Ruth 3 - Yupik Bible

Ruth-aq Nalaqutuq Uikaminek

¹ Tamatum kinguaraani Naomi-m Ruth-aq qanrutaa, “Panimaa, uikarpenek pingnaqutnarqamken nakmiin pivnek enengqerrniartuten.

² Iciwa tauna angun Boaz-aq, nauwa arnat calistai ilagallrukten, tungayakarpuk. Kitaki niicugninga. Ataku caranglluiriciquq mukaarkanek.

³ Ervuqaa, tepkegcarluten-llu, aturarpet-llu assinqurraitnek all'uten. Ayagluten-llu carririvianun, tau͡gaam elliinun nallunrircecaqunaku tamaanlucin, nerumarikan tau͡gaam mer'umarikan-llu.

⁴ Nallunairturniaran natmun inartellra, qavaqan ullagluku ulia qakeggluku inarrniartuten it'gain caniatnun. Qanruciiqaaten qaillun picirkarpenek.”

⁵ Ruth-am kiugaa, “Qanellren tamalkuan maliggluku piciqua.”

⁶ Tua-i Ruth-aq ayagtuq tuavet carririvigmun, tuaten-llu piluni cakimi alerqullratun.

⁷ Boaz-aq nerumariami mer'umariami-llu camek umyuarrlugutaitellruuq. Tamaani-llu mukaarkanun quyungqalrianun inarrluni qavartuq. Ruth-am nepailcaarluni ullagaa, ulia-llu qakeggluki it'gain caniatnun inarrluni.

⁸ Unuumainanrani Boaz-aq alqunaq tupakartuq, mumigtellermini-llu alangaartuq arnamek inangqalriamek it'gami caniatni.

⁹ Boaz-am aptaa, “Kituusit?” Kiugaa, “Ruth-augua. Canimenak tungayakngamken aulukarkaqerpenga. Taumek kassuusnga.”

¹⁰ Tua-llu Boaz-aaq qanertuq, “Atanrem atawaqertelliten. Waten piluten nasvagan arcaqakilriarucin ilavnek pinruluku cakivnun pillerpenun. Ayagyualriamek uikarpenek yuaryugngang'e'rpet arrsaulriamek wall'u tukuulriamek tuaten pillrunrituten.

¹¹ Kitaki umyuassuugaryaqunak, Ruth. Pisqelten tamalkuita piciqanka; yuut tamarmeng wani nunarrarni nallunriluciacetun elpet assilriaruuten.

¹² Tua-i piciuguq canimenii tungayakuciqa ikayuyunaqluten, tau͡gaam angucetangqertuq wangni canimellruluku tungayakestevnek.

¹³ Maantauraa unugpak, unuaqu nallunairniarput taumun tungayagpenun pisquciumallermikun auluksugngacin. Tua-i piyugngakuni canrituq; tau͡gaam pisciigalkan wani-wa akqiunga unguvalriakun Atanerkun wiinga ikayurarkauluten. Tuani inangqauraa unuakurnatkaanun.”

¹⁴ Tua-i it'gain caniatni inangqauq, tau͡gaam tanqigivailgan maktuq Boaz-am kitumun nallunritesqumanrilaku tuantellrucia.

¹⁵ Boaz-am qanrutaa, “Ulikutan yuuluku sagesgu wavet.” Tuaten pian Boaz-aq kuviuq yuinaak malruk qulnek cipluku (50) uspernek mukaarkanek qainganun, ikayurluku-llu equlirluku taumek. Nutaan utertuq nunarrarnun tauna iqukluku.

¹⁶ Kingunerminun tekican cakian aptaa, “Tua-llu-qaa qaillun ayuqa tamana pillren?” Ruth-am-llu qanemcitaa Boaz-am pillrinek tamalkuitnek.

¹⁷ Cali-llu qanerluni, “Qanrutaanga-llu camek tegumiarunii elpenun utertesqumavkenii, tua-llu cikiraanga ukunek mukaarkanek barley-nek.”

¹⁸ Naomi-m qanrutaa, “Kitaki nerinisngialliqsaqunak nallunrirnatkarpenun qaillun mat'um iqungqerrarkaucianek. Boaz-aq unuamek arulairngaituq man'a elluarinatkaanun.”