Romans 6 - Yupik Bible

Assiilnguum Tungiinun Tuqullerkaq

¹ Qaillun tuall' qanerciqseta? Assiilngurkun-qaa ciumurciiqukut naklekun piusqelluku?

² Watqapik! Qaillun-mi wangkuta assiilngurmun tuqullrulriani, assiilnguq cali uitavikeciqseta?

³ Nalluuci-qaa tamamta Christ-amun Jesus-aamun ilausngaluta anglluumalriani, elliin tuqullranun ilausngaluta angllullrucimten̄ek?

⁴ Tua-i anglluryarakun tungmagcimaukut ilakluku tuqullranun, wani-wa Christ-atun tuqumalrianek maktaullertun, Aatam ucurnarquciakun, tuaten wangkuta-llu piyuanaurtukut nutaramek yuucingqerrluta.

⁵ Wani-wa elliinun ilausngakumta tuqullrakun ayuqluku, tua-i tuaten-llu cali ilausngaciqukut makyuciakun ayuqluku.

⁶ Nallunrilamteggu yuucirput ak'allaq ilakluku kelistamun ussukcausngallruuq, tema assiilnguum pia piunriisqelluku, assiilngurmun pisten͞gunriisqelluta.

⁷ Wani-wa tuqumalria assiilnguum cakenriraa.

⁸ Tau͡gaam Christ-aq tuqullgutkekumteggu tuaten-llu unguvallgutkarkauluku ukvertukut.

⁹ Nallunritukut Christ-aq tuqumalrianek maktaulleq tuqunqiggngailucia; tuqu elliinun atanrunrirtuq.

¹⁰ Wani-wa tuqullermikun assiilngurmun tuqullruuq, ataucirqumek, tau͡gaam unguviimi Agayutmun unguvauq.

¹¹ Tuaten-llu elpeci, umyuarteqkici assiilnguum tungiinun tuqumaluci, tau͡gaam Agayutmun unguvaluci Christ Jesus-aami Atanemten̄i.

Assiilnguum Ataneqenrillerkaa

¹² Taumek assiilnguq atanruvkanriciu temevcen̄i tuquarkaulriami, aglumacit niisngaksaunaki.

¹³ Cali avateci assiilngurmun pivkanriciki, elluanrilngurnun saskukevkarluki, tau͡gaam Agayutmun tunluci tuqumalrianek unguilriacetun, avateci-llu Agayutmun tuniciki ellualriamun saskukevkarluki.

¹⁴ Wani-wa assiilnguq elpecen̄un atanruarkaunrituq; alerquutet qulliliumanrilaci, tau͡gaam naklekutem qulliliumiici.

¹⁵ Tua-llu-qaa, assiilngirciqukut-qaa alerquutet qulliliumanrilatkut tau͡gaam naklekutem? Watqapik!

¹⁶ Nalluarci-qaa kitumun tunkuvci elpecen̄ek teguarurucirci niisngallerpeciuggun, aipaagnun assiilngurmun tuqumek iqulegmun, wall'u niisngallerpeciuggun elluarucimek iqulegmun?

¹⁷ Tau͡gaam quyanarquq Agayun, elpeci assiilngurmun teguarullrulriani maa-i niisngalriarurcavci ircaqurpeciuggun elitnaurutmun elpecen̄un taicimalriamun.

¹⁸ Assiilngurmek-llu angicimaluci, elluariyaramun pisten͞gurcavci.

¹⁹ Yuum piciryaraatun qalartua, tua-i pinialuciatun kemegpeci. Ciungani avateci tunellrucirpecetun menuurrnarqelriamun assiirusngiinarluci, tuaten maa-i avateci tunkiciki elluaryaramun kencignarillerkarpecen̄un.

²⁰ Assiilngurmun teguarullerpecen̄i, elluaryaram ataniumanritaaci.

²¹ Tua-i-llu tamakut, maa-i kasnguksaguskengaci imumi ayuquciqellerpecen̄i camek unangvikellruceciki? Tuqumek tau͡gaam iqungqertut.

²² Tau͡gaam maa-i assiilnguum teguaqenriaci Agayutmun-llu pisten͞gurcavci, elluaryaramek unanguci, iqungqerrarkauluni unguvamek nangyuilngurmek.

²³ Wani-wa assiilnguq akiliutengqertuq tuqumek, Agayutem tau͡gaam cikiutii wangkutnun unguvauguq nangyuilnguq Jesus Christ-akun Atanemteggun.