Masmur 149 - Yawa

Ransyeran kangkaman anasineko

¹ AMISY ararimbe! Wakinyo ransyerano nggwanyine raijo AMISY Ai! Inya, vatano wasatawandi watavondi Amisye Ai weap, wapo ararimbe no wapa anugane rai!

² Inya, Israel, wasanayanambe weye Wepi Po wasanari; Inya, vatano wana no Sion, wasananibe weye wapa Akarijo Titi pije!

³ Wasarer indamu Apa tame rararimbe, weapo itari raeyan muno airape ranepat indamu AMISY ararimbe!

⁴ Weye AMISY anuga no irati Apa kawasae mai; muno Wepi Po anasineko marova mai raunanto irati vatano manuga mpaaje mai.

⁵ Indati Apa vatano matawandi utavondi Aije nawamo umananibe weye Po marova apinde to, muno ukiny manayanambe no arono unaki.

⁶ Koveamo wenao ukangkamambe Amisye Ai rave manamoto manakoeve rai, umba wo anaiyu nsansinao raijaro maneme rai.

⁷ Indamu wo marova rasakinavo susyo wanave Amisye Ai jewene mansai, muno mangke raugaje irati susye kotaro wanave Ai jewene mansai.

⁸ Indamu wo poor besi raasaro awa akarijo titi mai, muno waijo besi veano awa akarijo wo nuge raijanande maokaisy.

⁹ Maisyare omaisy, wo mangke raugaje susyo mine so mai, mamaisyo Amisye Apa dapatimuge rai. Omirati kovo manakoe Amisye Po raugaje Apa kawasae matawandi utavondi Ai mansai mijem. AMISY ararimbe!