Marko 3 - Lagano da Isambi

Mkono uholole

¹ Viyengile chusa muna ingʼanda ya nhambiko, mkala na munhu mwene mkono uholole.

² Wamsepa kamba komuhonya siku da ukuhumula, kwiza wamdununze.

³ Kamulongela yuja mwene mkono uholole, “Inuka wize hano hagati!”

⁴ Imalabaho kawauza, “Hano vilingana siku da ukuhumula kutenda ganogile hebu kutenda gehile; kuhonya loho ya munhu, hebu kuikoma?” Na hewo wavudala.

⁵ Kagwa lusango, kawalola waja wali baho, kuno yokiyalala kwa ugaga wa miyoyo yawo; kamulongela yuja imunhu, “Golosa mkono wako!” Viyaugolose uja umkono, ugaluka ubwela mgima.

⁶ Mafariseo wahalawa haja, mhunde baho watenda mzengwe hamonga na wanhu wa Herode, giladi wamkome.

Watamu bwando wambabane Yesu

⁷ Yesu kachola hamonga na wanahina wake, wavika hamngwazo ya ibahali; na dale da wanhu bwando nghani walawile Galilea, wamkoleleza.

⁸ Kabili wamgendela wanhu bwando walawile Uyuda, Yerusalemu, Idumea, mwambu wa Yordani na nyenza za Tiro na Sidoni, kilumbo wagahulika gose gayatendile.

⁹ Kawalongela wanahina zake wamgalile ngalawa, kilumbo cha madale ga wanhu, sukuweze kumbabana.

¹⁰ Kwa mzoko kawahonya bwando; na wose wene kugazigwa wamfugamila mavindi giladi wamkwase bule.

¹¹ Viyemela wanhu wene mizuka michapalisi wahamona, wamfugamila mavindi woguta nyangi wolonga, “Gweye gwegwe Mwanage Mulungu.”

¹² Kawagomesa nghani, sukuwambwililise.

Matwaga gawo wekigwe watumigwa

¹³ Imalabaho Yesu kakwela kudigongo, kawakema woyolonda mwenyecho; wagenda kumwake.

¹⁴ Kaweka mulongo umwe na wabili, wawe hamonga na heyo yawatume kuupeta Usenga Unogile,

¹⁵ kawengha mhiko za kuwinga mizuka.

¹⁶ Waja wayekile mulongo umwe na wabili iwo wano, Simoni iyamwinghile twaga ja Petro;

¹⁷ Yakobo na ndugu yake Yohana, wanage Zebedeo, kawengha twaga ja Boanerge, kihindukizo chake Wana wa Kidinhilo.

¹⁸ Vivija Andrea, Filipo, Bartolomeo, Mateo, Toma, Yakobo mwanage Alfeo, Tadeo, Simoni Mkanaani;

¹⁹ na Yuda Iskariote kwiza yonda yamuhonze.

Ndugu za Yesu; Beelzebuli zinhu gaga

²⁰ Viyengile mngʼanda, dale da wanhu diilundiza chusa; wenyego walemelwa hata kuja mgate.

²¹ Ndugu zake vuwagahulike, walawa weza kumsola, kwa mzoko walonga, “Kengililwa na luwege.”

²² Bali hewo Wana Nnzuma walawile Yerusalemu walonga, “Kana Beelzebuli Mkulu wa imizuka, kabili kwa mhiko zake zizo yowingila mizuka.”

²³ Kawakema, kawalavila mizungu, “Mzuka kodahaze kuwinga mzuka miyage?

²⁴ Undewa uhaigomba wenyego kwa wenyego, honda ukale undewa hiwo.

²⁵ Na ngʼanda ihaigomba wenyego kwa wenyego, hondaime ngʼanda hiyo.

²⁶ Na hewo mzuka uhasonga kwigomba wenyego, haudaha kwima, komu ohumigwa.

²⁷ Haduhu munhu yodaha kwingila mngʼanda ya zinhu gaga, yakavisole vinhu vyake, kamba tanhu handuse kudidaza dija dizinhu, kileka yasole vinhu vyake vili muja mngʼanda. –

²⁸ Ihoko nomulongelani, Vilema wana wa wanhu wosegezelwa gose na igambe ga kumbeza Mulungu gonda walonga.

²⁹ Komu yonda yambeze Loho Yangʼalile honda yasegezelwe milongo yose, bali tozo jake kopanga najo digunge.”

³⁰ Kakala kawalongela ago, kilumbo vuwalongile, Kana mzuka mchapalisi.

Mamo na ndugu za Yesu womzahila

³¹ Imala baho mamo wake na ndugu zake weza, wema kunze, watuma munhu kumwake yamkeme.

³² Na dale da wanhu dikala dimbiduke; wamulongela, “Lola mamo wako na ndugu zako wabaho hanze wokuzahila.”

³³ Kedika kawalongela, “Mamo wangu yuyo yalihi, na wandugu zangu wawalihi?

³⁴ Kawalola wakalile wambiduke kuno na kuno, kalonga, Lola wano wawo mama zangu na ndugu zangu!

³⁵ Munhu yoyose yondayatende goyolonda Mulungu, yuyo ndugu yangu, lumbu jangu na mamo wangu!”