Romans 1 - Yupik Bible

Aryuqutet

¹ Wii Paul-aaq, Jesus Christ-am kevgaani, kelgumalua apostle-aarusqellua, allakaumalua Agayutem Gospel-aaranun,

² ciunguluku akqutkellra Prophet-aamikun, Tanqilriani igani,

³ Gospel-aami Qetunrani pitekluku, David-aam kinguvra kemegkun,

⁴ elkarcimaluni Agayutmun Qetunrauluni, Anernerkun-llu Tanqilriakun piningqerrluni unguillermikun tuqumalrianek, tauna Jesus Christ-aq Atanerput;

⁵ elliikun naklekutmek akurtullruukut apostle-aaruyaramek-llu ukverucimun caucesqelluki Jews-aarunrilnguut tamalkuita, elliin atra pitekluku.

⁶ Elpeci-llu kelgumalriani tapeqluci Jesus Christ-amun pikesqelluci.

⁷ Tamalkuitnun Agayutem kenkek'ngainun Rome-ami, kelgumalrianun ellualriarusqelluki: Naklekun piuli uitanqegcin-llu Agayutmek Atamten̄ek, Atanermek-llu Jesus Christ-amek.

⁸ Ciumek, quyavikaqa Agayun Jesus Christ-akun elpeci pitekluci, ukverci niitnaungan ellami tamiini.

⁹ Agayun tangvagtekngamku, anernemkun kevgiuqengama Qetunraan Gospel-aaranek, qacuiqsaunii aperluci kaigalartua piicautemkun,

¹⁰ Agayutem pisqutkekaku ullaucunarivkaasqellua elpecen̄un.

¹¹ Tangerrsukapigcamci, cikirnaluci cikiutmek anernellarmek piniutekarpecen̄ek,

¹² tuaten atunem qarutaarutnaluta ukvemteggun, elpeci wiinga-llu.

¹³ Nallunritesqumaamci, ilamni, pulengtaq ullaucuumilallemnek elpecen̄un, (tau͡gaam man'a engelkarrluku pivkaumaksaitua), akunlevcen̄ek atsanek unangyuumiryaaqlua tuaten allanek Jews-aarunrilngurnek unangellrucimtun.

¹⁴ Wiinga caliaqnarqanka Greek-aat nallumalriit-llu, elisngalriit elisnganrilnguut-llu;

¹⁵ taumek elpeci-llu Rome-armiuni qalarucuumiramci Gospel-aamek.

¹⁶ Kasngukenritaqa Christ-am Gospel-aara, Agayutem piniutekngaku anirtuumallerkaatnun tamarmeng ukvelriit, Jews-aanun ciumek Greek-aanun-llu.

¹⁷ Maaggun Agayutem elluarucia nasvaumauq ukverkun ukvermun: igausngaciatun, “Kina imna ukverkun ellualriarukuni unguvaciquq.”

¹⁸ Agayutem eq'ukutii nasvaumauq qilagmek elluanrilngurnun qaqiciilrianun-llu, piciulriim umgusngastainun assiilucimegteggun.

¹⁹ Agayutmek nalluarkaunricaaqut, elliin nasvicateng.

²⁰ Ellam piurteqarraallranek, elliin ayuqucia tangrrumanrilnguq, pinia-llu nangyuilnguq, Agayutngucia-llu, ukuk nallunairumauk piliarikun. Taumek qanerniarutkaitut.

Yuum Assiilngurtucia

²¹ Nallunrilngermegteggu Agayun qigcikenrilatgu, quyavikevkenaku-llu, tau͡gaam piciuvkenateng umyuigamegteggun, umyugaat-llu usviilnguq tan'gerimaluni.

²² Usvingqerrsuk'nger'meng, usviirutut,

²³ Agayutem-llu tuquyuilnguum ucurnarqucia cimillruat yuguanek, yuk tuquarkaulria ayuqeliluku, yaqulget-llu, ungungssit-llu, ciissit-llu.

²⁴ Taumek Agayutem pegtai ircaqruita aglumakillratgun caarrlugmun, temteng qigcikevkenaki,

²⁵ cimiatgu piciulria Agayutem ayuqucia iqluurutmek, ciktaarvikluki kevgiurluki-llu piurcimalriit, Piurtestiit pivkenaku, nanraumaarkaq akwanun! Amen.

²⁶ Man'a pitekluku Agayutem tuatequagai aglumakillratnun ikiulrianun. Arnaita tuaten kemegteng tunluku atuqaunrilngurmun.

²⁷ Tuaten-llu angutait, arnanek atunrirluteng ilameggnun aglumataarulluteng angutngullgutmeggnek akusrarutekiaqluteng, anucimirqecetaarun-llu ellaitnun tull'uni assiilngurmek atullrat pitekluku.

²⁸ Agayun-llu umyuamegteggun caukenrilatgu, elliin pegtai umyugaat assiitellria atuusqelluku, caliaqesqelluki ayuquciukaunrilnguut.

²⁹ Imiumaluteng elluanricaramek, assiilngurmek-llu, piksugiiyaramek-llu, umyuarrliquciyaramek-llu; muirumaluteng-llu ciknayaramek, tuquciyaramek-llu, inglukucaramek, iqluuryaramek, piciliriyaramek-llu; uputaariyugluteng;

³⁰ inglulitulit, ellmeggnek pivakluteng, ucuryaggluteng, assiilngurnek ayagnerciaqluteng, niisngavkenaki-llu angayuqateng,

³¹ umyugaunateng, piciuvkenateng-llu, takumcutaunateng, aaryuyuunateng-llu.

³² Nallunricaaqekiit Agayutem picirkiutii, tamakunek atulriit tuqumek iqungqerrarkauciat, tau͡gaam aturyugait nallmegteggun-llu pivkenaki, ilateng-llu canrilkelarait atungraitki.