Romans 15 - Yupik Bible

Ukvelriim Ellminek Arcaqakenritlerkaa

¹ Wangkuta asvailngurni ukvemteggun ikayurnarqaput asvaitenrilnguut alarculallritnek, wangkutnek arcaqakevkenata.

² Tamamta ilaput ilukegcivkarnauput pinirillerkaatnun.

³ Christ-aq-llu ellminek arcaqakellrunrituq; tau͡gaam, igausngaciatun: “Picilirtevvet piciliutait wangnun tut'ut.”

⁴ Wani-wa imumirpak igausngalriit igausngaut ayuqucirtuutekauluteng wangkutnun, pektayiitellemteggun qarucimallemteggun-llu qaneryaratgun neryuniurutengqerresqelluta.

⁵ Agayutiin pektayiitnam qaruyutem-llu umyuallgutekliullici atunem, cuqyutekluku Christ Jesus-aaq,

⁶ ataucimek umyuangqerrluci nanrarnaurarci Agayun Atanemta Jesus Christ-am Aatii.

⁷ Taumek, ciuniurtaaguskici atunem, Christ-aq ciuniurillruciatun wangkutnek, ucurnarillerkaanun Agayutem.

Ayuqluteng Jews-aat Jews-aarunrilnguut-llu Christ-aq Pikaat

⁸ Qanrutamci Christ-aq pisten͞gurtellruuq nuugiumalrianun Agayutem piciucia nasvagnaluku, piciurtesqelluki akqutai ciuliaritnun tunumalriit,

⁹ Jews-aarunrilngurnun-llu Agayun ucurnarivkaasqelluku takumcukutiinek. Igausngaciatun, “Taumek nanrarciqamken Jews-aarunrilnguut akuliitni, atren-llu atuutekluku.”

¹⁰ Cali-llu igausngauq, “Nunaniryugci, Jews-aarunrilngurni, yui ilakluki.”

¹¹ Waten cali, “Ataneq nanrarciu, tamarpeci Jews-aarunrilngurni, yuut-llu tamarmeng nanrarlitgu!”

¹² Cali-llu Isaiah qanertuq, “Jesse-m acilqu͡rra tekiciiquq, ellii-llu nangerciiquq Jews-aarunrilnguut atanirturarkauluki; ellii-llu Jews-aarunrilnguut neryuniurvikciqaat.”

¹³ Agayutiin neryuniurutem imirlici angnimek uitanqegcitmek-llu ukvellerpeciuggun, pikanirniartuci neryuniurutevciuggun, Anernerem Tanqilriim piniakun.

¹⁴ Wiinga-llu peng'gartenritamci ilamaa, elpeci assilriamek muirumiivci, elitmek-llu imiumaluci, atunem-llu ayuqucirtuucugngaluci.

¹⁵ Tau͡gaam aaqevkenaci makut ilaitnek igaramci neq'angevkarluci, takumcukun aturluku Agayutmek taicimalria wangnun,

¹⁶ Christ Jesus-aamun kevgausqellua Jews-aarunrilngurnun, caliaqesqelluku Agayutem Gospel-aara, cikiutngullrat Jews-aarunrilnguut akurtuyunarisqelluku Anernerkun Tanqilriakun kenciknarivkaumaluteng.

¹⁷ Taumek Christ Jesus-aami ukverailutengqertua caliamnek Agayutmun.

¹⁸ Alairingnaqngaitua camek Christ-am wangkun caliallran avatiini, niisngalriarurrluki Jews-aarunrilnguut, qanllemkun caliamkun-llu,

¹⁹ nallunailkutetgun caperrnarqellriatgun, irr'inarqellriatgun-llu Anernerem-llu Tanqilriim piniakun, Jerusalem-aaq ayagneqluku Illyricum-llu engelkarrluku qalarutkumariaqa Christ-am Gospel-aara.

²⁰ Qalaruteksuumiamku Gospel-aaq, Christ-am qalarutkumarillrani pivkenii allam inguqiriliarani enelinavkenii,

²¹ tau͡gaam igausngaciatun, “Elliinek qanrucimaksailnguut tangerciqaat, niiteksailnguut-llu taringeciqut.”

²² Maa-inguuq pulengtaq taisciigalutek'lalqa elpecen̄un.

²³ Tau͡gaam maa-i ukuni nunani calivigkairucama, ullagyuumillruamci-llu,

²⁴ neryuniurtua tangerrnayukluci Spain-amun ayakuma tumekluci, ilagarraarluci-llu, tamaavet ayakuma elpecen̄un ikayurnayuklua.

²⁵ Watua tau͡gaam, Jerusalem-aamun ayakatartua agayumalriit kusguatekaitnek ang'aqlua.

²⁶ Macedonia-rmiut Achaia-rmiut-llu tengruluteng elliillruameng, nuuqitellrianun agayumalrianun Jerusalem-aami.

²⁷ Quyaluteng tuaten piut, tua-i tuaten pinaqngamegteki, wani-wa atawaqautnek anernellarnek avgucaceteng, ellaita-llu Jews-aarunrilnguut ikayuayunarqait nunamiutarteggun.

²⁸ Taumek man'a caliaqa taqumarikumku, elliitet-llu tunumarikumki, Spain-amun ayagciqua tumekluci.

²⁹ Nallunritua-llu tekiskuma elpecen̄un, tekitarkaucimnek Christ-am atawaqaasqutiikun qaqimalriakun.

³⁰ Qarutaaramci ilamaa, Atanemteggun Jesus Christ-akun Anernerem-llu kenkiikun piicaucesqellua Agayutmun.

³¹ Ukverumanrilngurnun Judea-mi pivkaasqevkenii, kevgartulqa-llu Jerusalem-aamun akurtuyunarisqelluku agayumalrianun.

³² Agayutem pisquciakun ullautnalua elpecen̄un, angnirlua pinirimalua-llu ilakuyucirpecen̄ek.

³³ Uitanqegcitem Agayutiin, nayurlici tamarpeci. Amen.