Romans 12 - Yupik Bible

Agayumalriim Ayuqucirkaa Caliarkai-llu

¹ Taumek, qarutaaramci anelgutkelriani, Agayutem takumcutaucia pitekluku. Temci tunesqelluki agayussuutekluki, unguvaluki, menuunaki, Agayutmun-llu akurtuyunaqluki; waten ayuqelriamek agayuyaramek pinarquci.

² Mat'umun-llu nunamun eluciliumavkenaci, tau͡gaam allaurrluci umyualinqigtellerpeciuggun, nasvagnaluku Agayutem pisqutii assilria, akurtuyunarqelria-llu, tamalkuulria-llu.

³ Tua-i qanertua, naklekutekun wangnun tunumalriakun, tamarpecen̄un, kina imna umyuarteqesqevkenaku ellminek quyinrurrluni. Tau͡gaam umyuarteqesqelluku ayuqucini murilkelluku; tuaten Agayutem cikiumataciatun ukvermek yuut pitarrluki.

⁴ Wani-wa amllernek avatengqertukut ataucimi tememi, tamalkurmeng-llu avatet ayuqenrilngurnek piyarangqerrluteng.

⁵ Tuaten-llu wangkuta, amllengramta, ataucimek temengqertukut Christ-ami, allakaqtaarluta-llu avatellgutkukut.

⁶ Cikiutengqertukut-llu ayuqenrilngurnek, naklekutem wangkutnun tunumalriim pisquciatun; ilait qallacaramek, kitaki qallatnaurtukut ukvertacimcetun.

⁷ Wall'u kevgiurturyaramek, kitaki kevgiurarput urenkellaut; wall'u elitnauristekaulria, elitnaurillni urenkekiliu;

⁸ wall'u qarutaaristekaulria, qarutaallni urenkekiliu; cikirturilria, cikirturili qunuvkenani; atanirturilriim, atanirtullni aulukekiliu elluarrluku; takumcutalria, takumcutarli tengruluni.

⁹ Kenka piuli malrugnek umyuangqerpek'nani. Assiilnguq pelleryagulluku; assilria paukluku.

¹⁰ Elluarrluci kenkulluci atunem anelgutkelriatun, nanramun alla cingluku;

¹¹ caliami qacuiqsaunani; anernermikun tengruluni; Ataneq kevgiurluku.

¹² Neryuniurutmi angniqili; arenqiallugtem̄i cangayunrilli; piicalaqili qacuiqsaunani.

¹³ Agayumalriit ikayuqiliki piilutaitnek, allaniuryunqeggluni-llu.

¹⁴ Nangtesteten atawaqaasqiki; atawayulaqina, aniqlaayuunak-llu.

¹⁵ Angnilriit angnillgutekluki; qialriit qiallgutekluki.

¹⁶ Umyuallgutekluci atunem; ucurnarqelriit cucukevkenaki, tau͡gaam niugteng niukekait ilagarluki. Elpecen̄ek picalqukevkenaci.

¹⁷ Yuk akinauryaqunaku assiilngurmek assiilnguullgutiinek. Umyuarteq'laqici yugni tamaitni atawakekaitnek.

¹⁸ Piyunarqekan, piyunarqetacirpeciuggun yugnun tamaitnun paggluunaci.

¹⁹ Kenkumalriani, elpecen̄ek akinauryaqunaci, tau͡gaam Agayutem eq'uqertiinun tunluku, igaumiin, “Akinauryaraq wii pikaqa; wiinga akinaurciqua,” qanertuq Ataneq.

²⁰ Tau͡gaam inglun kaikan, nerevkarru; meqsukan, merr'isgu; tuaten piluten qamiqurranun kenernek ellilariciquten.

²¹ Assiilngurmun cirlakevkarpek'naci, tau͡gaam assiilnguq cirliqevkarluku, assilriakun.