Romans 7 - Yupik Bible

Alerquutet Caliarat

¹ Nalluarci-qaa anelgutmaa, (alerquutet elisngastait qalarutanka), qaillun alerquutem ataniumacia yuk unguvallran taktaciatun?

² Nauwa arnaq uingqellria uiminun qillengqauq alerquutetgun unguvallran taktaciatun; tau͡gaam uinga yuunriqan, alerquutem pegtaa uinga pitekluku.

³ Taumek, uinga unguvaluku, allamek kassuuskan, aterpagciiqaat akusrarutekevkartem̄ek. Tau͡gaam uinga yuunriqan, angicimauq tuaken alerquutmek, allamek-llu kassuuteng'e'rmi akusrarutekevkanrituq.

⁴ Tuaten-llu, anelgutmaa, alerquutet tungiitnun tuqullruuci Christ-am temiikun, allamun kassuutesqelluci, taumun tuqumek makcecimallermun, atsanek naugisqelluta Agayutem pikainek.

⁵ Kemegmi uitallemten̄i, assiilnguum aglumayullra, picirkiutni aturluku, caliangqellruut tememten̄i naugisqelluta atsanek tuqumun.

⁶ Tau͡gaam maa-i alerquutnek angicimaukut, tuquluta teguaqestemten̄un, kevgiuresqelluta nutaramek yuucingqerrluta, ak'allat igat aturluki pivkenata.

⁷ Camek tua-llu qanerciqseta? Alerquutet-qaa assiilnguugut? Agayutem pivkanrilliu. Watqapik! Tau͡gaam, alerquucetailkan cam assiilnguucia nalluyarqa. Ayariyaraq nalluyarqa qanrutenrilkatnga alerquutet, “Ayariyaqunak.”

⁸ Tau͡gaam assiilnguq, alerquutetgun pillerkangqerrluni, ayarivkaraanga ayuqenrilngurnek. Alerquutaunani assiilnguq tuqumauq.

⁹ Ciungani alerquutaunii unguvallruunga, tau͡gaam alerquutet piurcata, assiilnguq unguirtuq, wiinga-llu tuqullruunga;

¹⁰ alerquun-llu elkarcimalleq unguvamun, wangni tuqumek iqungqertuq.

¹¹ Tua-i assiilnguq, pillerkangqerrluni alerquutekun, iqluanga, tamaaggun-llu tuqullua.

¹² Taumek alerquutet tanqilriaruut, picirkiutet-llu tanqilriaruluteng, elluarluteng assirluteng-llu.

¹³ Taumek-qaa assilria, taitellruuq tuqumek wangnun? Watqapik! Tau͡gaam assiilnguq, tuqumek caliuq wangnun assilriakun alerquutekun, assiilnguum assiilnguucia alaitesqelluku, alerquutekun-llu arcarisqelluku.

¹⁴ Nallunritarput Alerquutet anernellauciat, wiinga tau͡gaam kemegtaugua, assiilngurmun tunumalua.

¹⁵ Taringumanritanka calianka, piyullrenka caliaqenrilamki, tau͡gken uumiklemnek, caliyuglua.

¹⁶ Wani-wa calikuma cucukenrilkemnek, nallunritaqa Alerquutet assiuciat.

¹⁷ Taumek wangnek atunritanka, tau͡gaam assiilnguum wangnelnguum caliaqai.

¹⁸ Tuaten nallunritaqa wangni (kememni) assilriartailucia, assilria cucuksaaqaqa, tau͡gaam aturciigataqa.

¹⁹ Atunrilamku assilria piyulqa, tau͡gken assiitellria cucukenrilkeka aturluku.

²⁰ Wani-wa cucukenrilkeka atuqumku, wangnek pinritaqa, tau͡gaam assiilnguum wangnelnguum caliaqaa.

²¹ Tua-i naspecimariaqa man'a, elluaq atungnaqaqamku, assiilnguum nayularaanga.

²² Wani-wa qamaggun ircaqumkun Agayutem alerquutii angniutekaqa,

²³ tau͡gaam tangertua tememni allamek, alerquutmek inglukilrianek, umyuama alerquutainun, teguarurrlua-llu assiilnguum alerquutainun tememni uitalrianun.

²⁴ Nakleng wiinga! Kia aviuciiqanga waken tuqum temiinek?

²⁵ Quyavikaqa Agayun Jesus Christ Atanemteggun. Taumek wii wangnek kevgiurqa Agayutem alerquutii umyuamkun, tau͡gaam kememkun kevgiurluku assiilnguum alerquutii.