Ruth 2 - Yupik Bible

Ruth-aq Caliuq Naucetaarviani Boaz-am

¹ Naomi tungayangqertuq aterluni Boaz-amek, tukuuluni takarnaqluni-llu ilakluku uillran Elimelech-aam.

² Erenret iliitni Ruth-am qanrutaa Naomi, “Ayagcessnga naucetaarvignun avurniartua mukaarkanek calistet katagaitnek. Nalaqutenrilngaitua iliitnek calisqumastekamnek naucetaarvimini.” Naomi-m kiugaa, “Kiiki tuaten pi, panimaa.”

³ Ruth-aq tua-i ayagtuq naucetaarvigmun calistet-llu kingunratgun avurluni mukaarkanek pinritellritnek. Cuna-wa naucetaarvik tauna Boaz-am piklinikii.

⁴ Caqerluni tamatum kinguakun Boaz-aq tekituq Bethlehem-aamek calilriit-llu aryuqutmek pii. Qanerluni-llu ellaitnun, “Atanrem nayurlici!” Taukut-llu calistet kiuluku qanerluteng, “Atanrem atawaqaasqelliten!”

⁵ Boaz-am aptaa calilrianek ciuliqagcilria, “Kituuga ingna nasaurluq?”

⁶ Calilriit-llu ciuliqagtiita kiugaa, “Allanruuq tailleq Moab-amek Naomi maliggluku.

⁷ Apelcillruanga kingunrirturyugluki calistet avurluni mukaarkanek. Unuakuarmek ayagluni calillruuq, nutaan ava-i arulaiqertuq mernuinercirluni uqisviim acianun piluni.”

⁸ Tua-llu Boaz-aq Ruth-amun qanertuq, “Ayuqucirtuqerluten qanruarteqernaamken. Allani naucetaarvigni pivkenak maani tau͡gaam avulaqina. Calillgucirki arnat maani;

⁹ kepliarilriit nani piciat murilkurluku nayurluki pilarniaten. Alerqullruanka angutet calistenka qaillun piqaasqevkenak. Meqsugaqavet-llu mel'arniartuten mervignek imillritnek.”

¹⁰ Ruth-aq ciktuq kegginaminek nuna agturluku, Boaz-amun-llu qanerluni, “Ciin tua-i nakleksia? Ciin takumcuyugcit allanermek?”

¹¹ Boaz-am kiugaa, “Niitellruanka cat tamalkuita piuralten cakivnun uin tuqurraanranek. Nallunritaqa-llu unitellrucigken angayuqaagken nakmiin-llu nunan, maavet-llu taillren uitanaluten yugni ciungani nallunriteksailkevni.

¹² Atanrem nunuliqiliten tuaten pillren pitekluku. Nunuliutengkina tamalkuulriamek Atanermek Agayutiinek Israel-aam, ullallerpenek cacetuquteksugluku!”

¹³ Ruth-am kiugaa, “Naklegtaqapigtuten wangnun. Qanenqegcaaraullua nalluyuryuaralqa utumarivkaran, cakegtaunrilngerma elpet pistevni.”

¹⁴ Nernarian Boaz-am qanrutaa Ruth-aq, “Tailuten kelipamek neri akurrluku avukaanun.” Tua-i calistet ilalirluki aqumuq, Boaz-am-llu cikiraa uucimalriamek neqkaanek. Ner'uq-llu camirrluni ilakuiluni-llu.

¹⁵ Anumarian Ruth-aq avuryarturluni, Boaz-am alerqurai calistet, “Avurceskiciu qillerqaat akulekengraatgu, ancurtungararutekaanek-llu qanqeryaqunaci.

¹⁶ Quyurtaarpeci-llu ilait igcetaqluki avularniarai.”

¹⁷ Tua-i Ruth-aq avurtuq naucetaarvigmi atakullra tekilluku, caranglluirraarluki maaten piuq uqamangqellinilriit avullri yuinaq tallimanek cipluku (25).

¹⁸ Ut'rutai-llu uitavimegnun nasvilluku-llu cakini qaillun amllertalrianek avullminek. Cali-llu cikirluku nerrlermini ilakuallminek.

¹⁹ Naomi-m-llu aptaa, “Naken avurcit makunek mukaarkanek unuamek? Kia naucetaarvianek avullrusit? Agayutem atawaqertelliu tauna angun nallunguartekenritellren!” Tua-i Ruth-am qanrutaa Naomi avullruniluni Boaz-am naucetaarviani.

²⁰ Naomi-llu qanertuq, “Atanrem atawaqertelliu Boaz-aq! Atanrem akqutni piciurterrlainalaraa unguvalrianun tuqumalrianun-llu.” Cali qanenqigtuq, “Tauna angun canimenaku tungayakarput, ilakaat tamakut auluksugngastem̄egnuk.”

²¹ Tua-llu Ruth-aq qanertuq, “Quyanarqenrulriamek qanrutaanga avurturaasqellua calistet ilalirluki quyurcillermeggnek qaqiutnatkaatnun.”

²² Naomi-m qanrutaa Ruth-aq, “Aa-ang, panimaa, assinruciquq caliurquvet ilalirluki arnat Boaz-am naucetaarviani. Allami pikuvet pengegnarquq qaillukuaruteknayukluten.”

²³ Tua-i Ruth-am calillgucirai avurluni mukaarkanek qaqiutnatkaatnun. Uitavikurluku-llu cali cakini.