Romans 2 - Yupik Bible

Yuum Cuqcimallerkaa

¹ Taumek kituunge'rpet, camek avalitkaituten, yugmek cuqcikuvet pinarqelriaruuten, yugmek cuqcikuvet elpenek-llu cuqciciquten, tua-i elpet cuqcestiini caliarpegun cangallrunrilavet.

² Nallunritarput Agayutem qanercetaarutii tut'elaucia tamakut aturtaitnun.

³ Usuuq, tamakut aturtait cuqeskuvki, amta-llu elpet aturaqluki, umyuartequten-qaa avitnayukluku Agayutem anucimirqecetaarutii?

⁴ Wall'u-qaa cakaaran Agayutem takumcukutii angelria qenqerrngialucia nerinisngialliqenrilucia-llu? Nalluuten-qaa Agayutem assiucimikun, elpet umyualinqigtesqumacirpenek?

⁵ Tau͡gaam asvailucirpegun umyuarniunritlerpegun-llu nangyutkarpenek quyurciuten Ernermi Agayutem eq'uqertiin alaillerkaani, ellualriim qanercetaarutiini.

⁶ Tua-i elliin nunulirciqngaku yuk tamalkuan caliarakun.

⁷ Tamakut caliamegteggun ellualriatgun asvailnguut, ucurnamek neryuniulriit qigcignamek-llu, piunriyuilngurnek-llu, elliin cikirciqai unguvamek nangyuilngurmek;

⁸ tau͡gaam navguiyulriit piciulriim-llu niisnganritestain, elluanrilnguum niisngastain eq'ukun nanikuanaq-llu aturciqaat.

⁹ Tamarmeng assiilngurnek calilriit, nangteqnamek nanikuamek-llu ciunerkangqertut, Jews-aat ciumek Jews-aarunrilnguut-llu.

¹⁰ Tau͡gaam assilrianek calilriit ucurnamek qigcignamek-llu ciunerkangqertut, Jews-aat ciumek Jews-aarunrilnguut-llu.

¹¹ Agayun yuum taungucianek catkiyuilami.

¹² Tamarmeng alerquutaunateng assiilngilriit alerquutaunateng piunrirarkaugut, tamarmeng-llu assiilngilriit alerquutem qulliliumakai qanercetaarumaarkaugut alerquutetgun.

¹³ Wani-wa alerquutet niitellratgun kina ellualriarunrilan Agayutem ciuqerrani, tau͡gaam alerquutem aturtai ellualriarurciiqut.

¹⁴ Tuaten Jews-aarunrilnguut alerquutailnguut nutem, alerquutek'laamegteki, ellmeggnek alerquuteteng atularait, alerquutet igausngalriit nallungermegteki,

¹⁵ nasvagluki ircaqumeggni igausngalriit alerquutet, umyuaqegtaaraata-llu nallunailarai, umyugaita-llu ayuqenrilnguut aipaagni pinaqniciqait wall'u pinarqenritniciqait,

¹⁶ ernermi taumi, Gospel-aam qanellratun, Agayutem cuqcillerkaani Christ Jesus-aakun, yuut aassaqek'ngaitnek.

Jews-aat Pinarquciat

¹⁷ Tau͡gaam Jews-aarunikuvet alerquutet-llu cacetuqutekluki, pivakluku-llu Agayutmun caumacin,

¹⁸ pisqutii-llu nalluvkenaku, assilria-llu pisqutekluku ayuqucirtuumiivet alerquutetgun,

¹⁹ nalirrukevkenaku-llu ciuliqagten͞gucin cikmiumalrianun, tanqiuluten-llu tan'germi uitalrianun,

²⁰ ayuqucirturyugngaluki usviilnguut, mikelngurnun-llu elitnauristen͞guluten, alerquutet imaqngatkek elisnganeq piciuneq-llu.

²¹ Taumek elpet allat ayuqucirtuquvki, elpenek-qaa ayuqucirturngaituten? Teglegyaraq inerquutekekuvgu, teglelartuten-qaa?

²² Qanlalriami akusrarutekiyunaitniluku, akusrarutekilartuten-qaa? Agayutnguat pelleq'laryaaqaten, tau͡gaam-qaa agayuvignek teglelartuten?

²³ Pivakilriami alerquutnek, qigcikenritan-qaa Agayun alerquutain narurtellratgun?

²⁴ Igausngaciatun, “Jews-aarunrilnguut Agayutem atra caunrilkelaraat elpeciuggun.”

²⁵ Nuugiryaraq atuuyaaquq Alerquutet atuquvki, tau͡gaam Alerquutet narureskuvki nuugiumacirci atuunrirciquq.

²⁶ Taumek nuugiumanrilnguum Alerquutet elluarrluki atuquniki, nuugiumanritellra-qaa nuugiumalriatun pitangaituq?

²⁷ Taumek tamakut kemegkun nuugiumanrilnguut Alerquutet tau͡gken aturluki, cuqciiqaiceci igausngalriit Alerquutet avaliqestaitni nuugiumaluci-llu, narureskuvciki alerquutet.

²⁸ Jews-aarupianrituq kemegkun pilria, nuugiryarapiuvkenani-llu qaikun kemegkun-llu pilria.

²⁹ Tau͡gaam ilumikun pilria Jews-aaruuq, nuugiumapiarluni-llu ircaqumikun Anernellarkun, alailngurkun pivkenani. Yugnek nanraumanrituq tau͡gaam Agayutmek.