Zephaniah 1 - Yupik Bible

¹ Qaneryaraq una Atanrem cikiutekelqaa Zephaniah-mun, Josiah Ammon-aam qetunraa atanrullrani Judah-mi. (Zephaniah kinguveqaa Angayuqam Hezekiah-m ukutgun: Amariah, Gadeliah, Cushi-llu.)

Erneq Atanrem Cuqcillerkaa

² Ataneq qanertuq, “Piunriqataranka cat tamalkuita nunam qainganelnguut,

³ yuut tamalkuita, ungungssiaraat, yaqulget, neqet-llu. Piunrillerkaatnun tekiceciiqanka assiitellriit yuut. Piunrirciqanka yuut tamalkuita, atauciungraan uitatevkenaku. Wiinga, Ataneq, qanertua.

⁴ “Anucimirqecetaarciqanka Jerusalem-aam yui tamalkuan-llu Judah. Piunrirciqaqa tamalkuan agayulallrat Baal-amun tuani, kia-llu umyuaqenqiggngaitai agayulirtet kevgiulallret elliinun.

⁵ Piunrirciqaqa kina imna enem qainganun mayurluni agayulria akertem̄un, iralumun, agyanun-llu. Cali-llu piunrirciqanka agayutulit wangnun ukvernarcarilriit-llu piciuniluteng wangnun, tau͡gken cali ukvernarcariaqluteng Molech-aam agayutnguam atrakun.

⁶ Piunrirciqanka kingupiallret maligtaqunrirlua-llu, taiyunrilnguut-llu wangnun wall'u kaigaviksuunii ciuliqagtesqelluteng.”

⁷ Erneq canimellirtuq Atanrem cuqcillerkaa; taumek nepailkici ciuqerrani. Ataneq uptuq tunenaluki yun'i tuqutarkatun inglukestait-llu taisqelluki uayaryarturluku Judah.

⁸ Ataneq qanertuq, “Tuani ernermi tuqurqillratni, anucimirqecetaarciqanka atanerruat, angayuqam-llu qetunrai, tamalkuita-llu atulalriit allat nunat piciryaraitnek.

⁹ Anucimirqecetaarciqanka-llu tamalkuita agayumanrilnguut piciryarait aturluki agayulalriit, tegliuraqluteng-llu tuquciaqluteng-llu imirnaluku atanermeng enii tegleganek.”

¹⁰ Qanertuq-llu Ataneq, “Tuani ernermi qialrianek niiciiquci Fish Gate-am tungiinek Jerusalem-aami. Qialuteng neplilrianek niiciiquci nunarpiim nutaraunran tungiinek kavcallagalrianek-llu qemit (qemini uitalriit) tungiitnek.

¹¹ Qiaci neplirluci niiskuvciu man'a, nunarpiim ilutunrani (ungalalirnerani) uitalriani, tua-i-wa kupcaat tamarmeng tuquciqngata!

¹² “Taum nalliini kenurrarlua yuarciqaqa Jerusalem-aaq. Anucimirqecetaarciqanka canganaicukellriit nalirrugutailnguut-llu, waten ellmeggnun qanlalriit, ‘Ataneq-wa assilriamek wall'u assiilngurmek pingailnguq.’

¹³ Tukuutaitnek uayarciqait enait-llu piunrirluki. Ellaita eneliameggni uitangaitut merngaunateng-llu wine-amek nauceciillermeggnek.”

¹⁴ Angelria Atanrem ernerkiuraa canimelliuq, cukamek agiircami canimelliqapigtuq! Erneq tauna cungarninarqellriatun ayuqeciquq, imkuunge'rmeng alingilkacagaqengraiceteng anguyagtet qayagaurciqut nanikualuteng!

¹⁵ Erneq tauna alingnarliuciquq, picurlagnarqellriaruluni nanikuanaqluni; erneqluku caunriumallerkam navgurimallerkam-llu, tan'gercen̄ani alianaqluni, tungurpak-llu amirlirluni,

¹⁶ erneq imarluni anguyiim cupu'uryarainek anguyagten̄ek-llu qayagpagalrianek anguyagcuutmeggnek curullermeggni asvairqumalriit nunarpiit qertulriit-llu nayurviit.

¹⁷ Ataneq-llu qanertuq, “Nanikuanarqellria tuc'eciiqaqa yugnun tarratelluki caavtaarluki cikmiumalriatun. Assiilngillruut wangnun, taumek waniwa augat kuvumaciquq mertun, temait-llu aruluteng nunam qaingani.”

¹⁸ Tuani ernermi Atanrem eq'uqertellni nasvakaku, qerrirliutaita suulutaat-llu anirturngaitait. Ellarpak tamalkurmi piunriumaciquq kenrakun eq'uqertellran. Alqunarmek unguvanrirceciiqai tamalkuita unguvalriit nunam qaingani.