Romans 14 - Yupik Bible

Ukvemegteggun Asvaitenrilnguut

¹ Yuk ukverkilnguq ciuniurciu, tau͡gaam nalirrugnengqerrucianek cuqnavkenaku.

² Yuum ilii ukvertuq piciatun neryugngallerminek, alla-llu, ukverkilnguq, naunrarrlainarnek nerlartuq.

³ Nerlalriim cangakenrilliu nerenrilnguq, tuaten-llu nerenrilnguum cangakenrilliu nerelria, Agayutem ciuniuraku.

⁴ Cauyukluten allam pistiinek cuqciyunarqessit? Nakmiin Atanermi ciuqerrani nangerngaciquq wall'u iquciquq. Nayumiqamaciquq-llu, tua-i Atanrem tegumiaqsugngiiku.

⁵ Yuum iliin erneq atauciq qigcikenrularaa ernerni allani pinruluku, allam tau͡gaam tamalkuita erenret ayuqluki pilarai. Yuk tamarmi nalirrugneriuskili umyuamikun.

⁶ Erenrem qigcikestiin, qigcikaa Atanermun. Nerelria-llu cali nerlartuq, Ataneq qigcikluku, quyavikngamiu Agayun; tuaten-llu nerenrilnguq, nerenrit'lartuq Ataneq qigcikluku, Agayun-llu quyavikluku.

⁷ Wangkutnek yuulriartailan ellminek, wangkutnek-llu tuqulriartailan-llu ellminek.

⁸ Tau͡gaam yuullemten̄i, Atanermun yuugukut, tuqukumta-llu, Atanermun tuquciqukut; taumek, unguvangramta wall'u tuqungramta, Atanrem pikaakut.

⁹ Tamana pitekluku Christ-aq tuqullruuq unguirluni-llu ataam, tuqumalrianun unguvalrianun-llu Atanruarkaungami.

¹⁰ Ciin-mi cuqciu ilan? Wall'u, ciin caunrilkessiu ilan? Wani-wa tamamta Agayutem aqumlleran ciuqerrani qanercetaarvigmi nangerngaarkaungamta.

¹¹ Igausngiin, “Unguvacimtun, qanertuq Ataneq, ciisqut tamarmeng wangnun cikciiqut, tamarmeng-llu alungutet nanrarciqaat Agayun.”

¹² Taumek tamamta, qanercetaarumaciqukut Agayutmun.

¹³ Taumek cuqyutaagutenritnaurtukut atunem, tau͡gaam umyuarput elkarrluku, ilamta paallautekaanek pinavkenata, pisciigalutekaanek-llu.

¹⁴ Nallunritua nalirrugtevkenii-llu Atanermi Jesus-aami menuulriartailucianek; tau͡gaam menuukestemeggni cat menuulartut.

¹⁵ Nerrlerpegun ilavet umyugaa navkan, kenkinrirtuten. Nerrlerpegun piunrircetenrilgu ilavet ukvera, Christ-am tuqutekngaku.

¹⁶ Taumek atawakeksi qanrutkevkaryaqunaciu assiilnguuluku.

¹⁷ Wani-wa qiliim Angayuqauvia neryaramun meryaramun-llu pimanrituq, tau͡gaam elluaryaramun, uitanqegcitmun-llu angnimun-llu, Anernerkun Tanqilriakun.

¹⁸ Tuaten Christ-amun kevgiulria Agayutmun akurtuyunarqeciquq yugni-llu elluakumaluni.

¹⁹ Taumek ciumuutnaurput nepaitnarqelria, atunem-llu asvairtaarutlerkaq.

²⁰ Neqkaq pitekluku, Agayutem caliara piunriryaqunaciu. Tamarmeng neqkat menuicaaqut, tau͡gaam nerrlermikun yuum ilani cangayugcetarkaukuniu, assiilnguuguq.

²¹ Atawauciquq kemegtunrilngerpet, wine-amek-llu menrilngerpet, camek-llu atunrilkuvet ilavet paallautekaanek, wall'u cangayuutekaanek, wall'u pinialutkaanek.

²² Ukvengqertuten-qaa? Kitak, elpenek pikurarru Agayutem ciuqerrani; atawaqertuq yuk ellminek cangayutekailnguq atulallerminek.

²³ Tau͡gaam nalirrugnengqellria nerkuni, tauna pinarqelriaruuq, ukveq atunrilamiu, wani-wa ukvermek kingunrilnguq assiilnguuguq.