Romans 5 - Yupik Bible

Elluaryaram Iqua

¹ Taumek, ukverkun ellualriarurcamta, uitanqegcitengqertukut Agayutmi Atanemteggun Jesus Christ-akun.

² Elliikun unakarput ukvemteggun takumcukutii atuqengarput, angniutekluku-llu neryuniurutvut Agayutem ucurnarqucia.

³ Cali-llu, nangtequteput quyatekaput, nalluvkenaku ilalciullemteggun asvairillerkarput,

⁴ asvailuciq-llu naugilartuq ayuquciqegtaarmek, ayuquciqegtaar-llu neryuniurutmek.

⁵ Neryuniurutem-llu qacuvallagtessngaitaakut Agayutem kenkii kuvumiin ircaqumten̄un Anernerkun Tanqilriakun cikiutiikun wangkutnun.

⁶ Cirlaullemta nalliini, Christ-am tuqutekellrui assiilngiumalriit.

⁷ Nauwa yuk tuqungaituq ellualria pitekluku, assilria yuk tuqutekaqsarngataa.

⁸ Tau͡gaam Agayutem kenkutni wangkutnun nasvagaa assiilngiumallemten̄i tuqutekevkarluta Christ-amun.

⁹ Taumek, augakun ellualriarurcamta, nutaan anirtuumaciqukut elliikun Agayutem eq'uqertiinek.

¹⁰ Wani-wa inglukestek'ngermikut, Qetunrami tuqullrakun kenegyagucakut, nutaan kenegyagucecimariluta unguviikun anirtuumaarkaugukut.

¹¹ Kiingan pivkenaku, tau͡gaam nunaniryugtukut Agayutmi, Atanemteggun Jesus Christ-akun, elliikun kenegyagutmek akurtullruamta.

Adam-aakun Assiilnguum Piurucia, Elluaryaram-llu Piurucia Jesus-aakun

¹² Wani-wa yugkun ataucikun assiilnguq tekitellruciatun nunamun, tuqu-llu assiilngurkun, tuaten-llu tuqu sagcimauq yugnun tamaitnun, tamarmeng assiilngillruata.

¹³ Assiilnguq nunami uitallruuq alerquutet taicimavailgata, tau͡gaam alerquucetailngurmi assiilnguq pimanrituq.

¹⁴ Ilangcivkenaku tuqu yugnun atanrullruuq Adam-aamek ayagluni Moses-aaq engelkarrluku, Adam-aam assiilnguanek atunrilengraata, ayuqngaku tekitarkam.

¹⁵ Tau͡gaam cikiun akiilnguq assiilnguum piatun ayuqenrituq, wani-wa yuum ataucim narurcillrakun amlleret tuqullrukata, amllenruuq Agayutem takumcukutii, cikiutii-llu naklekutekun, yugkun ataucikun Jesus Christ-akun pinruluni amllernun atuuguq.

¹⁶ Cikiun-llu akiilnguq ayuqenrituq yuum taum ataucim assiilnguan iquatun. Assiilnguq atauciq cuqcimallermikun pinarqutengqertuq, tau͡gaam assiilnguut amlleng'e'rmeng cikiutekun akiilngurkun elluarucimek iqungqertut.

¹⁷ Wani-wa, yuum ataucim assiilngillrakun tuqu elliinun atanrukan, pinruluteng naklekutmek angelriamek, elluarucim-llu cikiutiinek akiilngurmek akurturilriit, unguvami atanruciqut yugkun ataucikun Jesus Christ-akun.

¹⁸ Taumek ataucim yuum assiilnguan yuut tamalkuita pinarqelriarurcetellruciatun, tuaten-llu yuum ataucim elluarucian yuut tamalkuita pinarqenrilnguuvkarai unguvaarkaurtelluki-llu.

¹⁹ Wani-wa yuum ataucim niisnganritellrakun amlleret assiilngilriarurcata, tuaten-llu cali yuum ataucim niisngallrakun amlleret ellualriarurciiqut.

²⁰ Alerquutet taillruut, assiilnguq misturisqelluku; tau͡gaam nani assiilnguq misturingraan, naklekun sagtuq pinruluni mistunruluni-llu.

²¹ Tuaten assiilnguq atanrullruciatun tuqukun, tuaten-llu naklekun atanrusqelluku elluarucikun unguvamun nangyuilngurmun, Jesus Christ-akun Atanemteggun.