Titus 1 - Yupik Bible

Yuuluaqaasqutet

¹ Wii, Paul-aaq, Agayutem pistiini Jesus-aam-llu Christ-am apostle-aarani, Agayutem cucukek'ngain ukverat pitekluku piciunrem-llu nallunriluaqallra, Agayutem qigcikellrakun;

² unguva nangyuilnguq neryuniurutekluku Agayutem iqluyuilnguum akqutkellra ellarpak ayagnengvailgan;

³ tau͡gaam pillerkaq pinarian qaneryarani nasvagaa qalarutkellrakun, wangnun tunumalriakun Agayutem Anirturtemta ellimerruciatun.

⁴ Titus-aamun nakmiin qetunrangutemnun ukverkun; naklekun, takumcukun-llu, uitanqegcin-llu Agayutmek Atamten̄ek, Atanemten̄ek-llu Jesus Christ-amek Anirturtemten̄ek.

Allgiliyat, Ikayurtet-llu Ayuqucirkaat

⁵ Man'a pitekluku Crete-amun unitellruamken, cat caliaput elpenun qaqivsiaresqelluki, kenciknarqevkarisqelluten-llu nunani tamaitni ciulirnerkaitnek elkartellrucimtun.

⁶ Qanernailkan yuk, ataucimek nuliarluni, irniari-llu ukverumakata, aprumavkenateng-llu akusrartellrianek inerciigalngurnek-llu.

⁷ Tua-i allgiliyaq qanernarqutaitarkauguq, Agayutem kevgaatun, ciumuarpek'nani, qenqerrngianani, taangaryunqegpek'nani, callugyunqegpek'nani, tukuuyunqegpek'nani-llu.

⁸ Tau͡gaam allaniuryunqeggluni, assilria kenekluku, ellatuluni, elluarluni, menuunani, pitalqeggluni-llu.

⁹ Qaneryaraq piciulria tegumiaqluku elitnaurutkumallruciatun, piyunarinaurtuq elitnaurutkun piciulriakun, qarutellerkaatnek ukverrluki-llu kiucirtuaralriit.

Iqlutun Ayuqucirturilriit

¹⁰ Amllerata inerciigalnguut, picimegcetun qallatellriit alarcetaarilriit-llu, arcaqerluteng nuugiumalriit.

¹¹ Taukut qanrit umegnarqut, picurlagcet'laitki yuungnaqellriit tamarmirrluki, elicungcariaqluteng pisqutngunrilngurnek, aki pitekluku.

¹² Ilakeng'e'rmiki ellaita prophet-aarit iliita qanrutkellrui, “Crete-armiut-gguq iqluuryukapigtut, ungungssitun alingnaqluteng, qessanqerruluteng neryunqeggluteng-llu.”

¹³ Tamana qanlleq piciuguq. Taumek inerqurki mulngakevkenaki, ukverkun piciunaurtut.

¹⁴ Jews-aat qanengssait niicugnisqevkenaki, yuut-llu piciunermek avtellriit alerquutait.

¹⁵ Menuilngurmun cat tamarmeng menuitut; tau͡gaam tamakunun carrluurcimalrianun ukvenrilngurnun-llu menuilngurtaituq. Tau͡gaam umyugaat umyuaqegtaariit-llu tuaten caarrluurtuq.

¹⁶ Nallunairilaryaaqut Agayun nallunritniluku, tau͡gaam caliamegteggun mecirautekaat, qavilinaqluteng, niisngayugpek'nateng-llu, tamalkuitnun-llu calianun assilrianun atuunritqapiggluteng.