Titus 2 - Yupik Bible

Elitnaurutet Piciulriit

¹ Tau͡gaam, elpet, elitnaurilaqina elitnaurutnek piciulrianek.

² Qanrut'larki angutet temyigilriit umyuangqellerkaatnek, ellatuluteng, pitalqeggluteng, ukverkun piciuluteng, kenkakun pektayiitnakun-llu.

³ Arnaurtellriit-llu ayuqmun yuucirramegteggun murilketaqilit qigcigyugluteng piciliqengtuliuvkenateng, taangaryunqegpek'nateng elitnauristen͞guluteng-llu assilrianek.

⁴ Ayuqucirturnaurait ayagyuat arnat umyuangqerresqelluki, uingit kenkesqelluki, irniarit-llu kenkesqelluki,

⁵ umyuartusqelluki menuunaki, enaitni aulukisten͞guluki, assirluki, nakmiin-llu uingitnun maligtaquurautesqelluki, Agayutem qaneryaraa caunrilkumanritnaurtuq.

⁶ Ayagyuat-llu angutet eguaqurki umyuangqerresqelluki.

⁷ Elpet-llu cat tamaitni cuqyutngukina caliarpegun assilriatgun; elitnaurutevgun qaneryaraq allaurtevkenaku ellatuluten, piciuluten,

⁸ qanraqluten-llu piciulrianek, qanernarqenrilngurnek, ingluten-llu kiaruciitnaurtut canganarqutevnek qanerkailkuneng.

⁹ Eguaqurki pisten͞gulriit, atanrit niisngasqelluki, ilukegcivkaasqelluki, kiumrasqevkenaki,

¹⁰ tegleksaunateng-llu, tau͡gaam tamalkuitgun piciuluteng, tamaitgun-llu tangenqegcinarqevkarnauraat Agayutem Anirturtemta elitnaurutii.

¹¹ Tua-i Agayutem naklekutii alairtuq anirtuutnguluni yugnun tamalkuitnun.

¹² Ayuqucirturluta Agayutmun niisnganrilnguunriisqelluta, nunamiutaat-llu ayarinarqelriit atunriisqelluki, ellami mat'umi yuuyunarqaakut umyuangqerrluta, elluarrluta-llu, Agayun-llu qigcikluku.

¹³ Neryuniurun-llu atawauqapigtellria, Agayutem caprilnguum, Anirturtemta-llu Jesus Christ-am ucurnarqucian alaillerkaa neryuniurutekluku.

¹⁴ Ellii ellminek cikiutekleq, pitekluta wangkuta anirturnaluta elluanrilngurnek tamaitnek, yugnek maaken pikaminek caarrluirinaluni assilriim atullerkaanun cumigtarkanek.

¹⁵ Makunek qallaten, eguaquriluten-llu inerquriluten-llu piyunarqetacirpetun. Caunrilkevkaryaqunak yugnun.