Romans 3 - Yupik Bible

¹ Cakun tua-llu Jews-aat elluinruat? Nuugiryaraq-llu catngua?

² Tua-i amllelriamek tamaitgun. Ciuqliuluku, Agayutem Jews-aat nasvitai nallunarqelrianek.

³ Qaillun-mi ilait ukvenrilkuneng, ukvenriluciata-qaa Agayutem piciucia asguranariciqaa?

⁴ Watqapik! Agayun piciuli yuut tamarmeng piciunrilengraata; igausngaciatun, “Qanllerpegun ellualriarusqelluten, cirlakisqelluten-llu cuqcimallerpegun.”

⁵ Tau͡gaam elluanrilucimta nasvakaku elluarucia Agayutem, qaillun qanerciqseta? Elluanrillekluku-qaa Agayun eq'ukutmek taicillranek wangkutnun? (Yuut qanlauciicetun qanertua).

⁶ Watqapik! Qaillun-mi Agayutem nunam yui cuqcugngaciqaki?

⁷ Tau͡gaam piciunritlemkun Agayutem piciucia pikaniqan, ciin cali cuqcimasia assiilngurtulriatun?

⁸ Ciin-llu assiilnguq atunriceta assilriamek iqungqerrnayukluku, ilaita yuut picilirualauciicetun qanerniluta? Elluatun qanercetaarumaarkaugut.

Tamarmeng Yuut Pinarquciat

⁹ Tua-llu-qaa, Jews-aarulriani-qaa elluanruukut? Qang'a, watqapik; ak'a qanellruunga yuut tamalkuita, Jews-aarungraata Jews-aarunrilengraata-llu, assiilnguum teguaqai;

¹⁰ igausngaciatun: “Ellualriartaituq, atauciungraan,

¹¹ taringumalriartaituq, yualriartaunani-llu Agayutmek.

¹² Tamarmeng avtut, tamarmirrluteng-llu iqlutmurtut; assilriamek atulriartaituq, ataucirraunge'rmi.

¹³ Igyarait ikingqaut qungutun, alunguteteng iqluyaramun atularait, qerrluit imangqertut ciissirpiit tuqunaitnek,

¹⁴ qanrit imangqertut aniqlaatnek pagglungqerrsaramek-llu.

¹⁵ It'gait cukalartut tuqucinaluteng,

¹⁶ picurlak nangteqsaraq-llu tumyaraatnetuq,

¹⁷ uitanqegcitem-llu tumyaraa nalluat.

¹⁸ Qigciksunritaat Agayun iimeng ciuqerratni.”

¹⁹ Watua nallunrirarput alerquutem qanellra qulliliumakainun pimacia, tamalkuita yuut nepairesqelluki, nuna-llu tamalkuan Agayutem ciuqerrani pinarqelriarusqelluku.

²⁰ Taumek yuk ellualriarurrngaituq elliin ciuqerrani alerquutet atullratgun, tua-i assiilnguq alerquutet nallunairatgu.

Elluaryaraq Ukverkun

²¹ Tau͡gaam maa-i Agayutem elluarucia nallunairumauq alerquutetgun pivkenani, nallunairutkengraatgu alerquutet prophet-aat-llu.

²² Tua-i Agayutem elluarucia, ukveqellrakun Jesus Christ-am, ukverumalriani tamalkuitni, cangallrulriartailan;

²³ tua-i tamarmeng assiilngillruata, Agayutmi-llu ucurnarillerkarteng nuryagulluku.

²⁴ Ellait elluarimaut naklekutiikun cikiutekun, Jesus Christ-am akiliutellrakun.

²⁵ Tauna Agayutem tunaa ukveqellrakun auga cimiutekesqelluku. Maaggun Agayutem elluarucia nasvaumauq, takumcutaucimitun assiilnguut ak'allaat pellugcecamiki.

²⁶ Nallunairluku elluarucini mat'um nalliini, cali-llu Jesus-aam ukveqellrakun yuum ellualriarurucia.

²⁷ Nauwa-tuall' yugngalucirput? Pikaunrituq. Ca pitekluku? Caliat-qaa pitekluki? Qang'a, ukveq pitekluku.

²⁸ Taumek elkartarput yuum ellualriarurucia ukverkun, alerquutet atullratgun pivkenani.

²⁹ Wall'u-qaa Jews-aat kiimeng Agayun Agayutkaat? Jews-aarunrilnguut-llu-qaa Agayutkaat? Aa-ang, Jews-aarunrilnguut-llu Agayutkaat.

³⁰ Agayun atauciungan; elliin-llu ellualriarurciiqai nuugiumalriit ukveratgun, nuugiumanrilnguut-llu tuaten ukverat pitekluku.

³¹ Taumek-qaa alerquutet piunrircetaput maaggun ukverkun? Qang'a! Tau͡gaam, elkartaput alerquutet.