Romans 13 - Yupik Bible

Agayumalriim Atu'urkaa

¹ Yuk tamarmi niisngakili atanrulrianun, wani-wa atanrulriartailan Agayutem pisqumanrilkiinek. Maa-i-llu ataneput piyunarqucimek cikiumaut Agayutmek.

² Taumek atanernek inglukilria inglukiuq Agayutem elkartellrinek, inglukilriit-llu qanercetaarumaarkaugut.

³ Wani-wa atanrulriit alingnarqenritut ellualrianun, tau͡gaam elluanrilngurnun. Aliksuumiicaaqan-qaa atanrulria? Kitaki elluarrlainarnek calikina, nutaan elluaknauraaten,

⁴ wani-wa Agayutem pistekaa elpet pitekluten atawaullerkarpenun. Tau͡gaam assiilngurmek calikuvet, alingi, wani-wa ellii elliinginaq saskungqenrilan; Agayutem pistekngani, anucimirqecetaalarai elluanrilngurnek calilriit.

⁵ Taumek niisnganarquci anucimirqecetaarun alingnarqelria kiingan pitkevkenaku, tau͡gaam cali civuurataitellerkarci pitekluku.

⁶ Tamana-llu pitekluku akiliqurautnek cikiqenglartuci, Agayutem pistekngateng, caliarteng man'a cumigut'laraat.

⁷ Yugnun tamalkuitnun piarkaci tuniciki, akiliqurautet yugkaitnun, akiliutet yugkaitnun, takaqun takarnarqelrianun, qigcikun-llu qigcignarqelrianun.

⁸ Akiilngungqerrsaqunaci yugni, tau͡gaam kenkutarkauluci atunem. Wani-wa ilaminek kenkilriim Alerquun maligtaqua.

⁹ Inerquutet-llu makut, “Akusrarutekiyaqunak, Tuquciyaqunak, Teglegyaqunak, Ilavnek piciliqengyaqunak, Ciknayaqunak,” allat-llu alerquutet tamalkuita, tapqusngai mat'um, “Ilan kenkarkaugan elpetun pitarrluku.”

¹⁰ Kenka caliyuituq assiitellrianek ilaminun; taumek kenka Alerquutnek muircilriaruuq.

¹¹ Tuaten-llu, nalluvkenaku sass'aq pillerkaq, uitnariaci qavallerpecen̄ek. Tua-i anirtuumallerkarput ukaqsigiinaan ukverraanemten̄ek.

¹² Unuk pellukatartuq, erteqatarluni-llu. Taumek tan'gerem caliari yuunauput, all'uku-llu aknircailkun tanqiim pia.

¹³ Nangrunaunata piyualta ernermi pilalriacetun, neryunqegglit taangaryunqegglit-llu piciryarallgutkevkenaki, asriuyugpek'nata, kasngunarqelrialiurpek'nata-llu, arivatevkenata, ciknayugpek'nata-llu.

¹⁴ Tau͡gaam all'uku Ataneq Jesus Christ-aq, kemegtaq-llu pivigkirpek'naku, aglumayullra niisngallrakun.