Mulungu, mgoge igambile luto lwa wanhu.’ ”

⁹ Kawalongela, “Vinogile kumwenu kudisegeza lagizo ja Mulungu, mteganye luto lwawo wahenga wenu!

¹⁰ Kilumbo Mose kalonga, Muhulike tataako na mamo wako; kabili yonda yamdumilize tata hebu mamo, vilumba yadanganike kwa kukomwa.

¹¹ Bali mweye molonga, Munhu yahamulongela tataake hebu mamo, Korbani igamba mali ziulonda nikutaze nazo, nimwingha nhosa Mulungu, vinoga.

¹² Avo momgomesa munhu hiyo sikuyamgwelele tataake hebu mamo wake kinhu chochose.

¹³ Avo mtuhula ulonzi wa Mulungu kwa kilumbo cha luto lumgolelwe kulawa iwahenga; kabili mosanghana bwando gagambile na higo.”

Miko ilihi yomgelaga munhu ubweto

¹⁴ Kadikema kabili dija didale ja iwanhu, kawalongela, “Nhegelezeni mose, mvitange!

¹⁵ Kuduhu kinhu kili kunze ya munhu kidahe kumgela ubweto kihengila mgati mmwake, komu gaja gomulawa munhu gago gomgela ubweto.

¹⁶ Kamba kabaha mwene magwiti gakuhulika, nayahulike!”

¹⁷ Imala viyahalawile hana iwanhu na kwingila mngʼanda, wanahina wake wamuuza hala dija.

¹⁸ Kawalongela, “Kumbe na mweye hamnakalagala na dilelo? hamtangile kamba kinhu kili hanze kihengila muinda ya munhu, hakidaha kumgela ubweto?

¹⁹ Kilumbo hakingila mmoyo, komu muinda yeka, cholawila kucholo?” Viyalongile ago, katuhula miko yose ya vyakuja.

²⁰ Kalonga, “Dilawaga mwa munhu ajo dijo dimgelaga munhu ubweto.

²¹ Kilumbo mgati muna imiyoyo ya wanhu zilawaga ngelegeza zihile; ugoni, ubavi, kukoma, ulozi,

²² ugila, udesi, ufutuzi, nghimwa, migongo, maligo, matopa, wehu.

²³ Ubananzi hiwo wose wolawa mgati, kabili uwo umgelaga munhu ubweto.”

Pinga wa Kikanani

²⁴ Viyasegele haja, kachola nyenza za Tiro, kengila mngʼanda, kwa mzoko kalema kutangika na iwanhu, bali havidahike kwifisa.

²⁵ Mhunde baho mtwanzi imonga kahulika kamba kabaho, na heyo kana mwana mwene mzuka wihile; keza kamgwila hamagulu gake.

²⁶ Na yuja mtwanzi kakala Mgriki, kabila jake Msirofoniki; kampembela yawinge uja umzuka umulawe biti wake.

²⁷ Kamwidika, “Leka tanhu iwana wegute, kilumbo havilumbile kusola uzi wa iwana na kuwasila vibwa.”

²⁸ Na heyo kedika kamulongela, “Wona Mndewa, na vija ivibwa navyo vijaga vili hasi ya meza, visigazwe na ivyana.”

²⁹ Bahaja kamulongela, “Kilumbo cha mbuli ino genda, umzuka umulawa biti wako!”

³⁰ Kasegela kachola kungʼanda yake, kamvika ija immhale yawasile mulusazi, na uja umzuka umala kumulawa.

Bubuwi msowa gamagutwi kahona

³¹ Viyalawile mnzimbaka za Tiro, kabita Sidoni kavika kuli bahali ya Galilea, nyenza za Dekapoli (viwambo Mulongo Umwe).

³² Wamgalila munhu kihuli, msowa magutwi, wampembela yamwikile mkono.

³³ Kamsegeza muna didale ja wanhu, wakale waiyeka; kavika vidole mmagutwi gake, imala katema mate, kamzabika mululimi.

³⁴ Imalabaho kalola uchana kuulanga, kadudumka mmoyo, kamulongela, “Efata!” kihindukizo chake, “Dohoka!”

³⁵ Baho magwiti gake gavubuka, na mige ya lulimi lwake idohoka; kimilo kikija kasonga kulonga goya.

³⁶ Kawagomesa sukuwamulongele munhu; viyemela viyawagomese nghani, waja wabanza kuzipwililisa mbuli zose.

³⁷ Na wanhu wakangawala nghani, walonga, “Kasanghana vyose vinogile! Waja wasowa magutwi kowatenda wahulike, na mabubuwi wolonga.”