Titus 3 - Yupik Bible

Calianun Assilrianun Upingasqutet

¹ Neq'angevkarki yuut ataneqesqelluki atanruvilget pinilget-llu, niisngasqelluki-llu atanrulriit, upingaluteng calianun assilrianun,

² yuk iqlutun qanrutkesqevkenaku, qanaataaresqevkenaki, tau͡gaam pillagavkenateng, yuut tamaita qigcikluki.

³ Wangkuta-llu tuaten ayuqucingqellruyaaqngamta mat'um ciungani, usviinata, niicugpek'nata, alangqaluta, aglumacinun anglanarqelrianun-llu kevgauluta, umyuarrliquciyarakun ciknayarakun-llu yuuluta, uumikumaluta uumikucugluta-llu atunem.

⁴ Tau͡gaam tamatum kinguakun Agayutem Anirturtemta naklekutii kenkii-llu alairan yugnun,

⁵ anirturaakut, elluangnaqucim caliarikun atullemteggun pivkenani, tau͡gaam takumcukutmikun eruryarakun ayuqucilinqiggnarqelriakun, Anernerem-llu nutaraurciyaraakun.

⁶ Tauna wangkutnun kuvellrukii amlleriluku Jesus-aakun Christ-akun Anirturtemteggun,

⁷ tuaten ellualriarurcimaluta naklekutiikun neryuniurutkucimcetun unguva nangyuilnguq paitarkaqsagulluku.

⁸ Man'a qanlleq piciuguq. Makut tamalkuita eguaquutekesqumaanka, qacuirutevkenaki. Agayutmun-llu ukvelriit eguaquranka assilriit caliat ciumurutesqelluki. Makut atawaugut pikaniutnguarkauluteng-llu yugnun.

⁹ Tau͡gaam neguraluki nalirrugnarqellriit apyutngulallret, ciuliat-llu kinguvallrit, naigtaarucaraq-llu, qanemyuugaucaraq-llu alerquutet pitekluki, ikayuutngungailata tamakut, catnguvkenateng-llu.

¹⁰ Yuk maligarutenrilnguq ciuqlirmi, aipaani-llu ayuqucirtuutminek ciuniunrilkan, tauna pegesgu.

¹¹ Nalluvkenaku tuaten ayuqelria iqlutmurculria assiilngiryulria-llu ellminek pinarqelriarurtelartuq.

¹² Ayagteskumku elpenun Artemus wall'u Tychicus, ullangnaqia Nicopolis-aamun, tuani uksurpak uitaqataama.

¹³ Zenas-aaq alerquutnek elisngalria, Apollos-aaq-llu ayakagnek ikayurkek cumiggluten, canek nuuqairullukek.

¹⁴ Ilaput-llu eliteski caliarkaitnek assilrianek atu'urkanek; tuaten atsaitenritnaurtut.

¹⁵ Nayurtem̄a tamarmeng umyuaqutmek tuyuraatgen, ukverkun-llu kenkesteput umyuaqutmek tuyuranka. Naklekutem nayurlici tamarpeci.