Marko 2 - Lagano da Isambi

Mtamu wa kunyolila

¹ Siku vizibitile, kengila chusa Kapernaumu, wanhu vuwahulike kamba kamumo mngʼanda.

² Bwando weilundiza, hawenele muja mngʼanda na hamulango. Kawapetela dija dilonga.

³ Weza wanhu wamgalile mtamu wa lunyondenyonde, yapapigwe na wanhu wane.

⁴ Vuwalemelwe kumwingiza kilumbo cha wanhu bwando, wafumula ikiswili aho hayali Yesu; vuwamalile kutobola, waluhulumusa ulusazi luyatambalale yuja imtamu wa kunyolila.

⁵ Yesu viyawene nhamanilo yawo, kamulongela mwene lunyondenyonde, “Mwanangu, matozo gako kusegezelwa.”

⁶ Kumbe vija wana Nzuma wakala mumo, wasonga kuwalanga munda mmwawo,

⁷ “Gano kogalongaze? Kombeza Mulungu! Yalihi yodaha kusegeza matozo kamba si Mulungu yaiyeka?”

⁸ Na heyo katambula mloho yake kamba wogelegeza hivo, kawalongela, “Habali mgesa hivo mmiyoyo mmwenu?

⁹ Kibuhile kilihi, kumulongela mwene lunyondenyonde, Kusegezelwa matozo gako, hebu kulonga, Inuka usole lusazi lwako uchole?

¹⁰ Komu giladi mvitange kamba Mwanage Munhu kana mhiko muisi za kusegeza matozo,” kamulongela mwene lunyondenyonde,

¹¹ “Nokulongela, inuka widwike lusazi lwako, uchole ukaye!”

¹² Mhunde baho kenuka yokidwika lusazi, kahalawa hameso gawo wose; wose wasinhuka wamtunila Mulungu, walonga, “Magweka gali vino hatunagona ngʼo.”

Lawi viyakemigwe

¹³ Kalawa kabili, kachola mmamwegambwega mwa ibahali. Dale jose ja wanhu dimuwinza, kuwalangukiza.

¹⁴ Na viyakalile yotembela, kamona Lawi mwanage Alfeo, kakala folozani yowila kodi; kamulongela, “Ngholeleza!” Na heyo kenuka, kamuwinza.

¹⁵ Na viyakalile mngʼanda ya Lawi hana gamandiya, wawila kodi na wene matozo bwando wakala hana gamandiya hamonga na Yesu na wanahina zake, kwa mzoko bwando wamkoleleza.

¹⁶ Wana Nzuma wa Kifariseo vuwamuwene kamba koja hamonga na wene matozo na wawila kodi, wawalongela wanahina wake, “Kumbe koja hamonga na wawila kodi na wene matozo?”

¹⁷ Yesu viyagahulike kawalongela, “Waja wolonda mganga iwo watamu, siwo wagima; sizile kuwakema wene ihoko, komu wene gamatozo.”

Gomba da kuleka ukuja

¹⁸ Wanahina wa Yohana na Mafariseo wakala na luto lwa kuleka kuja; weza wamulongela, “Habali wanahina wa Yohana na wanahina wa Mafariseo walekaga kuja, komu wanahina wako hawalekaga kuja?”

¹⁹ Yesu kawalongela, “Wagonekwe halusona wadahaze kuleka kuja, kikomo Mlawila mhambe yahali hamonga na hewo? Mazuwa gose vowokala na Mlawila mhambe, hawadaha kufunga.

²⁰ Komu mazuwa gokwiza honda wasegezelwe Mlawila mhambe; siku hiyo baho honda waleke ukuja.

²¹ Haduhu munhu yogela kinzazi cha nguwo ya sambi muna inghanzu ilalile; kamba yahatenda hivo, kija ikinzazi cha isambi chodega hose hasomigwe muna inghanzu ilalile, avo zonzo jake dokuwa kulu nghani.

²² Kabili haduhu munhu yogela ugimbi wa sambi mmiyandulo ilalile; kilumbo yahagela, ugimbi otula imiyandulo na kwitika hasi, na miyandulo yobanangika; komu ugimbi wa nyipa ugelagwa mmiyandulo ya sambi.”

Kuigoga sabato

²³ Kakala yobita muna imigunda siku ja ukuhumula, na hewo wanahina wake wasonga kubasiliza nzila, wabena lukuso lwa uhemba.

²⁴ Mafariseo wamulongela, “Lola mbona wotenda gagambile umwiko siku da ukuhumula?”

²⁵ Na heyo kawalongela, “Hamnasoma tanhu Daudi viyatendile, viyonile nzala heyo na wanage?

²⁶ Baho kengila mngʼanda ya Mulungu kwa Mkulu wa nhambiko Abyatari, kaija imigate ija ikilwe Mndewa; na kuija ija migate mwiko, komu ijagwa na Wakulu wa nhambiko waiyeka; ilawabaho kawengha na wayage wakalile hamonga na heyo.”

²⁷ Kawalongela, “Siku ja ukuhumula dikigwa giladi ja munhu, komu munhu hekigwe giladi ja Sabato.

²⁸ Avo Mwana wa Munhu yuyo Mndewa wa Sabato.”